Ինչ ակնհայտ ախտանշաններով կարող է դրսևորվել թոքերի քաղցկեղը

Թոքերի քաղցկեղն այս հիվանդության ամենավտանգավոր ու տարածված տեսակներից մեկն է, որը տարեկան հազարավոր մարդկանց կյանք է խլում և ախտորոշվում է միլիոնավոր մարդկանց մոտ։ Այս հիվանդությունը կարող է շատ երկար ժամանակ մնալ աննկատ, ինչի պատճառով հայտնաբերվում է բավական ուշ։ Այնուամենայնիվ սա այն խնդիրներից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդության մասին հուշող ախտանշաններն իմանալը շատ կարևոր է։ 

Թոքերի քաղցկեղի ախտորոշումը վաղ փուլերում ժամանակակից բժշկության գլխավոր խնդիրներից մեկն է, քանի որ թոքերում առաջացած ուռուցքների մասին հուշող ախտանշանները որպես կանոն ակնհայտ են դառնում միայն հիվանդության զարգացման ուշ փուլերում, ինչի պատճառով բուժման արդյունավետությունը նվազում է։ Սակայն Cancer Research UK բրիտանական կազմակերպության մասնագետներն այնուամենայնիվ ներկայացրել են մի քանի վաղ ախտանշան, որոնք ոչ մի դեպքում չի կարելի անտեսել։

Նման ախտանշաններից մեկը կարող է լինել խորխի կուտակումը։ Եթե այն շարունակաբար կուտակվում է ստիպելով մարդուն հազալ, ապա հակարվոր է անպայման բուժզննում անցնել։ Բանն այն է, որ նման հազն ու լորձի կուտակումը թոքերի քաղցկեղի մասին հուշող ամենատարածված ախտանշաններից են։ Հատկապես վտանգավոր է խորխում արյան առկայությունը, ուստի նման դեպքերում հարկավոր է անհապաղ դիմել բժշկին։

Հազի արտասովոր փոփոխությունները ևս կարող են դասվել այս հիվանդության մասին հուշող ախտանշանների շարքին։ Առհասարակ հազը բնորոշ է շատ հիվանդություններին, սակայն թոքերի քաղցկեղի դեպքում հարկավոր է ուշադրություն դարձնել հազի փոփոխություններին, օրինակ՝ դրա հաճախականության մեծացմանը։ Բացի այդ, այս հիվանդության դեպքում հազը կարող է արտասովոր հնչողություն ունենալ կամ ուղեկցվել ցավոտ զգացողություններով։

Այնուամենայնիվ հազն ու լորձի կուտակումը միակ ախտանշանները չեն, որոնք հուշում են այս հիվանդության մասին։ Այն կարող է ուղեկցվել նաև մի շարք այլ տարածված ախտանշաններով, որոնց շարքին են դասվում շնչելիս կամ ծիծաղելիս անհանգստացնող ցավոտ զգացողությունները, կայուն հևոցը, էներգիայի մշտական պակասը և քաշի անբացատրելի կորուստը։

Չի կարելի անուշադրության մատնել նաև այն ախտանշանները, որոնք ավելի հազվադեպ են ի հայտ գալիս այս հիվանդության դեպքում։ Թոքերի քաղցկեղի մասին հուշող ոչ շատ տարածված ախտանշանների շարքին են դասվում մատների արտաքին տեսքի փոփոխությունները (կորացումը կամ մատների ծայրերի հաստացումը), կլման դժվարացումը կամ ցավը կուլ տալու ժամանակ, արտասովոր ձայներով ուղեկցվող շնչառությունը, ձայնի խռպոտացումը, դեմքի ու պարանոցի այտուցները, պարանոցի ու ուսերի երակների լայնացումը և այլն։

Ուռուցքաբանները նախազգուշացնում են, որ թոքերի քաղցկեղի զարգացման վտանգը բարձրանում է տարիքի հետ և առավել հաճախ է հանդիպում թոքերի քրոնիկ խնդիրներ (էմֆիզեմա, քրոնիկ բրոնխիտ, ֆիբրոզ և այլն) ունեցող մարդկանց մոտ, ուստի նման դեպքերում հարկավոր է առանձնահատուկ ուշադիր լինել ու կանոնավոր բուժզննում անցնել խնդիրը ժամանակին հայտնաբերելու և անհրաժեշտ միջոցները ձեռնարկելու համար։

Նյութի աղբյուրը՝ Express