Ոտքերի այտուցները կարող են լինել լյարդի վտանգավոր հիվանդությունների մասին հուշող ախտանշան

Ոտքերի այտուցները բավական տարաված խնդիր են և կարող են պայմանավորված լինել տարբեր գործոններով։ Նման այտուցները հաճախ պայմանավորված են լինում սրտանոթային հիվանդություններով, երիկամների հիվանդություններով, մեծ քանակությամբ հեղուկի գործածությամբ ու մի շարք այլ խնդիրներով, սակայն այժմ մասնագետները պարզել են, որ այս ախտանշանով կարող են դրսևորվել նաև լյարդի վտանգավոր ախտաբանությունները, այդ թվում` լյարդի ճարպային հեպատոզն ու անգամ ցիռոզը (զարգացման վաղ փուլերում)։

Ինչպես գրում է բրիտանական Express պարբերականը` հղում անելով Քլիվլենդի կլինիկայի գիտնականներին, մասնագետները ենթադրում են, որ հեղուկի կուտակման հետևանքով այտուցված ոտքերն ու որովայնը կարող են լինել լյարդի ճարպային հիվանդության, ինչպես նաև դրա հետևանքով օրգանի հյուսվածքների սպիացման մասին հուշող ախտանշաններից մեկը։

Լյարդի ճարպային հիվանդությունն ընդհանուր տերմին է, որով բնութագրվում են բոլոր այն վիճակները, որոնց դեպքում այս օրգանում մեծ քանակությամբ ճարպ է կուտակվում։ Այս գործընթացը կարող է կապված լինել ինչպես ալկոհոլի չարաշահման հետ, այնպես էլ առհասարակ պայմանավորված չլինել ոգելից խմիչքների գործածությամբ։

«Ճարպային հեպատոզի ախտանշանները կարող են երկար ժամանակ ուշադրություն չգրավել, լինել անկարևոր ու աննկատ մնալ, սակայն զարգացման ուշ փուլերում այս վիճակը որոշակի փոփոխություններ է առաջացնում։ Լյարդի ճարպային դիստրոֆիայի մասին հուշող ախտանշաններից մեկը ոտքերի այտուցներն են», - նշում են Քլիվլենդի կլինիկայի մասնագետները։

Բժիշկները նախազգուշացնում են, որ հաճախ մարդիկ չեն նկատում խանգարման ախտանշաններն անգամ այն փուլում, երբ այն վերածվում է լյարդի ավելի վտանգավոր ախտաբանության` ցիռոզի։ Այս հիվանդությունը բնորոշվում է լյարդում սպիացած հյուսվածքների առաջացմամբ ու օրգանի գործառույթների խանգարմամբ։ Այժմ գիտնականները ենթադրում են, որ ոտքերի այտուցները կարող են լինել նաև լյարդի ցիռոզի զարգացման վաղ փուլերի մասին հուշող ախտանշաններից մեկը։

Միևնույն ժամանակ մասնագետները հորդորում են ուշադրություն դարձնել նաև լյարդի վտանգավոր ախտաբանությունների մասին նախազգուշացնող մյուս ախտանշաններին, որոնց շարքին են դասվում.

• որովայնի ցավն ու սաստիկ ճնշման զգացողությունը որովայնի վերին աջ հատվածում,
• սրտխառնոցը և քաշի ու ախորժակի կորուստը,
• մաշկի ու աչքերի սպիտակուցային թաղանթի դեղնավուն երանգը,
• սաստիկ հոգնածություն ու մտքերի խառնաշփոթը։

Վերոնշյալ ախտանշանների առկայության դեպքում անհրաժեշտ է անհապաղ դիմել թերապևտին ու բուժզննում անցնել։ Լյարդի ճարպային հեպատոզի ախտորոշման հաստատման դեպքում բժիշկները սովորաբար խորհուրդ են տալիս միջոցներ ձեռնարկել ավելորդ ճարպից ազատվելու համար։ Որպես կանոն սա ենթադրում է քաշի ընդհանուր նվազեցում, վնասակար սովորությունների բացառում, սննդակարգի կարգավորում և ֆիզիկական ակտիվության ավելացում։