9 ախտանշան, որոնք հուշում են կանանց մոտ հորմոնալ դիսբալանսի մասին

Հորմոնալ ֆոնի կայունությունը շատ կարևոր է ամբողջ օրգանիզմի համար, քանի որ այս կամ այն հորմոնի մակարդակի ախտաբանական բարձրացումը կամ նվազումը կարող է լուրջ խանգարումների պատճառ դառնալ՝ հանգեցնելով ինքնազգացողության վատթարացման: Միևնույն ժամանակ հորմոնալ դիսբալանսն ամենատարածված խանգարումներից մեկն է, որը հատկապես հաճախ է հանդիպում կանանց շրջանում և ժամանակին միջոցներ չձեռնարկելու դեպքում կարող է շատ վտանգավոր հետևանքներ ունենալ:

Նման խնդիրներից խուսափելու համար հարկավոր է սովորել տարբերել դրա մասին հուշող ախտանշանները, ուստի բժիշկ-գինեկոլոգ Յուլիա Ժելտոնոժսկայան ներկայացրել է դրանցից հիմնականները: Այս ախտանշաններն իմանալը թույլ կտա ժամանակին հայտնաբերել դիսբալանսը և անհապաղ միջոցներ ձեռնարկել խնդիրը կարգավորելու և հնարավոր բարդություններից խուսափելու համար:

Մասնագետի խոսքով՝ կանանց օրգանիզմում հորմոնների ավելցուկը կամ դեֆիցիտը կարող է տարատեսակ բացասական փոփոխությունների պատճառ դառնալ, ուստի այն ոչ մի դեպքում չի կարելի անուշադրության մատնել: Առաջին հերթին բժիշկը խորհուրդ է տալիս ուշադրություն դարձնել քաշի անկառավարելի ավելացմանը կամ նվազմանը, ինչը չի ունենում որևէ պատճառ: Խոսքը որովայնի հատվածում ճարպաշերտերի կուտակման կամ նվազման մասին է, որի դեպքում հարկավոր է ստուգել արյան մեջ տեստոստերոնի, ինսուլինի, կորտիզոլի և էստրոգենի մակարդակները, քանի որ այս հորմոնների մակարդակի բարձրացումը հանգեցնում է ախորժակի մեծացման:

Չի կարելի անտեսել նաև քնի խանգարումները, քանի որ դրանք ևս կարող են հուշել հորմոնալ դիսբալանսի մասին: Սա կարող է պայմանավորված լինել պրոգեստերոն հորմոնի դեֆիցիտով, քանի որ այս հորմոնը պատասխանատու է հանգստացման ու քնի կարգավորման համար:

Հորմոնալ դիսբալանսի մասին հուշող մյուս ախտանշանը բշտիկների առկայությունն է, որը հուշում է անդրոգենների մակարդակի բարձրացման մասին: Բացի այդ, հորմոնալ դիսբալանսը կարող է հանգեցնել նաև գլխացավերի առաջացման, ուստի այս ախտանշանը ևս չի կարելի անտեսել:

Մասնագետի խոսքով՝ հորմոնալ խանգարման մասին կարող է հուշել նաև առատ քրտնարտադրությունը, ինչպես նաև քրոնիկ հոգնածությունը, որը պայմանավորված է լինում վահանագեղձի ախտաբանություններով: Մյուս ախտանշանը ստամոքսի ու աղիների հետ կապված խնդիրներն են, որոնց պատճառն օրգանիզմում էստրոգենների ավելցուկն է լինում: Բացի այդ, չի կարելի անուշադրության մատնել նաև հիշողության վատթարացումը, քանի որ այս խնդիրը կարող է զարգանալ էստրոգենի ու պրոլակտինի դեֆիցիտի ֆոնին:

Կանանց մոտ հորմոնալ դիսբալանսի մասին հուշող վերջին տարածված ախտանշանը մազաթափությունն է, որը կարող է լուրջ բարդույթների զարգացման պատճառ դառնալ: Նման դեպքերում հարկավոր է անպայման ստուգել տղամարդկանց օրգանիզմին բնորոշ հորմոնի՝ տեստոստերոնի մակարդակը:

Նյութի աղբյուրը՝ actualnews.org