Աղիների քաղցկեղի մասին հուշող 3 ախտանշան, որոնք ոչ մի դեպքում չի կարելի անուշադրության մատնել

Աղիների քաղցկեղը կամ կոլոռեկտալ քաղցկեղն այս հիվանդության ամենավտանգավոր տեսակներից մեկն է, որը տարեկան հազարավոր մարդկանց մահվան պատճառ է դառնում: Սա այն ախտաբանություններից է, որոնց բուժման արդյունավետությունը կախված է դրա վաղ ախտորոշումից, քանի որ ժամանակին հիվանդությունը չախտորոշելու դեպքում բուժումը կարող է անարդյունավետ լինել։ Սա է պատճառը, որ մասնագետները հորդորում են զգոն լինել, պարբերաբար բուժզննում անցնել և անուշադրության չմատնել խնդրի մասին հուշող ախտանշանները, քանի որ միայն այդ դեպքում կհաջողվի հայտնաբերել հիվանդությունը զարգացման վաղ փուլերում և միջոցներ ձեռնարկել դրանից ազատվելու համար։ Սակայն խնդիրն այն է, որ աղիների քաղցկեղը կարող է դրսևորվել ոչ շատ ակնհայտ ախտանշաններով, ուստի շատերը դրանք անգամ չեն նկատում կամ վերագրում են այլ խնդիրներին, ինչի հետևանքով հիվանդությունն ախտորոշվում է չափազանց ուշ։ Նման խնդիրներից խուսափելու համար մասնագետները ներկայացրել են կոլոռեկտալ քաղցկեղի մասին հուշող այն ախտանշանները, որոնք ոչ մի դեպքում չի կարելի անուշադրության մատնել։

Առհասարակ աղիների քաղցկեղն ընդհանրական տերմին է, որով բնութագրվում են հաստ աղիքում կամ ուղիղ աղիքում զարգացած քաղցկեղի բոլոր տեսակները։ Այս հիվանդության վաղ ախտանշանները սովորաբար աննկատ են մնում, ուստի հաճախ մարդիկ անգամ չեն էլ կասկածում ռիսկային խմբում գտնվելու մասին։ Այնուամենայնիվ մասնագետները վստահ են, որ բավական զգոն լինելու դեպքում հնարավոր կլինի ժամանակին հայտնաբերել ախտաբանությունը՝ զգալիորեն բարձրացնելով բարեհաջող բուժման հավանականությունը։

Medicine Net ընկերության մասնագետների խոսքով՝ աղիների քաղցկեղի զարգացումը ժամանակին նկատելու ամենապարզ միջոցներից մեկը պարբերաբար կղանքն ստուգելն է, քանի որ մարդու օրգանիզմը միշտ որոշակի փոփոխությունների միջոցով հուշում է վտանգավոր խնդրի զարգացման մասին։ Մասնագետները ներկայացրել են երեք ակնհայտ փոփոխություն, որոնք նկատելու դեպքում հարկավոր է անհապաղ բուժզննում անցնել և անհրաժեշտության դեպքում սկսել բուժումը։

Կղանքի սև գույն

Մասնագետների խոսքով՝ կղանքը սև երանգ է ստանում արյան պատճառով, որը դրանում է հայտնվում աղիների վերին հատվածներից։ Աղիների այս հատվածի ախտահարման դեպքում մինչ կղանքին խառնվելն արյունն արդեն մուգ երանգ է ստանում, ինչի հետևանքով էլ կղանքը ևս սև գույն է ունենում։ Նման ախտանշանն անտեսելը կարող է շատ վտանգավոր լինել, ուստի դրա առկայության դեպքում հարկավոր է անհապաղ դիմել բժշկին։

Կղանքի կարմիր գույնը

Կղանքի կարմիր երանգը կամ դրանում վառ կարմիր հատվածների առկայությունը ևս կարող է պամանավորված լինել աղիների քաղցկեղով։ Այս դեպքում ախտանշանը հուշում է հաստ աղիքի հնարավոր ախտահարման մասին, ուստի հարկավոր է շատ ուշադիր լինել։ Նման դեպքերում կղանքի մեջ արյան առկայությունից բացի կարող է նաև մեծ քանակությամբ լորձային զանգված նկատվել, ուստի հարկավոր է շատ ուշադիր լինել։

Բարակ կղանքը

Եթե կղանքը լավ չի ձևավորվում ու չափազանց բարակ է լինում, ապա հարկավոր է անհապաղ դիմել բժշկին։ Մասնագետները նախազգուշացնում են, որ նման փոփոխությունների դեպքում հարկավոր է անհապաղ բուժզննում անցնել պատճառը պարզելու համար, ուստի ոչ մի դեպքում չի կարելի այն անտեսել։

Վերոնշյալ ախտանշաններից բացի աղիների քաղցկեղի մասին կարող են հուշել նաև սովորությունների որոշ փոփոխությունները, որոնք ևս չի կարելի անուշադրության մատնել։ Մասնավորապես՝ չի կարելի անտեսել պարբերաբար միմյանց հաջորդող փորլուծությունն ու փորկապությունը։ 

Բացի այդ, այս խանգարման դեպքում կարող է նկատվել նաև աղիների ոչ լիարժեք դատարկվածության զգացողություն, որից հաճախ գանգատվում են ուղիղ աղիքի ուռուցքներով հիվանդները։ Այդ ուռուցքների հետևանքով հիվանդի մոտ կարող է պարբերաբար աղիները դատարկելու կեղծ ցանկություն առաջանալ։

Նմանատիպ փոփոխությունների դեպքում առողջական վիճակի նկատմամբ առանձնահատուկ ուշադրություն պետք է ցուցաբերեն 50 տարեկանից բարձր անձիք, քանի որ վիճակագրական տվյալներով աղիների քաղցկեղի դեպքերի ավելի քան 90 տոկոսը գրանցվում է հենց այս տարիքի անձանց շրջանում։ Սա է պատճառը, որ տարիքային այս խմբում գտնվողներին խորհուրդ է տրվում կանոնավոր բուժզննում անցնել ու անհապաղ դիմել մասնագետին ցանկացած արտասովոր փոփոխություն նկատելու դեպքում։

Նյութի աղբյուրը՝ Express