Մասնագետները ներկայացրել են վեց ախտանշան, որոնք հուշում են զարկերակային ճնշման բարձրացման մասին

Զարկերակային բարձր ճնշումը ներկայում ամենավտանգավոր ու տարածված առողջական խնդիրներից մեկն է, որը զգալիորեն բարձրացնում է սրտանոթային համակարգի աշխատանքի այլ լուրջ խանգարումների, այդ թվում՝ սրտի նոպաների, գլխուղեղի կաթվածի ու անոթալայնանքի, ինչպես նաև կոգնիտիվ գործառույթների թուլացման ու երիկամային անբավարարության զարգացման հավանականությունը։ Նման խնդրի դեպքում հարկավոր է անպայման միջոցներ ձեռնարկել ու պահել արյան ճնշումը մշտական վերահսկողության տակ, քանի որ այդ ցուցանիշի հաճախակի տատանումները կարող են շատ վտանգավոր լինել, սակայն հիվանդությունը վերահսկողության տակ պահելու և բարդացումներից խուսափելու համար հարկավոր է առաջին հերթին այն ժամանակին ախտորոշել։

Զարկերակային գերճնշումը դասվում է այն հիվանդությունների շարքին, որոնք մարդիկ հազվադեպ են ժամանակին նկատում, ինչի պատճառով էլ այն ախտորոշվում է բավական ուշ։ Սա պայմանավորված է նրանով, որ հիվանդությունը կարող է զարգանալ առանց ակնհայտ ախտանշանների, իսկ առկա ախտանշաններն էլ հաճախ չեն վերագրվում այս խանգարմանը։ Սակայն ամերիկացի գիտնականները ներկայացրել են վեց ախտանշան, որոնք կարող են հուշել արյան ճնշման բարձրացման ու անհապաղ մասնագետին դիմելու անհրաժեշտության մասին։

Բժիշկների խոսքով՝ զարկերակային ճնշման ախտաբանական բարձրացման մասին հուշող ախտանշանները կարող են շատ ակնհայտ չլինել, սակայն դրանք խիստ բացասաբար կանդրառնան ինքնազգացողության վրա, ուստի հարկավոր է շատ ուշադիր լինել։ Զարկերակային ճնշման ցուցանիշները համարվում են բավական բարձր, երբ հասնում են 180/120 մմ/սս-ը։ Նման բարձր զարկերակային ճնշման դեպքում մասնագետները խորհուրդ են տալիս անհապաղ դիմել բժշկին, քանի որ այս խնդիրը խիստ բացասաբար է անդրադառնում մարդու օրգանիզմի վրա և բարձրացնում է սրտի և անոթների լուրջ հիվանդությունների զարգացման հավանականությունը։

Զարկերակային ճնշման կրիտիկական բարձրացումը կարող է դրսևորվել որոշակի ախտանշաններով, որոնց առկայության դեպքում հարկավոր է անհապաղ չափել ճնշումն ու միջոցներ ձեռնարկել այն կարգավորելու համար։ Այդ ախտանշանների շարքին են դասվում կրծքավանդակի ցավը, սաստիկ գլխացավը և ոտեքրի ու ձեռքերի թմրածությունը կամ թուլությունը։ Բացի այդ, հիվանդը կարող է գանգատվել նաև տեսողության աղոտացումից, հևոցից ու խոսքի վատթարացումից, ուստի նման խնդիրները ևս չի կարելի անտեսել։

Զարկերակային ճնշման բարձրացումը կարող է շատ վտանգավոր լինել, ուստի հաճախակի նկատվող նման խնդրի դեպքում հարկավոր է շատ զգոն լինել ու ժամանակին դիմել մասնագետին։ Նման դեպքերում ճնշման տատանումների հավանականությունը նվազեցնելու և ինքնազգացողության վատթարացումը կանխելու համար մասնագետները սովորաբար խորհուրդ են տալիս որոշակի փոփոխություններ անել սննդակարգում ու մեծացնել ֆիզիկական ակտիվությունը։

Նյութի աղբյուրը՝ actualnews.org