Մասնագետները ներկայացրել են երկու արտասովոր ախտանշան, որոնք կարող են հուշել ռևմատոիդ արթրիտի մասին

Ռևմատոիդ արթրիտն աուտոիմունային հիվանդություն է, որի դեպքում մարդու իմունային համակարգը սխալմամբ հարձակվում է առողջ հյուսվածքների, մասնավորապես, հոդերի առողջ լորձաթաղանթի վրա՝ առաջացնելով բորբոքումներ ու սաստիկ ցավեր։ Այս հիվանդության դեպքում բորբոքված լորձաթաղանթը հաստանում է, ինչը բացասաբար է անդրադառնում հոդի արտաքին տեսքի վրա՝ ուղեկցվելով սաստիկ ցավով։ Ընդ որում՝ առավել հաճախ ախտահարվում են ձեռքերի, ծնկների, կոճերի հատվածների հոդերը։

Այս հիվանդության տհաճ ախտանշանները ժամանակին մեղմելու համար այն հարկավոր է օր առաջ ախտորոշել, մինչդեռ ռևմաոիդ արթրիտի ախտորոշումն այդքան էլ հեշտ չէ։ Երբեմն մարդիկ ուշադրություն չեն դարձնում այս հիվանդության հիմնական դրսևորումներին՝ համարելով դրանք անկարևոր, սակայն կան ռևմատոիդ արթրիտի մասին հուշող ախտանշաններ, որոնք ոչ մի դեպքում չի կարելի անտեսել։

Բրիտանական Versus Arthritis բարեգործական կազմակերպության մասնագետները Express պարբերականի հետ զրույցում ներկայացրել են երկու արտասովոր ախտանշան, որոնք կարող են հուշել ռևմատոիդ արթրիտի մասին։ Այս ախտանշաններն առաջին հայացքից կարող են որևէ կապ չունենալ այս ախտաբանության հետ, ուստի մարդիկ հաճախ վերագրում են դրանք այլ խնդիրներին, սակայն մասնագետները հորդորում են շատ զգոն լինել ու ոչ մի դեպքում չանտեսել անգամ ամենից անկարևոր թվացող ախտանշանը։

Ինչպես նշում են բժիշկները, ռևմատոիդ արթրիտը կարող է չափազանց տհաճ ու ցավոտ հիվանդություն լինել, որն առաջացնում է հոդերի այտուցներ ու դառնում դրանց շարժումների կաշկանդվածության պատճառ։ Ընդ որում՝ այս զգացողություններն առավել ակնհայտ են լինում առավոտյան կամ երկարատև հանգստից հետո։

Այս հիվանդությունը սովորաբար զարգանում է միջին տարիքում և առավել հաճախ ախտահարում է կանանց, սակայն նման միտման պատճառները մասնագետները դեռ չեն պարզել։ Որպես կանոն այն ասոցացվում է միայն հոդացավերի ու տհաճ զգացողությունների հետ, սակայն Versus Arthritis կազկակերպության փորձագետների խոսքով՝ ռևմատոիդ արթրիտը կարող է դրսևորվել նաև այնպիսի արտասովոր ախտանշաններով, ինչպիսին են աչքերի չորությունն ու կրծքի ցավը։

«Այս ախտանշանները պայմանավորված են լինում բորբոքմամբ, որը կարելի է բուժել հնարավորինս շուտ բժշկի մոտ այցի գրանցվելու դեպքում։ Ռևմատոիդ արթրիտի վաղ ախտորոշումը թույլ է տալիս սկսել բուժում, որի դեպքում մեծ է հավանականությունը, որ հիվանդության ցավոտ ու ծանր դրսևորումները վերահսկողության տակ կվերցվեն», - նշում են մասնագետները։

Միևնույն ժամանակ բժիշկները հորդորում են ուշադրություն դարձնել նաև այլ ախտանշաններին ու ինքնազգացողության փոփոխություններին, որոնք կարող են հուշել այս խնդրի մասին։ Մասնագետների խոսքով՝ հարկավոր է ուշադրություն դարձնել այնպիսի խնդիրներին, ինչպիսին են հոգնածությունը, ախորժակի վատթարացումը, քաշի կորուստը, բարձր ջերմությունն ու առատ քրտնարտադրությունը, քանի որ դրանք ևս կարող են պայմանավորված լինել ռևմատոիդ արթրիտով։

Մասնագետները հիշեցնում են, որ այս հիվանդությունն աուտոիմունային է և դրա լիարժեք բուժման միջոց առ այսօր չկա, ուստի կանխարգելիչ միջոցների ձեռնարկումը շատ կարևոր է։ Ռևմատոիդ արթրիտի զարգացման հավանականությունը նվազեցնելու համար հարկավոր է առաջին հերթին նվազագույնի հասցնել այն ռիսկային գործոնները, որոնք կարող են հանգեցնել նման խնդրի զարգացման։ Այդ ռիսկային գործոնների շարքին են դասվում ավելորդ քաշը, ծխախոտի գործածությունն ու մեծ քանակությամբ կարմիր մսի գործածությունը, ուստի դրանք հարկավոր է պահել վերահսկողության տակ։

«Սա նշանակում է, որ առողջ քաշի պահպանման, չծխելու և կարմիր մսի գործածությունը նվազեցնելու դեպքում հիվանդության զարգացման հավանականությունը նվազում է», - եզրափակում են մասնագետները։