Որ դեպքերում է կոկորդի ցավը պայմանավորված լինում կորոնավիրուսով և ինչ է հարկավոր անել նման դեպքերում

Հիվանդությունների վերահսկության ու կանխարգելման կենտրոնները կոկորդի ցավը համարում են COVID-19-ի մասին հուշող հիմնական ախտանշաններից մեկը, սակայն կոկորդի ցավով կարող են դրսևորվել նաև այլ վարակիչ հիվանդությունները, ուստի խնդրի հստակ պատճառը պարզելու համար հարկավոր է շատ զգոն լինել։ 

Արդեն ոչ մեկի համար գաղտնիք չէ, որ կորոնավիրուսային վարակի ախտանշանները նման են ռեսպիրատոր այլ հիվանդությունների ախտանշաններին։ Տենդից, հազից ու հոգնածությունից բացի հիվանդները հաճախ գանգատվում են նաև կոկորդի ցավից, սակայն մասնագետները հիշեցնում են, որ կոկորդի ցավը ոչ միշտ է պայմանավորված լինում կորոնավիրուսով, ուստի վարակիչ մյուս հիվանդությունների և COVID-19-ի միջև տարբերություններն իմանալը շատ կարևոր է։

Կոկորդի ցավի տեսակները

Կոկորդի ցավը կարող է տարբեր լինել ըստ իր տեղակայման, ինչն էլ կհուշի խնդրի պատճառի մասին։ Օրինակ՝ ֆարինգիտի (ըմպաբորբ) դեպքում ցավոտ զգացողություններ են նկատվում անմիջապես բերանի խոռոչի հետին հատվածում, նշաբորբի (տոնզիլիտ) դեպքում ցավը տեղակայված է լինում նշագեղձերի հատվածում և ուղեկվում է նշագեղձերի այտուցվածությամբ ու կարմրությամբ, իսկ լարինգիտը (կոկորդաբորբ) դրսևորվում է կոկորի և ձայնային ապարատի բորբոքմամբ։

Որ դեպքերում է ցավը հուշում COVID-19-ի մասին

Կորոնավիրուսային վարակը դասվում է ռեսպիրատոր հիվանդությունների շարքին, ուստի վիրուստ հեշտությամբ ներթափանցում է քիթ և կոկորդ՝ հանգեցնելով բորբոքումների, լորձաթաղանթի այտուցվածության ու ցավի։

Ինչպես նշել են մասնագետները Times of India պարբերականի հետ զրույցում, կորոնավիրուսով հիվանդների մոտ կոկորդի ցավն ի հայտ է գալիս երբ վիրուսը ներթափանցում է կոկորդի ու քթի հետ կապված մեմբրանների մեջ, ինչն էլ հանգեցնում է հյուսվածքների այտուցման։ Այս դեպքում ցավն ու տհաճ զգացողությունները նման են ֆարինգիտի դրսևորումներին։

Ինչպես տարբերել կորոնավիրուսն այլ վարակներից

Բժիշկների խոսքով՝ կորոնավիրուսային վարակով հիվանդների մոտ կոկորդի ցավից բացի նկատվում են նաև մարմնի ջերմաստիճանի բարձրացում, տենդ, չոր հազ, հոտառության կորուստ ու արտասովոր հոգնածություն։ Եթե կոկորդի ցավը չի ուղեկցվում նշված ախտանշաններով, ապա ամենայն հավանականությամբ խնդիրը պայմանավորված է որևէ այլ վարակով, այլ ոչ թե կորոնավիրուսով (օրինակ՝ նշիկաբորբով)։

Ինչպես մեղմել ցավը

Մինչ բժշկին դիմելն ու անհրաժեշտ ցուցումներն ստանալը կոկորդի ցավը մեղմելու համար կարելի է կիրառել պարզ ու փորձված որոշ միջոցներ, որոնք չեն առաջացնի կողմնակի բարդություններ։ Առաջին հերթին հարկավոր է հնարավորինս շատ հեղուկ օգտագործել, սակայն հարկ է հիշել, որ այն պետք է լինի հաճելի ջերմաստիճանի ու չառաջացնի տհաճ զգացողություններ։ Բացի այդ, կարելի է նաև աղաջրով կամ հիմնային հանքային ջրով ողողումներ անել, որոնք նույնպես կօգնեն մեղմել ցավը։

Շատ կարևոր է նաև օդի խոնավությանը հետևելն ու պարբերաբար գոլորշիով ինհալացիաներ անելը, ինչը կնպաստի կոկորդի լորձաթաղանթների արագ վերականգնմանը։