Ինչ է շողացող առիթմիան և որոնք են դրա մասին հուշող հիմնական ախտանշանները

Նախասրտերի ֆիբրիլյացիան կամ շողացող առիթմիան ամենատարածված սրտանոթային հիվանդություններից մեկն է, որը դրսևորվում է սրտի զարկերի արագացմամբ։ Այս խանգարումը պայմանավորված է լինում թոքային երակից սրտամկանի ձախ փորոքին փոխանցվող էլեկրտական իմպուլսներով, ինչի հետևանքով սրտամկանի զարկերն արագանում են։ Նման նոպաների դեպքում սրտամկանը կարող է րոպեում մինչև 160 և անգամ ավելի զարկ կատարել։

Ինչպես բացատրում է գերմանացի սրտաբան Դիտրիխ Անդրեսենը, նման խանգարումը սովորաբար դրսևորվում է ինքնազգացողության կտրուկ վատթարացմամբ, հավասարակշռության զգացման կորստով, իսկ որոշ դեպքերում անգամ գիտակցության կորստով։ Սակայն վերոնշյալ զգացողությունները շողացող առիթմիայի միակ ախտանշանները չեն, ուստի հարկավոր է ուշադրություն դարձնել նաև այլ դրսևորումներին։

նախասրտերի ֆիբրիլյացիայի մասին կարող են նախազգուշացնել այնպիսի ախտանշանները, ինչպիսին են սրտի «քաոսային» աշխատանքը, զարկերի արագացումը, կրծքավանդակի ցավը, հևոցը, սաստիկ անհանգստությունն ու վախը, թուլությունն ու գլխապտույտի նոպաները։

Ինչպես բացատրել է մասնագետը Merkur.de պորտալի հետ զրույցում, նախասրտերի ֆիբրիլյացիան կարող է դրսևորվել որպես ժամանակավոր բնույթ կրող խանգարում, որի դեպքում հիվանդության ախտանշանները կանհետանան ընդամենը մի քանի ժամ կամ մի քանի օր անց, սակայն անգամ ախտանշանների անհետացման ու ինքնազգացողության կարգավորման դեպքում հարկավոր է անպայման դիմել մասնագետին։ Այս խանգարման դեպքում բժշկի հետ խորհրդակցելը շատ կարևոր է, քանի որ կտրուկ ի հայտ եկած շողացող առիթմիան կարող է վերածվել մշտականի, ինչը կարող է շատ վտանգավոր լինել։

Ինչը կարող է ազդել շողացող առիթմիայի զարգացման վրա

Այս խանգարման զարգացման հավանականությունը բարձրանում է արդեն իսկ առկա սրտանոթային հիվանդությունների դեպքում, սակայն նման գործոնի բացակայության դեպքում հարկավոր է ուշադրություն դարձնել նաև մյուս ռիսկային գործոններին, որոնց շարքին են դասվում ընտանեկան նախատրամադրվածությունը, սեռը (տղամարդիկ ավելի հաճախ են բախվում այս խնդրին), պատկառելի տարիքը, զարկերակային բարձր ճնշումը, շաքարային դիաբետը, ճարպակալումը, ինչպես նաև ծխախոտի գործածությունն ու ալկոհոլի չարաշահումը։

Ինչ տարբերություն կա նախասրտերի ֆիբրիլյացիայի և փորոքների ֆիբրիլյացիայի միջև

Փորոքների ֆիբրիլյացիան կրիտիկական վիճակ է, որի դեպքում հիվանդին շտապ բուժօգնություն ու սրտամկանի մերսում է հարկավոր է, քանի որ տեղի է ունենում սրտի կանգ և մարդը կորցնում է գիտակցությունը։ Նման դեպքերում տուժածի մահվան հավանականությունը չափազանց մեծ է լինում, ուստի հարկավոր է հնարավորինս արագ միջոցներ ձեռնարկել։

Ի տարբերություն փորոքների ֆիբրիլյացիայի՝ նախասրտերի ֆիբրիլյացիան չի հանգեցնում սրտամկանի անսպասելի կանգի ու մահվան, սակայն բարձրացնում է գլխուղեղի կաթվածի հավանականությունը։

Շողացող առիթմիայի «նենգությունը» դրա աննկատ լինելն է։ Ինչպես բացատրում է գերմանացի մասնագետը՝ այս խանգարումն ունեցող յուրաքանչյուր երկրորդ հիվանդը չի նկատում խնդիրը, քանի որ առիթմիան ոչ միշտ է ուղեկցվում սրտի ռիթմի արագացմամբ, ինչն էլ դժվարացնում է հիվանդության ախտորոշումը։ Սակայն միևնույն ժամանակ առիթմիան հանգեցնում է սրտի ռիթմի խանգարման, ինչն էլ բարձրացնում է արյան հոսքի փոփոխությունների ու մակարդուկների՝ թրոմբների առաջացման հավանականությունը։ Նման մակարդուկները կարող են հայտնվել գլխուղեղում, խցանել արյունատար անոթն ու հանգեցնել գլխուղեղի կաթվածի, ինչն էլ կարող է մահացու լինել։