Մասնագետը նշել է՝ ինչ դրսևորումներ է ունենում սրտամկանի ինֆարկտը կանանց մոտ

Սրտանոթային համակարգի հիվանդությունները համարվում են ամբողջ աշխարհում մարդկանց վաղաժամ մահվան հիմնական պատճառներից մեկը, ինչը պայմանավորված է նրանով, որ դրանք հաճախ ախտահարում են մարդու կարևորագույն օրգաններից մեկը՝ սրտամկանը, և հազվադեպ են ախտորոշվում ժամանակին։

Այս համակարգի առավել վտանգավոր հիվանդություններից մեկը սրտամկանի ինֆարկտն է, որը յուրաքանչյուր տարի հազարավոր մարդկանց մահվան ու հաշմանդամության պատճառ է դառնում։ Այս խանգարման մասին հուշող հիմնական ախտանշանների մասին շատերը գիտեն, սակայն ոչ բոլորին է հայտնի, որ կանանց ու տղամարդկանց մոտ այն կարող է տարբեր դրսևորումներ ունենալ։

Բժիշկ-սրտաբան Ջին Հեյլսը նշել է այն հիմնական տարբերությունները, որոնք նկատվում են սրտի նոպաների դեպքում կանանց ու տղամարդկանց մոտ։ Այս դեպքում հաշվի են առնվում ինչպես կանանց ու տղամարդկանց օրգանիզմների ֆիզիոլոգիական տարբերությունները, այնպես էլ ախտանշանները, որոնք տարբերվում են տարբեր սեռերի ներկայացուցիչների մոտ։

Բժշկի խոսքով՝ կանանց մոտ սրտամկանի ինֆարկտի դեպքում ցավն առավել ուժգին է լինում ձեռերում՝ չնայած, որ խոսքն այն զարկերակի խցանման մասին է, որն արդյուն ու թթվածին է մատակարարում սրտամկանին։ Նման ախտանշանի պատճառն արյան հոսքում առկա խոլեստերինային վահանիկներն են, սակայն այս ախտանշանն, այնուամենայնիվ, ոչ միշտ է ակտիվ դրսևորում ստանում։ Նման արդյունքներ ստանալու համար մասնագետը վերլուծել է 1,1 միլիոն կնոջ ու տղամարդու մասնակցությամբ հետազոտությունների արդյունքներն ու նկատել, որ վերահսկվող խմբի կանանց 42%-ի մոտ սրտի նոպաները չեն ուղեկցվել կրծքավանդակում առաջացող տհաճ զգացողություններով։

Ինչպես գրում է actualnews.org կայքը, այս հիվանդությունը կանանց մոտ դրսևորվում է ծնոտի ու մեջքի ցավով, ինչպես նաև սրտխառնոցով ու հևոցով։ Նման արտասովոր ախտանշանների պատճառով կանայք հաճախ չեն հասկանում՝ որն է խնդրի պատճառը՝ վերագրելով դրանք մրսածությանը կամ սրտամկանի աշխատանքի հետ կապ չունեցող որևէ այլ խանգարման։ Բացի այդ, ի տարբերություն տղամարդկանց, կանայք հաճախ են բախվում «լուռ» ինֆարկտի խնդրին։ 

Վերոնշյալ ախտանշանների առկայության դեպքում կանանց խորհուրդ է տրվում անհապաղ դիմել բժշկին, քանի որ խնդիրն անուշադրության մատնելը կարող է ճակատագրական լինել ու շատ վատ հետևանքներ ունենալ։ 

Այս հիվանդության կանխարգելման համար մասնագետը խորհուրդ է տալիս առաջին հերթին կարգի բերել սննդակարգը, որը պետք է լինի բալանսավորված։ Ցանկալի է հետևել միջերկրածովյան սննդակարգին, որը ենթադրում է մեծ քանակությամբ բանջարեղենի, լոբազգիների, մրգերի, ընկույզների, ձիթայուղի ու ծովամթերքի գործածությունը։ Այս սննդակարգը նվազագույնի է հասցնում արյունատար անոթներում խոլեստերինային վահանիկների քանակությունն ու նվազեցնում է սրտի նոպաների հաճախականությունը, ուստի շատ օգտակար է սրտանոթային համակարգի առողջության պահպանման համար։