7 համեղ ու հասանելի մթերք կրծքագեղձի քաղցկեղի զարգացման հավանականությունը նվազեցնելու համար

13:52 • 27.02.21

Կրծքագեղձի քաղցկեղը կանանց շրջանում այս հիվանդության ամենատարածված տեսակն է, որի հետևանքով տարեկան տասնյակ հազարավոր կանայք են մահանում։ Սա այն հիվանդություններից է, որոնց կանխարգելումն ու բուժումը զարգացման վաղ փուլերում շատ ավելի հեշտ է, քան հետագայում դրա պատճառով առաջացած մի շարք բարդությունների դեմ պայքարելը, ուստի հարկավոր է անել հնարավոր ամեն բան խնդրի զարգացումից խուսափելու համար։

Այս հիվանդության զարգացման հավանականությունը նվազեցնելու լավագույն միջոցներից մեկը սննդակարգը կարգավորելն ու դրանում հակաքաղցկեղային ազդեցությամբ օժտված սննդամթերքի տեսակներ ներառելն է, ուստի ձեր ուշադրությանն ենք ներկայացնում սննդամթերքի 7 տեսակ, որոնք հարկավոր է անպայման ներառել սննդակարգում։

Ձիթայուղ

Արևածաղկի յուղը կամ կարագը ձիթայուղով փոխարինելը կարող է շատ օգտակար լինել։ Այս յուղը ոչ միայն յուրահատուկ համ է հաղորդում մթերքին, այլև դարձնում է այն շատ ավելի օգտակար, քանի որ հարուստ է մեծ քանակությամբ հակաօքսիդանտներով, որոնք պաշտպանում են բջիջները կառուցվածքային փոփոխությունների պատճառ հանդիսացող ազատ ռադիկալներից։

Կանաչեղեն

Թարմ կանաչեղենը ոչ միայն համեղ է, այլև հարուստ է B խմբի վիտամիններով։ Ընդ որում՝ ցանկության դեպքում այս մթերքը կարելի է կիրառել ինչպես առանձին, այնպես էլ որևէ այլ մթերքի հետ համադրած։

Սաղմոն

Այս ձկնատեսակը հարուստ է օմեգա-3 ճարպաթթուներով, որոնք պայքարում են բորբոքումների՝ կրծքագեղձի քաղցկեղի զարգացմանը նպաստող հիմնական գործոններից մեկի դեմ։ Շաբաթական երկու բաժին սաղմոն ուտելը բավական կլինի առավելագույնս օգուտ ստանալու համար, սակայն հարկ է հիշել, որ այն պետք է պատրաստված լինի առանց յուղի։

Հունական ընկույզ

Այս ընկույզներն ունեն բավական բարձր կալորիականություն, սակայն դրանք դանդաղեցնում են ուռուցքների զարգացման արագությունը, ինչն ապացուցվել է կենդանիների վրա անցկացված հետազոտությունների արդյունքում։ Սա է պատճառը, որ մասնագետները խորհուրդ են տալիս չխուսափել այս մթերքից ու ավելացնել այն սննդակարգին։

Նարնջագույն, դեղին ու կարմիր մրգեր և բանջարեղեն

Նման վառ երանգ ունեցող մրգերն ու բանջարեղենի տեսակները պարունակում են կարոտինոիդներ, ինչի շնորհիվ շատ արդյունավետ են չարորակ նորագոյացությունների կանխարգելման հարցում։ Սա է պատճառը, որ հարկավոր է հարստացնել սննդակարգը բուլղարական պղպեղով, կիտրոնով, լոլիկով, սեխով, ստեպղինով, դդումով և նմանատիպ այլ մթերքով։

Կաղամբ

Կաղամբը հարուստ է բուսական բաղադրիչներով, որոնք օգնում են պաշտպանել օրգանիզմը չարորակ բջիջներից։ Այս մթերքը կարելի է օգտագործել ամենատարբեր ուտեստների պատրաստման համար, ինչպես նաև կարելի է կիրառել տարատեսակ վնասակար սնեքերի փոխարեն։

Յուղազրկված կաթնամթերք

Կաթնամթերքը պարունակում է հսկայական քանակությամբ կալցիում ու վիտամին D, որոնք էլ դրական ազդեցություն են ունենում ոսկորների վրա և կանխում են կրծքագեղձի քաղցկեղի զարգացումը։

Ինչպես նշում են մասնագետները, ցանկացած հիվանդության կանխարգելման լավագույն միջոցը ժամանակին բուժզննում անցնելն է, սակայն անգամ ամենօրյա բուժզննումները չեն կարող այնքան արդյունավետ լինել, որքան բալանսավորված սննդակարգը։ Սա է պատճառը, որ առողջության պահպանման համար հարկավոր է առաջին հերթին կարգավորել սննդակարգը։

Նյութի աղբյուրը՝ MedikForum.ru