Որոնք են արյան մեջ շաքարի բարձր մակարդակի և հնարավոր շաքարային դիաբետի մասին հուշող վաղ ախտանշանները

2-րդ տիպի շաքարային դիաբետը բավական տարածված ախտաբանություն է, որը կարող է շատ երկար ժամանակ զարգանալ առանց որևէ ախտանշանի, մինչդեռ այդ ընթացքում հիվանդությանը բնորոշ շաքարի բարձր մակարդակը խիստ բացասաբար է անդրադառնում երիկամների, լյարդի, գլխուղեղի և այլ օրգանների վրա։ Մարդիկ հազվադեպ են ժամանակին նկատում այս խնդրի զարգացումը, ինչի հետևանքով էլ այն սովորաբար ախտորոշվում է չափազանց ուշ, սակայն մասնագետները, այնուամենայնիվ, նախազգուշացնում են, որ զարգացման վաղ փուլերում օրգանիզմը կարող է հուշել խնդրի մասին որոշակի փոփոխություններով, որոնք ոչ մի դեպքում չի կարելի անտեսել։

Times Now պարբերականը հրապարակել է արյան մեջ շաքարի բարձր մակարդակի և հավանական շաքարային դիաբետի մասին հուշող այն ախտանշանները, որոնց առկայության դեպքում հարկավոր է բուժզննում անցնել։

Հաճախացած միզարձակում

Երբ արյան եջ շաքարի մակարդակը բարձրանում է, մարդու երիկամները չեն կարողանում այն ինչպես հարկն է զտել, ինչի հետևանքով էլ շաքարը կուտակվում է մեզի մեջ։ Փորձելով ազատվել ավելորդ շաքարից օրգանիզմն ակտիվացնում է միզագոյացման գործընթացը, ինչի հետևանքով էլ մարդը սովորականից հաճախ է միզելու ցանկություն ունենում։ Սա է պատճառը, որ հաճախացած միզարձակումը ոչ մի դեպքում չի կարելի անտեսել, իսկ դրա առկայության դեպքում հարկավոր է անհապաղ դիմել բժշկին։

Քաշի անսպասելի կորուստ

Շաքարային դիաբետի դեպքում խանգարվում է էներգիա ստանալու համար գլյուկոզարի արդյունավետ գործածության մեխանիզմը, ուստի էներգիա ստանալու համար օրգանիզմը կարող է սկսել այրել արդեն իսկ կուտակված ճարպերը։

Տեսողության վատթարացում

Արյան մեջ շաքարի բարձր մակարդակը բացասաբար է անդրադառնում անոթների վրա և առաջին հերթին տուժում են ամենամանր ու բարակ անոթները։ Սա հանգեցնում է տեսողության օրգաններում արյան շրջանառության խանգարման, ինչն էլ դառնում է տեսողության վատթարացման ու աղոտացման պատճառ։

Հոգնածություն

Սովորականից ավելի ուժգին հոգնածության զգացումը նույնպես կարող է պայմանավորված լինել արյան մեջ շաքարի բարձր մակարդակով։ Շաքարային դիաբետով հիվանդները հաճախ են գանգատվում գերհոգնածությունից անգամ չնչին ակտիվության դեպքում, ուստի նման խնդիր նկատելու դեպքում հարկավոր է անպայման ստուգել արյան մեջ շաքարի մակարդակը։

Մաշկի գույնի փոփոխություն

Մաշկին պիգմենտային հետքերի առաջացումը կարող է պայմանավորված լինել ինսուլինակայունությամբ, ուստի նման արտասովոր գունակների առկայությունի չի կարելի անտեսել։ Պարանոցի շուրջը, հոդերի հատվածում ու ոտքերին մաշկի մուգ հատվածների առկայությունը կարող է պայմանավորված լինել ինսուլին հորմոնի նկատմամբ բջիջների զգայունության կորստի պատճառով արյան մեջ շաքարի մակարդակի բարձրացմամբ, ուստի դրանց առկայության դեպքում հարկավոր է դիմել մասնագետին ու բուժզննում անցնել։