4 արդյունավետ բնական միջոց ռինիտի տհաճ դրսևորումներից ազատվելու համար

18:14 • 09.02.21

Քթաբորբը կամ ռինիտը բավական տարածված խնդիր է, որը կարող է ի հայտ գալ տարբեր պատճառներով և ցանկացած պահին։ Որպես կանոն այս խնդիրն ասոցացվում է շնչառական համակարգի հիվանդություների հետ, մինչդեռ իրականում քթաբորբը կարող է պայմանավորված լինել մի շարք պատճառներով, ինչը նշանակում է, որ խնդրից ազատվելու համար հարկավոր է առաջին հերթին պարզել դրա առաջացման պատճառն ու պայքարել դրա դեմ։

Այնուամենայնիվ, անկախ խնդրի առաջացման պատճառից հարկավոր է հնարավորինս արագ վերականգնել նորմալ շնչառությունը, քանի որ ռինիտը խիստ բացասաբար է անդրադառնում կյանքի որակի վրա: Այս խնդրի տհաճ ախտանշաններից ազատվելու համար մարդիկ հաճախ ընդունում են հատուկ դեղամիջոցներ, սակայն մասնագետները վստահ են, որ խնդրի դեմ կարելի է պայքարել նաև բնական միջոցներով, որոնք շատ ավելի անվտանգ են ու հասանելի։ Ավելին՝ այս բնական միջոցներն իրենց արդյունավետությամբ չեն զիջում դեղորայքին, իսկ որոշ դեպքերում կարող են անգամ ավելի արդյունավետ լինել, ուստի մինչ դեղատնային միջոցներ կիրառելը կարելի է նախ փորձել բուժվել դրանց օգնությամբ։

Ձեր ուշադրությանն ենք ներկայացնում լավագույն բնական միջոցները, որոնք կօգնեն հեշտությամբ մեղմել ռինիտի տհաճ դրսևորումներն ու կվերականգնեն շնչառությունը:

1 ճաշի գդալ գազարի հյութին ավելացնել 1 թեյի գդալ ձիթայուղ ու ստացված խառնուրդը կաթեցնել քթանցքերի մեջ: Յուրաքանչյուր քթանցի մեջ հարկավոր է կաթեցնել 2-3 կաթիլ խառնուրդ: Այս պրոցեդուրան հարկավոր է կրկնել օրական 3-5 անգամ:
Քթաբորբի առաջին իսկ ախտանշանների ի հայտ գալու դեպքում հարկավոր է քթի լորձաթաղանթին թարմ կալանխոեի հյութ քսել: Այս պրոցեդուրան հարկավոր է կրկնել օրական 2-3 անգամ:
Կարելի է նաև կիրառել բուժիչ խառնուրդ, որը պատրաստելու համար հարկավոր է կես բաժակ բուսական յուղը տաք գոլորշու վրա մի փոքր տաքացնել, այնուհետև ավելացնել 1 ճաշի գդալ թարմ գազարի հյութ ու 3 կաթիլ սխտորի հյութ: Ստացված խառնուրդն անհրաժեշտ է կաթեցնել քթանցքերի մեջ՝ յուրաքանչյուրին մի քանի կաթիլ:
Շատ արդյունավետ կարող է լինել նաև ճակնդեղի հյութը: Այն հարկավոր է 1:1 հարաբերակցությամբ խառնել ջրին ու օրական 2-3 անգամ կաթեցնել քթանցքերի մեջ:

Այս բնական միջոցները շատ պարզ են ու արդյունավետ, սակայն հարկ է հիշել, որ նման միջոցները կարելի է կիրառել միայն մասնագետի հետ խորհրդակցելուց հետո, քանի որ ինքնաբուժությունը կարող է շատ վտանգավոր լինել ու լուրջ բարդություններ առաջացնել: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru