Ինչ ախտանշաններով կարող է դրսևորվել օրգանիզմում խոլեստերինի բարձր մակարդակը

Հիպերխոլեստերինեմիան կամ արյան մեջ խոլեստերինի բարձր մակարդակը բավական տարածված խնդիր է 40 տարեկանից բարձր անձանց շրջանում։ Բժիշկների խոսքով՝ օրգանիզմում ցածր խտության լիպոպրոտեինների կամ «վատ» խոլեստերինի չափազանց բարձր մակարդակը կարող է շատ վտանգավոր լինել, քանի որ բարձրացնում է աթերոսկլերոզի զարգացման հավանականությունը, իսկ այս հիվանդությունը բնորոշվում է անոթներում խոլեստերինային վահանիկների կուտակմամբ ու անոթների պատերի կարծրացմամբ։ Այս խանգարումն իր հերթին բարձրացնում է կյանքի համար վտանգավոր սրտանոթային ախտաբանությունների, այդ թվում զարկերակային գերճնշման, սրտի նոպայի ու գլխուղեղի կաթվածի հավանականությունը, ուստի հարկավոր է առաջին հերթին կանխել դրա զարգացումը՝ վերահսկողության տակ պահելով օրգանիզմում խոլեստերինի մակարդակը։

Այս ցուցանիշը վերահսկողության տակ պահելու լավագույն միջոցը դրա բարձրացումը ժամանակին նկատելն ու միջոցներ ձեռնարկելն է, ուստի եվրոպական Medicover բուժհաստատությունների ցանցի ներկայացուցիչները բրիտանական Express պարբերականի հետ զրույցում ներկայացրել են այս խնդրի մասին հուշող հիմնական ախտանշանները, որոնց առկայության դեպքում հարկավոր է անպայման խորհրդակցել մասնագետի հետ ու բուժզննում անցնել։

Ինչպես նշում են բժիշկները, խոլեստերինի մակարդակի բարձրացումը սովորաբար չի ուղեկցվում վառ ախտանշաններով, ուստի խնդիրը որպես կանոն հայտնաբերվում է միայն ծայրահեղ լուրջ դեպքերում, սակայն այնուամենայնիվ նման դեպքերում լինում են որոշակի զգացողություններ, որոնք հուշում են անհապաղ բուժզննում անցնելու անհրաժեշտության մասին։ Ընդ որում՝ այդ ախտանշաններից ցանկացածի առկայությունն արդեն իսկ հուշում է, որ խոլեստերինի մակարդակը չափազանց բարձր է։

Մասնագետները ներկայացրել են խոլեստերինի մակարդակի ախտաբանական բարձրացման մասին հուշող չորս ախտանշան, որոնց առկայության դեպքում հարկավոր է շտապ խորհրդակցել թերապևտի հետ։ Դրանք են.

Ոտքերի ու ձեռքերի ցավը

Խոլեստերինի կուտակումները նպաստում են վերջույթների արյունատար անոթների լուսանցքի նեղացմանը, ինչն էլ դրսևորում է տհաճ զգացողություններով։ Նման կուտակումները տեղի են ունենում ժամանակի ընթացքում, ուստի հաճախ թվում է, որ ցավը չունի որևէ պատճառ։ Նման դեպքերում ձեռքերի կամ ոտքերի ցավը կարող է անհանգստացնել բավական երկար ժամանակ։

Հաճախակի նկատվող ծակծկոցի զգացողությունը

Խոլեստերինի բարձր մակարդակի պատճառով արյունը թանձրանում է, ինչը բացասաբար է անդրադառնում նյարդերին արյան մատակարարման գործընթացի վրա։ Այս ամենի հետևանքով ձեռքերում ու ոտքերում հաճախ է ծակծկոցի տհաճ զգացողություն առաջանում։

Կրծքավանդակի ձախ հատվածի ցավը

Նման ցավը կարող է ի հայտ գալ ժամանակ առ ժամանակ` հուշելով սրտամկանի շուրջը գտնվող արյունատար անոթների խցանման մասին։ Երբեմն տհաճ զգացողություններն ու ցավը տարածվում են ընդհուպ մինչև պարանոց, ուստի հարկավոր է շատ զգոն լինել ու անուշադրության չմատնել ախտանշանները։

Հաճախակի գլխացավերը ծոծրակի հատվածում

Գլխի հատվածի արյունատար անոթների խցանումը խոլեստերինի ավելցուկներով կարող է նպաստել ծոծրակի հատվածում ցավոտ զգացողությունների առաջացմանը։ Այս ախտանշանը մասնագետները համարում են ամենավտանգավորներից մեկը, քանի որ այդ անոթներում խոլեստերինային վահանիկների կուտակման գործընթացը չդադարեցնելու դեպքում խնդիրը կարող է ի վերջո հանգեցնել գլխուղեղի կաթվածի։

Նման խնդիրներից խուսափելու համար մասնագետները խորհուրդ են տալիս առաջին հերթին վերահսկողության տակ պահել օրգանիզմում խոլեստերինի մակարդակը, ինչպես նաև խուսափել այդ ցուցանիշի բարձրացմանը նպաստող գործոններից։ Խոլեստերինի մակարդակի վրա ազդող ամենատարածված գործոնների շարքին են դասվում ճարպակալումը, շարժումների պակասը, ծխախոտի գործածությունը, տարիքը, շաքարային դիաբետը, ինչպես նաև սննդակարգում կենդանական ծագման հագեցած ճարպերի և տարնսճարպերի գործածությունը։