Հինգ օգտակար սովորություն, որոնք կօգնեն նվազեցնել գլխուղեղի կաթվածի հավանականությունը

Գլխուղեղի կաթվածը խիստ վտանգավոր ախտաբանություն է, որն ունի մահացության բավական բարձր մակարդակ։ Ավելին՝ անգամ բարեհաջող ելքի դեպքում մեծ է լուծանքի հավանականությունը, ուստի զարմանալի չէ, որ մասնագետները հորդորում են անել հնարավոր ամեն բան նման խնդրի հավանականությունը նվազագույնի հասցնելու համար։

Ինչպես գրում է Express պարբերականը՝ վկայակոչելով Հարվարդի բժշկական դպրոցի մասնագետներին, գլխուղեղի կաթվածի զարգացմանը նպաստող հիմնական գործոններից մեկը զարկերակային բարձր ճնշումն է, ուստի այս խանգարման զարգացման հվանականության նվազեցման համար հարկավոր է առաջին հերթին կանխել զարկերակային գերճնշման հավանականությունը։

«Միջոցներ չձեռնարկելու դեպքում զարկերակային գերճնշումը կարող է կրկնապատկել կամ անգամ չորս անգամ բարձրացնել գլխուղեղի կաթվածի հավանականությունը։ Զարկերակային ճնշման ցուցանիշները կարելի է բարելավել աղի գործածությունը նվազեցնելով», - նշում են Հարվարդի համալսարանի գիտնականները։

Այնուամենայնիվ զարկերակային ճնշման վերահսկողությունը գլխուղեղի կաթվածի հավանականությունը նվազեցնելու միակ միջոցը չէ, ուստի հարկավոր է ուշադրություն դարձնել նաև այլ գործոններին։ Ձեր ուշադրությանն ենք ներկայացնում հինգ սովորություն, որոնք կօգնեն պաշտպանվել այս վտանգավոր ախտաբանությունից։

Աղի գործածության նվազեցում

Մասնագետները խորհուրդ չեն տալիս օրական կես թեյի գդալից ավելի աղ օգտագործել, քանի որ այս մթերքի չարաշահումը բարձրացնում է գլխուղեղի կաթվածի հավանականությունը։ Ընդ որում՝ մասնագետները հորդորում են շատ ուշադիր լինել, քանի որ բավական մեծ քանակությամբ աղ արդեն իսկ պարունակվում է պատրաստի ուտեստների ու կիսաֆաբրիկատների մեջ։

ֆիզիկական ակտիվություն

Մարզվելու և ֆիզիկապես ակտիվ լինելու սովորությունը համարվում է ամենաառողջարարներից մեկը։ Զարկերակային ճնշումը նորմայի սահմաններում պահելու և այդ կերպ զարկերակային ճնշման հավանականությունը նվազեցնելու համար մասնագետները խորհուրդ են տալիս կանոնավոր մարզվել ու լինել ֆիզիկապես ակտիվ։ Ցանկալի արդյունքին հասնելու համար հարկավոր է շաբաթական հինգ օր 30 րոպե տրամադրել ֆիզիկական վարժություններին։

Քաշի վերահսկողություն

Քաշը մշտական վերահսկողության տակ պահող մարդկանց մոտ գլխուղեղի կաթվածից խուսափելու հավանականությունն ավելի բարձր է լինում։ Փորձագետների խոսքով՝ ճարպակալումը կապված է զարկերակային բարձր ճնշման հետ, ինչով էլ պայմանավորված է այն հանգամանքը, որ առողջ քաշի պահպանումը նվազեցնում է գլխուղեղի կաթվածի հավանականությունը։ Առողջ քաշը որոշելու համար Հարվարդի գիտնականները հորդորում են հետևել մարմնի զանգվածի ինդեքսին, որը չպետք է գերազանցի 25-ը։

Ճիշտ սննդակարգ

Ճիշտ սննդակարգն առհասարակ շատ կարևոր է ամբողջ օրգանիզմի համար, ուստի այն ոչ մի դեպքում չի կարելի անտեսել։ Գլխուղեղի կաթվածի հավանականությունը նվազեցնելու համար գիտնականները խորհուրդ են տալիս նվազեցնել հագեցած ճարպերով հարուստ մթերքի, այդ թվում նաև երշիկեղենի, կարագի, շոկոլադի, պաղպաղակի, տորթերի ու տարատեսակ թխուկների գործածությունը։ Միևնույն ժամանակ հարկավոր է հագեցնել սննդակարգը պոլիչհագեցած ու մոնոչհագեցած ճարպերով, որոնք պարունակվում են չզտված բուսայուղերում, ձկան յուղի, ավոկադոյի, գետնանուշի և ընկույզների մեջ։

Մրգերի ու բանջարեղենի գործածություն

Ոչ պակաս կարևոր է նաև սննդակարգում բավարար քանակությամբ մրգերի ու բանջարեղենի գործածությունը։ Գլխուղեղի կաթվածի և մի շարք այլ խանգարումների հավանականությունը նվազեցնելու համար հարկավոր է օրական 4-5 բաժակ միրգ ու բանջարեղեն օգտագործել։

Ծխախոտի բացառում

Ծխախոտի գործածությունը համարվում է ամենավնասակար սովորություններից մեկը։ Այն նպաստում է արյան ճնշման բարձրացմանը, ինչի հետ մեկտեղ բարձրանում է նաև գլխուղեղի կաթվածի հավանականությունը։