Արտասովոր ախտանշաններ, որոնք հուշում են օրգանիզմում խոլեստերինի բարձր մակարդակի մասին

Խոլեստերինը ճարպային նյութ է, որը կուտակվում է արյան մեջ և կարող է ինչպես վնասակար լինել, այնպես էլ օգտակար։ Օրգանիզմում այս տարրի բարձր մակարդակի մասին խոսելիս մասնագետները սովորաբար նկատի են ունենում «վատ» խոլեստերինի մակարդակի բարձրացումը, որը կարող է կուտակվել անոթների պատերին խոլեստերինային վահանիկների տեսքով, ինչն էլ բարձրացնում է սրտի նոպայի, գլխուղեղի կաթվածի և սրտանոթային համակարգի այլ հիվանդությունների զարգացման հավանականությունը։ Սա է պատճառը, որ առողջական լուրջ խնդիրներից խուսափելու համար այս տարրի մակարդակը հարկավոր է պահել մշտական վերահսկողության տակ։

Ինչպես գրում է WebMD պորտալը, խոլեստերինի բարձր մակարդակն ախտաբանական վիճակ է, որի մասին հուշող ախտանշաննեը կարող են բնավ չասոցացվել սրտի հիվանդությունների ու սրտամկանի ինֆարկտի հետ, ուստի շատերն անտեսում են այս խնդիրը, ինչն էլ խիստ բացասաբար է անդրադառնում առողջության վրա։ Նման խնդիրներից խուսափելու համար հարկավոր է սովորել տարբերել այն արտասովոր ախտանշանները, որոնք հուշում են նման խանգարման մասին։

Մասնագետների խոսքով՝ այդ արտասովոր ախտանշաններից մեկը կարող է լինել ոտքերի սառնությունը, որին մարդիկ հազվադեպ են ուշադրություն դարձնում, և որը, սակայն, կարող է հուշել ծայրամասային զարկերակների հիվանդության մասին, որը դանդաղեցնում կամ առհասարակ արգելափակում է արյան հոսքը դեպի ոտքերն ու ոտնաթաթերը։

Ինչպես բացատրում են բժիշկները ծայրամասային զարկերակների հիվանդությունը բավական տարածված խանգարում է, որի դեպքում զարկերակներում կուտակված ճարպային նստվածքները սահմանափակում են ոտքերի մկաններին արյան մատակարարումը, ինչի հետևանքով էլ ոտքերը մշտապես սառն են լինում։ Այս հիվանդության զարգացման հավանականություն բարձրացնող գործոններն են ծխախոտի գործածությունը, զարկերակային գերճնշումը, տարիքն ու արյան մեջ խոլեստերինի բարձր մակարդակը։ 

Արյան ակտիվ շրջանառությունը շատ կարևոր է օրգանիզմի համար, քանի որ ազդում է բոլոր օրգանների ու համակարգերի վրա, ուտսի նման անկարևոր թվացող ախտանշանները ոչ մի դեպքում չի կարելի անտեսել։ Այնուամենայնիվ ոտքերի սառնությունը միակ ախտանշանը չէ, որ հուշում է խոլեստերինի բարձր մակարդակի մասին, ուստի հարկավոր է ուշադրություն դարձնել նաև մյուս կասկածելի թվացող փոփոխություններին։

Օրգանիզմում խոլեստերինի ախտաբանական բարձր մակարդակի մասին կարող են հուշել նաև այնպիսի տհաճ ախտանշանները, ինչպիսին են ոտքերի սպազմները, որոնք ի հայտ են գալիս քայլելու ընթացքում կամ հանգստի ժամանակ (օրինակ՝ պառկած ժամանակ), ոտքերի թմրածությունը,  ոտքերի մաշկի գույնի փոփոխությունը, ոտնաթաթերի կամ ոտքերի մազաթափությունը, ինչպես նաև ոտքերի մատների եղունգների գույնի ու հաստության փոփոխությունը։

Այս ախտանշանների դեպքում հարկավոր է անհապաղ բուժզննում անցնել ու անհրաժեշտության դեպքում սկսել բուժումը, այլապես դրանք կարող են շատ վտանգավոր հետևանքներ ունենալ։

Մասնագետները նախազգուշացնում են, որ օրգանիզմում խոլեստերինի մակարդակը հարկավոր է պահել մշտական վերահսկողության տակ ու միջոցներ ձեռնարկել այն նվազեցնելու համար։ Ինչպես նշում են բուժաշխատողները, այս ցուցանիշի նվազմանն են նպաստում կանոնավոր ֆիզիկական ակտիվությունը և առողջ սննդակարգը, որը հարուստ կլինի մանրաթելերով ու օգտակար ճարպերով։