Պարզ ու արդյունավետ բնական միջոցներ հարբուխը բուժելու համար. չորս փորձված բաղադրատոմս

Հարբուխը (մրսածություն) ամենատարածված հիվանդություններից մեկն է, որը սովորաբար սեզոնային բնույթ է կրում, սակայն այնուամենայնիվ կարող է ի հայտ գալ տարվա ցանկացած եղանակին։ Շատ հաճախ մարդիկ պարզապես անուշադրության են մատնում այս հիվանդությունը՝ շարունակելով վարել սովորական կենսակերպ, քանի որ որպես կանոն հարբուխը բուժվում է առանց որևէ միջամտության ընդամենը մի քանի օրում, սակայն միևնույն ժամանակ այն կարող է դրսևորվել բավական տհաճ ախտանշաններով ու խիստ բացասաբար անդրադառնալ մարդու կյանքի որակի վրա, ուստի մասնագետները խորհուրդ են տալիս անպայման միջոցներ ձեռնարկել հիվանդության տհաճ դրսևորումները մեղմելու համար:

Հարբուխի ախտանշաններից ազատվելու համար մարդիկ հաճախ ընդունում են հատուկ դեղամիջոցներ, սակայն մասնագետները վստահ են, որ խնդրի դեմ կարելի է պայքարել նաև բնական միջոցներով, որոնք շատ ավելի անվտանգ են ու հասանելի։ Ավելին այս բնական միջոցներն իրենց արդյունավետությամբ չեն զիջում դեղորայքին, իսկ որոշ դեպքերում կարող են անգամ ավելի արդյունավետ լինել, ուստի մինչ դեղատնային միջոցներ կիրառելը կարելի է նախ փորձել բուժվել դրանց օգնությամբ։

Ձեր ուշադրությանն ենք ներկայացնում լավագույն բնական միջոցները, որոնք կօգնեն հեշտությամբ մեղմել այս հիվանդության տհաճ դրսևորումները և զգալիորեն կարագացնեն ապաքինման գործընթացը։

• 100 մլ կագոր գինին մի փոքր տաքացնել, ավելացնել ¼ թեյի գդալ աղացած սև պղպեղ ու 1 թեյի գդալ մեղր, լավ խառնել ու խմել ստացված խառնուրդը քնելուց առաջ։ Այս դեղամիջոցը հարկավոր է ընդունել գոլ վիճակում։
• Կիտրոնը մեկ րոպե ընկղմել տաք ջրի մեջ, այնուհետև առանց կեղևազրկելու մսաղացով մանրացնել, ավելացնել 2 ճաշի գդալ մեղր ու լավ խառնել։ Ստացված խառնուրդը հարկավոր է ընդունել յուրաքանչյուր 2–3 ժամը մեկ մեկական ճաշի գդալ։
• Մի բաժակ կաթը եռացնել, ավելացնել մի պտղունց դարչին, երկու հատ մեխակ ու մեկ-երկու հատ սև պղպեղ։ Լցնել խառնուրդը թերմոսի մեջ ու թրմել 20-30 րոպե։ Ստացված դեղամիջոցը հարկավոր է խմել մանր կումերով։
• Խառնել հավասար քանակությամբ սև հաղարջի ու ազնվամորու հատապտուղները, այնուհետև 3:1 հարաբերակցությամբ շաքար ավելացնել ու տրորել հատապտուղները մինչև ստացվի համասեռ խյուսանման զանգված։ Ստացված խառնուրդի 2 ճաշի գդալին ավելացնել կես լիտր եռման ջուր, թրմել 10 րոպե, այնուհետև խմել ստացված ըմպելիքն օրվա ընթացքում։ Այս ըմպելիքը հարկավոր է խմել գոլ վիճակում։ Ընդ որում՝ այն պատրաստելու համար կարելի է կիրառել ինչպես թարմ հատապտուղներ, այնպես էլ սառեցված։

Այս բնական միջոցները շատ արդյունավետ են հիվանդության զարգացման սկզբնական շրջանում տհաճ զգացողությունները մեղմելու համար, սակայն հարկ է հիշել, որ առողջական լուրջ խնդիրների դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, երբեմն մրսածությանը բնորոշ ախտանշանները պայմանավորված են լինում շատ ավելի վտանգավոր հիվանդութուններով, որոնց դեմ անհապաղ միջոցներ չձեռնարկելը կարող է շատ լուրջ հետևանքներ ունենալ։ Նման խնդիրներից խուսափելու համար հարկավոր է անպայման խորհրդակցել բժշկի հետ, քանի որ միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru