Որ դեպքերում է մեջքի ցավը հուշում երիկամների հիվանդությունների մասին

Երիկամները մարդու կարևորագույն օրգաներից են, որոնց աշխատանքի խանգարումը կարող է առողջական լուրջ խնդիրների պատճառ դառնալ ու հանգեցնել մի շարք բարդությունների։ Նման խնդիրներից խուսափելու համար հարկավոր է սովորել տարբերել երիկամների հիվանդությունների մասին հուշող ախտանշանները, որոնք կօգնեն ժամանակին հայտնաբերել խանգարումն ու միջոցներ ձեռնարկել դրանցից ազատվելու համար։

Երիկամների հիվանդությունների մասին հուշող ախտանշաններից մեկը կարող են լինել մեջքի ցավերը, սակայն այս դեպքում խնդիրը հստակ տարբերակելու համար հարկավոր է ուշադրություն դարձնել դրա տեղակայմանն ու ինտենսիվությանը, քանի որ երիկամների հիվանդությունները միակ խնդիրը չեն, որոնք կարող են դրսևորվել մեջքի ցավով։ 

Ինչպես նշում են մասնագետները, մեջքի ցավերն առավել հաճախ ի հայտ են գալիս վնասվածքների հետևանքով, որոնք էլ կարող են պայմանավորված լինել կտրուկ սխալ շարժումով, ծանր իրերի բարձրացմամբ, մկանների վնասվածքներով և այլն։ Այնուամենայնիվ որոշ դեպքերում նման ցավը հուշում է շատ ավելի վտանգավոր խնդրի, օրինակ՝ երիկամների հիվանդությունների կամ վնասվածքների մասին, ինչը չի կարելի անուշադրության մատնել։

Ինչպես գրում է Express պարբերականը՝ հղում անելով Մեծ Բրիտանիայի Առողջապահության ազգային ծառայության մասնագետներին, երիկամների տեղակայման ու գոտկատեղին մոտ գտնվելու պատճառով շատերը չեն հասկանում, որ այդ հատվածի ցավը կապված է այս օրգանների աշխատանքի խանգարման հետ, ուստի վերագրում են դրանք այլ խնդիրներին։ Սակայն, այնուամենայնիվ, գոյություն ունեն հուշումներ, որոնք նախազգուշացնում են, որ մեջքի հետ կապված խնդիրները պայմանավորված են շատ ավելի լուրջ խանգարմամբ, և այդ հուշումների շարքին են դասվում ախտանշանները, ցավի տեղակայումն ու ինտենսիվությունը։

Հասկանալու համար, թե ինչով է պայմանավորված մեջքի ցավը, մասնագետները խորհուրդ են տալիս ուշադրություն դարձնել զգացողություններին։ Նրանց խոսքով՝ երիկամների հիվանդություններով պայմանավորված ցավը հիվանդներն առավել հաճախ բնութագրում են որպես մշտական բութ ցավ, որը տարածվում է ինչպես մեջքի, այնպես էլ կողերի և որովայնի հատվածում։

Բացի այդ, հարկավոր է ուշադրություն դարձնել նաև այլ ցավոտ զգացողություններին, ինչպիսին են.

• կրծքավանդակի տակ առաջացած ցավը, 
• կողային հատվածում առաջացած ցավը (սովորաբար ի հայտ է գալիս միայն մի կողմում, սակայն կարող է տարածվել նաև մյուս կողմի հատվածում),
• սուր կամ ուժգին ցավերը, որոնք պարբերաբար մեղմվում են ու ուժգնանում,
• ցայլքի հատվածում տարածվող ցավերը։

Վերոնշյալ ախտանշանների ի հայտ գալու դեպքում փորձագետները խորհուրդ են տալիս անհապաղ դիմել բժշկին ու չզբաղվել ինքնաբուժությամբ։ Մասնագետները հիշեցնում են, որ երիկամների հիվանդությունները ոչ մի դեպքում չի կարելի անտեսել, քանի որ դրանք կարող են հանգեցնել երիկամային անբավարության, ինչը կյանքի համար վտանգավոր խնդիր է։ Սա է պատճառը, որ նշված ախտանշանները նկատելուն պես հարկավոր է անհապաղ դիմել մասնագետին ու բուժզննում անցնել՝ անհրաժեշտության դեպքում սկսելով բուժումը։