Ինչպես է օրգանիզմը հուշում շաքարի մակարդակի բարձրացման մասին

14:58 • 17.02.21

Վերահսկողության տակից դուրս եկած շաքարի մակարդակը շատ վտանգավոր խանգարում է, որը հուշում է շաքարային դիաբետի զարգացման մասին ու խիստ բացասաբար է անդրադառնում ամբողջ օրգանիզմի վրա։ Սա այն խանգարումներից է, որոնք հարկավոր է հնարավորինս շուտ ախտորոշել, քանի որ հակառակ դեպքում այն կհանգեցնի էլ ավելի լուրջ խնդիրների զարգացման։

Արյան մեջ շաքարի մակարդակի բարձրացումը ժամանակին նկատելու համար հարկավոր է ուշադրություն դարձնել օրգանիզմի տված ախտանշաններին ու ժամանակին դիմել բժշկին։ Ինչպես բացատրում են մասնագետները, արյան մեջ գլյուկոզայի պարունակությունը վերահսկվում է ինսուլինի միջոցով, որն էլ արտադրում է ենթաստամոքսային գեղձը։ Այս տարրի ոչ բավարար արտադրությունը կամ դրա նկատմամբ բջիջների անընկալունակությունը հանգեցնում է շաքարային դիաբետի զարգացման, ուստի այս հիվանդությունից խուսափելու համար հարկավոր է հետևել նաև ինսուլինի մակարդակի տատանումներին։

Ինչպես գրում է Times Now պորտալը, երբ մարմինն իր բնական մեխանիզմներով դադարում է վերահսկել շաքարի մակարդակը, օրգանիզմին լուրջ վնաս է հասցվում։ Ծայրահեղ դեպքերում սա կարող է անգամ անսպասելի մահվան պատճառ դառնալ, ուստի նման լուրջ վտանգից խուսափելու համար հարկավոր է շատ ուշադիր լինել ու հետևել օրգանիզմում տեղի ունեցող փոփոխություններին։

Այնուամենայնիվ մարդու մարմինը միշտ հուշում է օրգանիզմում շաքարի մակարդակի բարձրացման ու շաքարային դիաբետի զարգացման վտանգի մեծացման մասին և բավական ուշադիր լինելու դեպքում կարելի է ժամանակին հայտնաբերել խանգարումը։ Շաքարի բարձր մակարդակը բացասաբար է անդրադառնում ամբողջ օրգանիզմի վրա, ուստի խնդրի մասին կարող են նախազգուշացնել տարբեր օրգանները։ Ձեր ուշադրությանն ենք ներկայացնում այն հիմնական ախտանշանները, որոնցով դրսևորվում է արյան մեջ շաքարի բարձր մակարդակը։

Մաշկ

Շաքարային դիաբետը վնասում է արյունատար անոթները, ինչը բացասաբար է անդրադառնում մաշկի վիճակի վրա և կարող է դառնալ պիգմենտային հետքերի առաջացման պատճառ։ Մաշկին մուգ հետքերի առաջացումը երբեմն շաքարային դիաբետի մասին հուշող առաջին ախտանշանն է լինում, ուստի նման փոփոխությունը չի կարելի անուշադրության մատնել։

Սրտամկան

Արյան մեջ շաքարի մակարդակի բարձրացումը բացասաբար է անդրադառնում սրտանոթային համակարգի առողջության վրա։ Առհասարակ շաքարային դիաբետով հիվանդները հաճախ են բախվում սրտանոթային համակարգի հիվանդություններին, այդ թվում՝ սրտամկանի ինֆարկտին, ուստի հարկավոր է շատ զգոն լինել։

Ոտնաթաթեր

Արյան մեջ շաքարի մակարդակի բարձրացման դեպքում հաճախ է վատթարանում արյան հոսքը, ինչն էլ դառնում է նյարդերի վնասման պատճառ։ Նման վնասվածքներն էլ դրսևորվում են ոտքերի թմրածությամբ ու ծակծկոցով, ուստի նման տհաճ զգացողությունների դեպքում հարկավոր է անպայման դիմել բժշկին։

Աչքեր

Գլյուկոզայի բարձր մակարդակի կամ արդեն իսկ զարգացած շաքարային դիաբետի դեպքում բարձրանում է աչքերի տարատեսակ հիվանդությունների զարգացման ու տեսողության վատթարացման հավանականությունը։ Բանն այն է, որ այս հիվանդությունը վնասում է աչքերի ցանցաթաղանթի արյունատար անոթները, ինչը կարող է շատ վտանգավոր լինել աչքերի համար և անգամ հանգեցնել կուրության։

Երիկամներ

Շաքարային դիաբետի դեպքում առավել շատ տուժում են երիկամները, քանի որ շաքարի բարձր մակարդակը երիկամային անբավարարության ու դրա հետևանքով տհաճ ախտանշանների զարգացմանը նպաստող հիմնական գործոններից մեկն է։ Նման դեպքերում նկատվում են այնպիսի ախտանշաններ, ինչպիսին են մեզի քանակության նվազումը, այտուցները, քնի որակի վատթարացումը, ախորժակի կորուստ, սրտխառնոցը, զարկերակային ճնշման բարձրացումն ու հոգնածությունը։ Նման ախտանշանների առկայության դեպքում հարկավոր է անհապաղ միջոցներ ձեռնարկել, քանի որ երիկամների աշխատանքի խանգարումը կարող է շատ վտանգավոր լինել։