Առողջական ինչ խնդիրներով կարող է պայմանավորված լինել բերանի խոռոչի տհաճ հոտը

Բերանի խոռոչի տհաճ հոտը շատ լուրջ խնդիր է, որը կարող է մի շարք բարդույթների զարգացման պատճառ դառնալ՝ բացասաբար անդրադառնալով կյանքի որակի վրա։ Բերանի խոռոչի տհաճ հոտի դեպքում մարդիկ փորձում են տարբեր միջոցներով թարմացնել շնչառությունն ու քողարկել տհաճ հոտը կամ պարզապես ուշադրություն չեն դարձնում այս տհաճ, սակայն անվնաս թվացող խնդրին, մինչդեռ այն կարող է պայմանավորված լինել տարբեր պատճառներով, այդ թվում նաև բավական լուրջ առողջական խնդիրներով։ 

Նման տհաճ հոտի դեպքում վտանգավոր հետևանքներից խուսափելու համար հարկավոր է իմանալ, թե առողջական որ խնդիրներն են դրսևորվում այս ախտանշանով, ուստի բժիշկ-ներզատաբան Զուխրա Պավլովան իր ինստագրամյան էջում նշել է այն խանգարումները կարող են դառնալ բերանի խոռոչի տհաճ հոտի պատճառ:

Այս խնդիրը որպես կանոն ասոցացվում է ստոմատոլոգիական խնդիրների հետ, մինչդեռ տհաճ հոտի պատճառ կարող են դառնալ նաև ներքին օրգանների որոշ թաքնված հիվանդություններ, որոնք մարդիկ հազվադեպ են կապում բերանի խոռոչի տհաճ հոտի հետ: Բժիշկ Զուխրա Պավլովայի խոսքով՝ բերանի խոռոչի տհաճ հոտով դրսևորվող հիվանդությունների շարքին են դասվում շնչուղիների վարակները, մասնավորապես, բրոնխոէկտազը (բրոնխալայնանք), որի դեպքում բորբոքվում են բրոնխների պատերը:  Բացի այդ, բերանի խոռոչի տհաճ հոտի պատճառ կարող է դառնալ նաև երիկամային անբավարարությունը, որի դեպքում հոտը նման է լինում ձկան հոտին:

Մյուս խանգարումը, որը կարող է դրսևորվել բերանի խոռոչի տհաճ հոտով, դիաբետիկ կետոացիդոզն է, որը վկայում է շաքարային դիաբետի զարգացմամբ պայմանավորված անբարենպաստ գործընթացների մասին: Նման դեպքերում խնդիրը դրսևորվում է տհաճ մրգային քաղցր հոտով:

Եթե բերանի խոռոչի հոտը նման է լինում ամոնիակի հոտին, ապա հարկավոր է ստուգել երիկամների վիճակը, քանի որ նման հոտը հուշում է երիկամների հիվանդությունների մասին: Բացի այդ, մասնագետը նախազգուշացնում է, որ բերանի խոռոչի տհաճ հոտը կարող է պայմանավորված լինել նաև աղեստամոքսային տրակտի հիվանդություններով, այդ թվում՝ աղեստամոքսային տրակտի օրգանների լորձաթաղանթի բորբոքմամբ, գաստրոէզոֆագիալ ռեֆլյուքսային հիվանդությամբ ու կերակրափողային բացվածքի ճողվածքով:

«Բերանի խոռոչ տհաճ հոտի դեպքում հարկավոր է առաջին հերթին դիմել ատամնաբույժին, քանի որ այս խնդրի ամենատարածված պատճառը բերանի խոռոչի լորձաթաղանթի հիվանդություններն են: Եթե բերանի խոռոչի լորձաթաղանթի հետ ամեն ինչ կարգին է, ապա հարկավոր է դիմել թերապևտին ու փնտրել այլ պատճառներ», - գրել է մասնագետը: