Որոնք են թոքերի քաղցկեղի մասին հուշող ամենատարածված ախտանշանները

Թոքերի քաղցկեղն ամենավտանգավոր ու տարածված ախտաբանություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է շատ երկար ժամանակ մնալ աննկատ, ինչի պատճառով էլ սովորաբար հայտնաբերվում է բավական ուշ, սակայն այնուամենայնիվ սա այն խնդիրներից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդութան մասին հուշող ախտանշաններն իմանալը շատ կարևոր է։ 

Քաղցկեղի այս տեսակի ախտորոշումը բավական դժվար է, քանի որ հիվանդությունը հաճախ դրսևորվում է ատիպիկ ախտանշաններով, որոնք չեն ասոցացվում թոքերի ախտահարման հետ։ Այնուամենայնիվ մասնագետները նշում են, որ բավական զգոն լինելու դեպքում կարելի է ժամանակին նկատել խնդիրն ու սկսել բուժումը։ 

Կանադական ուռուցքաբանական միության (Canadian Cancer Society) մասնագետները ներկայացրել են այս հիվանդության մասին հուշող ամենավաղ ախտանշանները, որոնք թույլ կտան հնարավորինս շուտ ախտորոշել խնդիրը և բարձրացնել բուժման արդյունավետությունը։

Ինչպես հիշեցնում են մասնագետները, այս հիվանդության մասին հուշող վառ ախտանշանների ի հայտ գալը որպես կանոն հուշում է հիվանդության զարգացման ուշ փուլերի մասին, սակայն այնուամենայնիվ գոյություն ունեն որոշ ախտանշաններ, որոնց հարկավոր է անպայման ուշադրություն դարձնել, քանի որ դրանք կարող են նախազգուշացնել թոքերում չարորակ նորագոյացությունների զարգացման մասին։

Express Health պարբերականի հետ զրույցում մասնագետները նշել են, որ թոքերի քաղցկեղի որոշ դրսևորումներ կարող են նման լինել ոչ շատ կարևոր խանգարումների դրսևորումներին, ուստի մասնագետները ներկայացրել են դրանցից ամենատարածվածները։ Այդ ախտանշանների շարքին են դասվում․

• հազը, որն աստիճանաբար ուժգնանում է կամ չի մեղմվում (մասնագետների խոսքով՝ սա թոքերի քաղցկեղի մասին հուշող ամենատարածված ախտանշանն է),
• կրծքավանդակի ցավը, որը կարող է ուժգնանալ խորը շնչելու կամ հազալու դեպքում,
• արտասովոր ձայներով ուղեկցվող շնչառությունը,
• հևոցը,
• ձայնի խռպոտությունն ու այլ փոփոխությունները,
• հազալիս խորխի մեջ արյան հետքերի առկայությունը,
• քաշի անբացատրելի նվազումը, 
• մշտական հոգնածությունը,
• կլման դժվարացումը,
• պարանոցի կամ անրակների վերին հատվածում գտնվող ավշային հանգույցների մեծացումը,
• գլխացավը,
• ոսկորների ցավերը։

Վերոնշյալ ախտանշանների ի հայտ գալը պետք է լուրջ անհանգստության պատճառ դառնա, ուստի եթե առանց որևէ պատճառի նման փոփոխություններ են նկատվում, ապա հարկավոր է անհապաղ բուժզննում անցնել։

Ուռուցքաբանները հիշեցնում են, որ թոքերի քաղցկեղի զարգացման կանխարգելման լավագույն միջոցը չծխելն է կամ ծխախոտից հրաժարվելը։ Բացի այդ, այս հիվանդության զարգացման հավանականությունը նվազում է նաև բալանսավորված սննդակարգի ու ֆիզիկական ակտիվության դեպքում, ուստի հարկավոր է շաբաթական առնվազն 150 րոպե ժամանակ տրամադրել ֆիզիկական վարժություններին ու կարգավորել սննդակարգը՝ օրական օգտագործելով առնվազն հինգ բաժին միրգ ու բանջարեղեն։