Որոնք են քաղցկեղի ամենահազվադեպ հանդիպող տեսակներն ու դրանց մասին հուշող ախտանշանները

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։  Սա դասվում է այն հիվանդությունների շարքին, որոնց վաղ ախտորոշումը բարձրացնում է բարեհաջող բուժման հավանականությունը, մինչդեռ շատ հաճախ մարդիկ չեն նկատում հիվանդության մասին նախազգուշացնող ախտանշանները, ինչի հետևանքով էլ այն չափազանց ուշ է հայտնաբերվում։

Այս հիվանդությունը կարող է ախտահարել գրեթե բոլոր օրգաններն ու հյուսվածքները, սակայն կան քաղցկեղի տեսակներ, որոնք շատ ավելի հազվադեպ են հանդիպում, ուստի դրանց մասին հուշող ախտանշանները շատ ավելի քչերին են հայտնի։

Մասնագետները ներկայացրել են քաղցկեղի ամենահազվադեպ հանդիպող տեսակներից մի քանիսն ու դրանց հիմնական ախտանշանները, որոնք պետք է իմանան բոլորը։

Սարկոմա

Սարկոման ուռուցքի տեսակ է, որը կարող է առաջանալ մարմնի ցանկացած հատվածում, սակայն հանդիպում է բավական հազվադեպ։ Չարորակ ուռուցքի այս տեսակի մասին հուշող ախտանշաններն իմանալը շատ կարևոր է, քանի որ հիվանդությունը ժամանակին չհայտնաբերելը կարող է շատ վատ հետևանքներ ունենալ։ Առավել հաճախ սարկոման ախտահարում է ոսկորներն ու փափուկ հյուսվածքները՝ ուղեկցվելով քրոնիկ ցավերով, այտուցներով ու նմանատիպ այլ ախտանշաններով։ Փափուկ հյուսվածքների սարկոման հայտնաբերելը բավական դժվար է, քանի որ այն կարող է ի հայտ գալ մարմնի ամենատարբեր հատվածներում, սակայն կա մի ախտանշան, որը կօգնի ժամանակին հայտնաբերել խնդիրը։ Խոսքը ցավոտ նորագոյացության մասին է, որը նկատելու դեպքում հարկավոր է անհապաղ բուժզննում անցնել։

Վահանագեղձի քաղցկեղ

Վահանագեղձն ախտահարող օնկոլոգիական հիվանդությունը ևս դասվում է հազվադեպ հանդիպող օնկոլոգիական խնդիրների շարքին։ Որպես կանոն այս խնդիրը կարելի է հեշտությամբ բուժել, սակայն բարեհաջող բուժման համար հարկավոր է հնարավորինս շուտ նկատել ախտանշաններն ու սկսել բուժումը։ Քաղցկեղի այս տեսակի մասին հուշող ախտանշանների շարքին են դասվում պարանոցի հատվածում նորագոյացությունների ի հայտ գալը, շնչառական խնդիրները, պարանոցի քրոնիկ ցավերը, մարմնի այդ հատվածում ցանի առաջացումն ու հաճախակի հազը։

Նյարդաներզատական (նեյրոէնդոկրին) քաղցկեղ

Սա քաղցկեղի ամենահազվադեպ հանդիպող տեսակներից մեկն է, որը զարգանում է յուրահատուկ բջիջներում։ Այս չարորակ նորագոյացությունն ուղեկցվում է մարմնի որոշակի հատվածում առաջացող քրոնիկ ու մշտական ցավով, պնդացումների առաջացմամբ, ինչպես նաև սրտխառնոցով ու փսխումներով։

Լիմֆոմա

Քաղցկեղի այս տեսակն առավել հաճախ ախտահարում է իմունային համակարգի բջիջները՝ լիմֆոցիտները, որոնք պայքարում են տարատեսակ վարակների դեմ և սովորաբար գտնվում են ավշային հանգույցներում ու ոսկրածուծում։ Լիմֆոմայի մասին հուշող հիմնական ախտանշանների շարքին են դասվում հաճախակի մրսածությունն ու տենդը, քաշի անսպասելի կորուստը, կայուն հոգնածությունն ու ուժգին, երբեմն էլ անտանելի ցավը։

Նյութի աղբյուրը՝ The Health Site