Բնական դեղամիջոցներ մարսողական համակարգի աշխատանքի խանգարումներից ազատվելու համար. 8 բաղադրատոմս

Աղիների աշխատանքի խանգարումը, ստամոքսի այրոցը, փորլուծությունն ու մարսողական համակարգի հետ կապված այլ տհաճ զգացողությունները կարող են բավական լուրջ «անակնկալ» դառնալ յուրաքանչյուրի համար, ուստի զարմանալի չէ, որ մարդիկ փորձում են ազատվել նման խնդիրներից առաջին իսկ ախտանշանի դեպքում: Սովորաբար նման տհաճ խնդրից ազատվելու և մարսողական համակարգի աշխատանքը կարգավորելու համար մասնագետները խորհուրդ են տալիս հատուկ դեղամիջոցներ ընդունել, սակայն կան նաև շատ արդյունավետ ու ավելի հասանելի ժողովրդական միջոցներ, որոնք, ի տարբերություն դեղատներում վաճառվող դեղորայքի, չեն պարունակում վնասակար քիմիական տարրեր և չեն առաջացնում կողմնակի բարդություններ:

Ձեր ուշադրությանն ենք ներկայացնում մի քանի արդյունավետ ու հասանելի ժողովրդական բաղադրատոմս, որոնք կօգնեն հեշտությամբ կարգավորել աղիների աշխատանքն ու ազատվել տհաճ զգացողություններից։

Դեղամիջոցներ ստամոքսի աշխատանքի խանգարումների դեմ.

• 1 բաժակ թարմ քամած կարտոֆիլի հյութին ավելացնել 2 ճաշի գդալ մեղր, լավ խառնել և ընդունել օրական 2-3 անգամ ½ բաժակ։
• 2:2:1 հարաբերակցությամբ խառնել չորացրած հազարատերևուկը (խոտը), չորացրած եզան լեզուն և չորացրած երիցուկը (խոտը), այնուհետև ստացված խառնուրդի 2 ճաշի գդալին ավելացնել կես լիտր եռման ջուր ու թրմել մեկ ժամ։ Ստացված թուրմը հարկավոր է ընդունել օրական 2-3 անգամ ½ բաժակ ուտելուց 2 ժամ առաջ։

Դեղամիջոցներ սրտխառնոցի և ստամոքսում ծանրության զգացման դեմ.

• 1 ճաշի գդալ չորացրած սրոհունդին ավելացնել մի բաժակ եռման ջուր և 2 ժամ թրմել թերմոսի մեջ։ Ստացված թուրմը հարկավոր է խմել օրական 2 անգամ ⅓ բաժակ։ Այս դեղամիջոցն օգտագործելիս հարկավոր է հաշվի առնել, որ սրոհունդը խորհուրդ չի տրվում օգտագործել զարկերակային գերճնշման դեպքում։
• 1 ճաշի գդալ դեղատնային երիցուկի ծաղիկները թրմել մի բաժակ եռման ջրում, ավելացնել թուրմին թարմ անանուխի մի քանի տերև ու շարունակել թրմել ևս մեկ ժամ։ Ստացված ըմպելիքը հարկավոր է քամել ու խմել որպես թեյ։

Դեղամիջոցներ ստամոքսի այրոցի դեմ.

• Ստամոքսի այրոցի տհաճ դրսևորումները մեղմելու համար շատ արդյունավետ կարող է լինել խնկեղեգի արմատների փոշին։ Պարզապես հարկավոր է օրական երեք անգամ մի պտղունց խնկեղեգի արմատների փոշի օգտագործել։
• 1:1 հարաբերակցությամբ խառնել հալվեի տերևների թարմ հյութն ու գոլ ջուրը և ընդունել ստացված խառնուրդն ուտելուց առաջ մեկական թեյի գդալ։
• 1 ճաշի գդալ երիցուկի ծաղիկներին ավելացնել մի բաժակ եռման ջուր, թրմել կես ժամ, այնուհետև քամել և խմել ուտելուց 15 րոպե առաջ ⅓ բաժակ։

Դեղամիջոց մարսողությունը բարելավելու համար.

• Մարսողական համակարգի աշխատանքը բարելավելու համար հարկավոր է 1 ճաշի գդալ համեմի սերմերին ավելացնել մի բաժակ եռման ջուր, դնել թույլ կրակին ու եփել 15 րոպե։ Թրմել ևս կես ժամ, այնուհետև քամել և ընդունել օրական 3 անգամ երկուական ճաշի գդալ ուտելուց կես ժամ առաջ։

Այս բաղադրատոմսերն անչափ պարզ են, արդյունավետ ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru