Մասնագետը նշել է՝ որոնք են սրտամկանի ինֆարկտի մասին նախազգուշացնող առաջին ախտանշանները

Սրտանոթային համակարգի հիվանդությունները համարվում են ամբողջ աշխարհում մարդկանց վաղաժամ մահվան հիմնական պատճառներից մեկը, ինչը պայմանավորված է նրանով, որ դրանք հաճախ ախտահարում են մարդու կարևորագույն օրգաններից մեկը՝ սրտամկանը, և հազվադեպ են ախտորոշվում ժամանակին։

Այս համակարգի առավել վտանգավոր հիվանդություններից մեկը սրտամկանի ինֆարկտն է, որը յուրաքանչյուր տարի հազարավոր մարդկանց մահվան ու հաշմանդամության պատճառ է դառնում։ Նման հետևանքներից խուսափելու համար հանրահայտ ռուս բժիշկ ու հաղորդավար Ալեքսանդր Մյասնիկովը ներկայացրել է այն ախտանշանները որոնք առաջինն են ի հայտ գալիս սրտամկանի ինֆարկտի դեպքում՝ օգնելով ժամանակին արձագանքել ու միջոցներ ձեռնարկել։ Ընդ որում՝ մասնագետը հորդորում է հատկապես զգոն լինել կանանց, քանի որ նրանց մոտ այս հիվանդությունը կարող է բավական արտասովոր ախտանշաններով դրսևորվել։

Ինչպես նշում է բժիշկը, շատերը կարծում են, որ «դասական» սրտամկանի ինֆարկտը դրսևորվում է սուր ցավով ու մահվան ելք է ունենում, մինչդեռ իրականում այս պնդումը չի համապատսախանում իրականությանը։ Այս հիվանդությունն ունենում է որոշակի նախանշաններ, որոնք թույլ են տալիս ժամանակին նկատել վտանգը, ուստի բավական ուշադիր լինելու դեպքում կարելի է խուսափել լուրջ բարդություններից։

Մյասնիկովի խոսքով՝ սրտամկանի ինֆարկտի մասին հուշող առաջին ախտանշանների շարքին են դասվում դժվարացած շնչառությունը, անսպասելի հևոցն ու հազը։ Ավելին՝ հիվանդի մոտ կարող է նկատվել թուլության անսպասելի նոպա, ինչը չի կարելի անտեսել։ Բացի այդ, սրտամկանի ինֆարկտի մասին է հուշում նաև անբացատրելի սառը քրտինքը, ուստի նման ախտանշանների առկայության դեպքում հարկավոր է անհապաղ շտապօգնություն կանչել։

Սրտամկանի ինֆարկտի մասին կարող է հուշել նաև ատամի ցավը, ուստի հաճախ են լինում դեպքեր, երբ ատամնաբույժները բուժզննումից հետո հիվանդներին ուղղորդում են սրտաբանի մոտ։ Բացի այդ, երբեմն սրտամկանի ինֆարկտի մասին է հուշում անգամ մատի ցավը, ինչը շատերն անտեսում են։

Շաքարային դիաբետով հիվանդ կանանց մասնագետը հորդորում է էլ ավելի զգոն լինել, քանի որ նրանց մոտ դասական համարվող ցավը սրտամկանի հատվածում շատ ավելի հազվադեպ է հանդիպում, քան տղամարդկանց մոտ։ Բացի այդ, կանանց դեպքում ցավն ու տհաճ զգացողություններն առավել հաճախ տեղակայվում են որովայնի հատվածում և ուղեկցվում գխտոցով։

Միևնույն ժամանակ մասնագետը նաև հորդորում է հիշել, որ այս հիվանդությունը կարող է առհասարակ չուղեկցվել որևէ ախտանշանով, ուստի անհրաժեշտ է շատ ուշադիր լինել և պարբերաբար բուժզննում անցնել խնդիրը ժամանակին հայտնաբերելու համար։

Նյութի աղբյուրը՝ actualnews.org