Նյարդերի վնասվածքների մասին հուշող ախտանշաններ, որոնց առկայության դեպքում հարկավոր է անհապաղ դիմել բժշկին

Մարդու մարմնում կան հսկայական քանակությամբ նյարդեր, որոնց մեծ մասը ծայրամասային նյարդեր են և ազդանշաններ են փոխանցում գլխուղեղին ու ողնուղեղին՝ հուշելով, թե ինչպես է պետք շարժել մկանները, տարբերակել ցավն ու աշխատացնել ներքին օրգանները։ Այս նյարդերի վնասվածքները կարող են լուրջ բարդությունների զարգացման պատճառ դառնալ, ուստի դրանք հարկավոր է հնարավորինս շուտ հայտնաբերել ու միջոցներ ձեռնարկել, ինչի համար էլ անհրաժեշտ է իմանալ դրանց մասին հուշող ախտանշանները։

Ամերիկացի վիրաբույժ Էնդրյու Էլքվուդի խոսքով՝ նյարդերի աշխատանքի նման խանգարման տարածված պատճառներից մեկը շաքարային դիաբետն է, սակայն այս խնդիրը կարող է պայմանավորված լինել նաև Լայմի հիվանդությամբ, վնասվածքներով, ծերացմամբ, վիտամինների դեֆիցիտով, տոքսինների ազդեցությամբ, ինչպես նաև վարակներով ու աուտոիմունային հիվանդություններով, այդ թվում՝ հեպատիտ C-ով, ՄԻԱՎ-ով ու ռևմատոիդ արթրիտով։ Սա է պատճառը, որ հարկավոր է հնարավորինս շուտ հայտնաբերել նման վնասվածքները, պարզել դրանց պատճառն ու սկսել անհրաժեշտ բուժումը բժշկի հսկողության տակ։

Վիրաբույժը ներկայացրել է նյարդերի հնարավոր վնասվածքների մասին հուշող հիմնական ախտանշանները, որոնց դեպքում հարկավոր է անհապաղ դիմել բժշկին։

Թմրածություն, ծակծկոց կամ այրոցի զգացողություն

Ձեռքերում կամ ոտքերում նման զգացողությունների առկայությունը համարվում է նյարդերի վնասվածքների մասին հուշող ամենավաղ ախտանշաններից մեկը։ Եթե դրանք սկսում են մշտական բնույթ կրել, ապա հարկավոր է անհապաղ դիմել մասնագետին ու բուժզննում անցնել։

Վնասվածքներ, որոնք աննկատ են ստացվում

Այրվածքները, վերքերը կամ այլ վնասվածքները, որոնք ստանալու պահին մարդը ոչինչ չի զգացել, նույնպես պետք է բժշկին դիմելու լուրջ պատճառ դառնան, քանի որ նման վնասվածքները ևս վկայում են նյարդերի հետ կապված խնդիրների մասին։

Մարմնի որևէ հատվածը շարժելու անկարողություն կամ դժվարացում

Շարժողական նյարդի վնասվածքը կարող է դառնալ մկանային թուլության կամ անգամ լուծանքի (паралич) պատճառ, ուստի շարժումների հետ կապված դժվարությունների դեպքում հարկավոր է անհապաղ բուժզննում անցնել։ Նման խնդիրներն անտեսելը կարող է շատ վտանգավոր լինել, ուստի հարկավոր է անչափ զգոն լինել։ Օրինակ՝ անսպասելի թուլությունը կամ թմրածությունը, որն ի հայտ է գալիս մարմնի մի հատվածում և ուղեկցվում է քայլքի կամ տեսողության հետ կապված խնդիրներով կամ սաստիկ գլխացավով, կարող է պայմանավորված լինել գլխուղեղի կաթվածով, որը չի կարելի անտեսել։ 

Միայն մի ոտքի ցավ

Գոտկատեղի հատվածում առաջացող կտրուկ ցավը, այրոցը կամ ծակծկոցը, որն աստիճանաբար տարածվում է նաև ոտքերից որևէ մեկի հետին հատվածում, կարող է հուշել նստանյարդի բորբոքման մասին, որը բնորոշվում է նստանյարդի սեղմվածությամբ ու դրսևորվում է սաստիկ ցավով։

Անփութություն

Հաճախակի սայթաքումները, ինչպես նաև կոորդինացիայի խանգարումներն ու մարմնի դիրքը զգալու անկարողությունը վկայում են խոշոր նյարդերի հնարավոր բորբոքումների մասին։ Բացի այդ, նման ախտանշաններով կարող է դրսևորվել նաև Պարկինսոնի հիվանդությունը, որը բնորոշվում է գլխուղեղում նյարդային բջիջների ապաճումով։

Հաճախացած միզարձակում

Նյարդային անոմալիաների դեպքում կարող է խանգարվել միզապարկի լցվածության մասին զգուշացնող ախտանշանների փոխանցման գործընթացը, ուստի գլխուղեղը կարող է սովորականից հաճախ միզելու անհրաժեշտության մասին ազդանշաններ ստանալ։ Ավելին՝ այս դեպքում կարող է նկատվել ոչ միայն հաճախացած միզարձակում, այլև անմիզապահություն։

Գլխացավեր

Կարճատև ու ուժգին գլխացավերը, որոնք նման են հոսանքահարման, նույնպես հուշում են շտապ բուժզննում անցնելու անհրաժեշտության մասին, ուստի նմանատիպ ցավերը ոչ մի դեպքում չի կարելի անուշադրության մատնել։

Արտասովոր քրտնարտադրություն

Չափազանց առատ կամ քիչ քրտնարտադրությունը նույնպես կարող է պայմանավորված լինել նյարդերի վնասվածքներով։ Այս ախտանշանը կարող է հուշել գլխուղեղից քրտնագեղձերին տեղեկություն հաղորդող նյարդերի շարքից դուրս գալու և մարմնի ջերմաստիճանի հաճախակի տատանումների մասին։ Նման դեպքերում հարկավոր է դիմել բժշկին խնդրի պատճառը պարզելու և միջոցներ ձեռնարկելու համար։

Նյութի աղբյուրը՝ medikforum.ru