Որ ախտանշաններն են հուշում երկրորդ տիպի շաքարային դիաբետի զարգացման մասին

Երկրորդ տիպի շաքարային դիաբետն ամենավտանգավոր հիվանդություններից է, որը դրսևորվում է արյան մեջ շաքարի բարձր մակարդակով։ Այս հիվանդությունը կարող է երկար ժամանակ զարգանալ առանց ակնհայտ ախտանշանների, ինչի պատճառով էլ մարդիկ այն հայտնաբերում են շատ ուշ, սակայն խնդիրն այն է, որ շաքարային դիաբետը չբուժելու դեպքում կարող են ի հայտ գալ բավական վտանգավոր խանգարումներ, այդ թվում՝ սրտամկանի, անոթների, նյարդերի, տեսողության օրգանների ու երիկամների ախտաբանություններ։

Այս հիվանդության հետևանքով զարգացող լուրջ բարդություններից խուսափելու համար հարկավոր է ժամանակ առ ժամանակ ստուգել արյան մեջ շաքարի մակարդակն ու անպայման ուշադրություն դարձնել այդ ցուցանիշի ախտաբանական բարձրացման մասին նախազգուշացնող ախտանշաններին։

Ինչպես Express պարբերականի հետ զրույցում նշել են բրիտանական Diabetes UK կազմակերպության մասնագետները, չնայած, որ երկրորդ տիպի շաքարային դիաբետը զարգանում է արյան մեջ շաքարի մակարդակի բարձրացման հետևանքով, մարդը կարող է անգամ չգիտակցել, որ գտնվում է ռիսկային խմբում և ցանկացած պահին կարող է համարվել շաքարային դիաբետով հիվանդ։ Այս վիճակն ախտորոշելը, սակայն, շատ կարևոր է, քանի որ շաքրային դիաբետն այն հիվանդություններից է, որը, ինչպես արդեն նշվել է, բարձրացնում է մի շարք այլ մահացու հիվանդությունների զարգացման հավանականությունը։ Նման խնդիրներից խուսափելու համար կազմակերպության փորձագետները ներկայացրել են այս հիվանդության առավել տարածված ախտանշանները, որոնք կարելի է հեշտությամբ նկատել։

Պոլիուրիա (շատամիզություն)

Շաքարային դիաբետի ամենատարածված ախտանշաններից մեկը սովորականից շատ մեզի արտազատումն է, որը կոչվում է պոլիուրիա։ Ինչպես նշում են մասնագետները, այս հիվանդության դեպքում օրվա ընթացքում արտազատվող մեզի քանակությունը գերազանցում է օրական երեք լիտրը։ Սա է պատճառը, որ շաքարային դիաբետով հիվանդների մոտ նկատվում են նաև քնի խանգարումներ, քանի որ պոլիուրիան ստիպում է մարդուն հաճախ արթնանալ միզապարկը դատարկելու համար։

Քաղցի զգացում

Այս հիվանդության մասին հուշող ամենատարածված ախտանշանների շարքին է դասվում նաև արտասովոր քաղցի զգացումը։ Այս դեպքում հիվանդի մոտ կարող է նկատվել քաղցի զգացում անգամ սննդի ընդունումից հետո։ Ինչպես բացատրում են մասնագետները, սա պայմանավորված է նրանով, որ այս հիվանդության ժամանակ խանգարվում է բջիջներին շաքարի մատակարարման մեխանիզմը, ինչն էլ հանգեցնում է էներգիայի մակարդակի անկման։ Արդյունքում գլխուղեղն ստանում է էներգիայի պակասի ազդանշան և այն լրացնելու համար քաղցի զգացում է առաջացնում։ Նման խանգարումների հետևանքով մարդը կարող է կրկին քաղցի զգացում ունենալ անգամ սնվելուց հետո, իսկ երբեմն այն նույնիսկ ավելի ուժգին է լինում, քան ուտելուց առաջ էր։

Ծարավի զգացում

Շաքարային դիաբետի մյուս տարածված ախտանշանն անհագ ծարավն է, որը տանջում է հիվանդին անգամ մեծ քանակությամբ հեղուկ օգտագործելու դեպքում։ Սակայն մասնագետները նախազգուշացնում են, որ մեծ քանակությամբ հեղուկի գործածությունն ու ծարավի զգացումը ոչ միշտ են պայմանավորված լինում շաքարային դիաբետով, ուստի մինչ միջոցներ ձեռնարկելը հարկավոր է անպայման ստուգել արյան մեջ շաքարի մակարդակն ու խորհրդակցել բժշկի հետ։

Անբացատրելի հոգնածություն

Երկրորդ տիպի շաքարային դիաբետի մասին հուշող ևս մի տարածված ախտանշան է սաստիկ հոգնածությունը։ Նման ախտանշանն ի հայտ է գալիս էներգիայի պակասի պատճառով, ինչն էլ պայմանավորված է լինում էներգիայի արտադրության համար անհրաժեշտ շաքար չստանալով։ Ինչպես նշում են մասնագետները, երկրորդ տիպի շաքարային դիաբետի դեպքում մարդը կարող է բավական երկար քնել, սակայն միևնույն ժամանակ նա կարթնանա հոգնած ու ինչպես հարկն է չհանգստացած, ուստի հարկավոր է զգոն լինել ու անուշադրության չմատնել նման ախտանշանը։

Այնուամենայնիվ Diabetes UK կազմակերպության փորձագետները նախազգուշացնում են, որ մշտական հոգնածության զգացումը լուրջ պատճառ է մասնագետին դիմելու ու բուժզննում անցնելու համար, քանի որ այն կարող է պայմանավորված լինել ոչ միայն շաքարային դիաբետով, այլև մի շարք այլ վտանգավոր հիվանդություններով, որոնք անուշադրության մատնելը կարող է անդառնալի հետևանքներ ունենալ։