Ինչպես նվազեցնել թուլամտության զարգացման հավանականությունը. 7 պարզ խորհուրդ

13:58 • 08.02.21

Թուլամտությունը (դեմենցիա) շատ վտանգավոր անբուժելի խանգարում է, որի զարգացման հավանականությունը հնարավորինս նվազեցնելը շատ կարևոր է։ Առհասարակ գլխուղեղի աշխատանքի խանգարումները կարող են անդառնալի հետևանքներ ունենալ ու լուրջ խնդիրների հանգեցնել, ուստի հարկավոր է ժամանակին միջոցներ ձեռնարկել դեմենցիայի զարգացումից խուսափելու համար։

Մասնագետների խոսքով՝ մարդու գլխուղեղի ակտիվությունը տարիների ընթացքում անխուսափելիորեն նվազում է, ինչը էլ բարձրացնում է թուլամտության զարգացման հավանականությունը, սակայն ճիշտ մոտեցում ցուցաբերելու դեպքում այդ գործընթացը կարելի է զգալիորեն դանդաղեցնել ու խուսափել վտանգավոր բարդություններից:

Ինչպես գրում է բրիտանական Express պարբերականը, այս լուրջ խանգարման զարգացումից խուսափելու համար բժիշկ-սննդաբան Հաննա Բրեյը խորհուրդ է տալիս հետևել մի քանի պարզ կանոնի ու որոշ փոփոխություններ անել կենսակերպում, ուստի ձեր ուշադրությանն ենք ներկայացնում յոթ արդյունավետ խորհուրդ, որոնք կօգնեն դանդաղեցնել գլխուղեղի աշխատանքի վատթարացման գործընթացն ու կանխել դեմենցիայի զարգացումը:

Հետևել միջերկրածովյան սննդակարգի սկզբունքներին

Բրեյի խոսքով՝ միջերկրածովյան սննդակարգը, որը բնորոշվում է մեծ քանակությամբ մրգերով, բանջարեղենով, օմեգա-3 ճարպաթթուներ պարունակող տարատեսակ ձկնատեսակներով ու ձիթայուղով հարուստ մթերքի գործածությամբ, բարենպաստ ազդեցություն է ունենում գլխուղեղի վրա, ինչը բազմիցս ապացուցվել է տարատեսակ հետազոտությունների միջոցով:

Հակաօքսիդանտներով հարուստ մթերքի գործածություն

Մարդու գլխուղեղը խոցելի է ազատ ռադիկալների ու թթվայնացնող սթրեսի անբարենպաստ ազդեցության նկատմամբ, մինչդեռ հակաօքսիդանտներն օգնում են չեզոքացնել այդ գործոնները: Գլխուղեղը պաշտպանելու համար բժիշկը խորհուրդ է տալիս հարստացնել սննդակարգը հակաօքսիդանտներով հարուստ մթերքով, այդ թվում՝ տարբեր մուգ գույների կեղև ունեցող մրգերով ու բանջարեղենով:

Դարչնի գործածություն

Այս համեղ ու օգտակար համեմունքն օգնում է բալանսավորել արյան մեջ շաքարի մակարդակն ու այդ կերպ նվազեցնում է նաև գլխուղեղի կաթվածի հավանականությունը, իսկ այս գործոնները խիստ բացասաբար են անդրադառնում գլխուղեղի վրա՝ վնասելով օրգանի բջիջները:

Ֆերմենտացված մթերքի գործածություն

Մասնագետը խորհուրդ է տալիս սննդակարգում նաև ֆերմենտավորված մթերք ներառել, ուստի կարելի է հարստացնել ամենօրյա սննդակարգը բնական յոգուրտով, կեֆիրով, թթու կաղամբով ու թեյի սնկով:

Ցինկով հարուստ մթերքի գործածություն

Այս հանքանյութով հարուստ սննդամթերքի գործածությունը համարվում է ամենաօգտակար առօրյա սովորություններից մեկը: Բրեյի խոսքով՝ ցինկն օգնում է նվազեցնել թուլամտության զարգացման հավանականությունը, ինչը պայմանավորված է նրանով, որ այն պաշտպանում է նեյրոնային բջիջներն օքսիդացնող սթրեսի կործանարար ազդեցությունից:

12-ժամյա ընդմիջումներ

Գլխուղեղի աշխատանքի համար օգտակար սովորությունների շարքին է դասվում նաև ժամանակ առ ժամանակ 12 ժամ սննդից հրաժարվելու սովորությունը: Նման դեպքերում մասնագետները խորհուրդ են տալիս ընթրել մինչ 20:00-ն և նախաճաշել առավոտյան 8:00-ից հետո: Նման ընդմիջումները դրական ազդեցություն են ունենում գլխուղեղի վրա և մաքրում են օրգանի հյուսվածքները անպետք վնասակար նյութերից:

Զբոսանք մաքուր օդին

Բժիշկը հորդորում է առօրյա սովորություններից մեկը դարձնել նաև մաքուր օդին զբոսնելը: Հետազոտությունները ցույց են տվել, որ նման զբոսանքներն արդյունավետ կերպով խթանում են գլխուղեղի արյան հոսքն ու արյան շրջանառությունը՝ նպաստելով կոգնիտիվ գործառույթների բարելավմանը: