Քաղցկեղի մասին հուշող 5 ախտանշան, որոնք մարդիկ հաճախ են անուշադրության մատնում

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է ախտահարել գրեթե բոլոր օրգաններն ու հյուսվածքները և ախտորոշվել ինչպես կանանց, այնպես էլ տղամարդկանց մոտ։ Սա դասվում է այն հիվանդությունների շարքին, որոնց վաղ ախտորոշումը բարձրացնում է բարեհաջող բուժման հավանականությունը, մինչդեռ շատ հաճախ մարդիկ չեն նկատում հիվանդության մասին նախազգուշացնող ախտանշանները, ինչի հետևանքով էլ այն չափազանց ուշ է հայտնաբերվում։

Քաղցկեղի ախտանշանները կարող են խիստ բազմազան լինել, ուստի երբեմն մարդիկ չեն կապում դրանք օնկոլոգիական այս հիվանդության հետ՝ վերագրելով դրանք ավելի քիչ վտանգավոր խնդիրներին։ Այնուամենայնիվ այս հիվանդության վաղ ախտանշանները ժամանակին նկատելը շատ կարևոր է, ուստի մասնագետները ներկայացրել են քաղցկեղի մասին հուշող 5 ախտանշան, որոնք ոչ մի դեպքում չի կարելի անուշադրության մատնել։

Մշտական հազ

Սովորաբար հազն ուղեկցվում է մրսածությամբ կամ գրիպով, ուստի սկզբանական շրջանում դրա առկայությունը մարդկանց չի անհանգստացնում, սակայն մասնագետները նախազգուշացնում են, որ անդադար հազի դեպքում հարկավոր է շատ ավելի ուշադիր լինել ու բուժզննում անցնել, քանի որ այն կարող է պայմանավորված լինել առողջական լուրջ խնդիրներով և անգամ քաղցկեղով։ Քաղցկեղի կանխարգելման կենտրոնի մասնագետ Թերեզա Բարտոլոմյուի խոսքով՝ մեծ մասամբ հազը պայմանավորված չի լինում քաղցկեղով, սակայն մշտական հազի դեպքում, այնուամենայնիվ, հարկավոր է անպայման բուժզննում անցնել թոքերի քաղցկեղի առկայությունը հերքելու կամ հաստատելու համար։

Ստամոքսի կայուն այրոց

Ստամոքսի այրոցը կարող է պայմանավորված լինել տարբեր պատճառներով, այդ թվում՝ սաստիկ սթրեսով, չափազանց յուղոտ սննդակարգով կամ քաղցր մթերքով։ Եթե այրոցի ախտանշաններն ի հայտ են գալիս միայն ժամանակ առ ժամանակ, ապա անհանգստանալու պատճառ չկա, սակայն մշտական այրոցի դեպքում հարկավոր է բուժզննում անցնել, քանի որ խնդիրը կարող է պայմանավորված լինել կոկորդի կամ ըմպանի քաղցկեղով։

Մաշկային քոր

Խալերը բավական տարածված են, սակայն դրանց վտանգը մարդիկ հաճախ թերագնահատում են։ Այնուամենայնիվ մասնագետները նախազգուշացնում են, որ խալերը կարող են վերածվել չարորակ մելանոմայի՝ մաշկի քաղցկեղի ամենաագրեսիվ տեսակներից մեկի, որի հիմնական ախտանշաններն են կայուն քորը կամ այրոցը մաշկի ախտահարված հատվածում։ Նման ախտանշանների առկայության դեպքում հարկավոր է անպայման դիմել մաշկաբանին։

Կղանքի մեջ արյան հետքերի առկայություն

Կղանքի մեջ արյան հետքերի առկայությունը կարող է պայմանավորված լինել տարբեր պատճառներով, որոնց մեծ մասը հուշում են բարորակ նորագոյացությունների մասին։ Նման ախտանշանի հիմնական պատճառների շարքին են դասվում թութքը կամ լորձաթաղանթի փոքրիկ վնասվածքները, սակայն չի կարելի բացառել նաև քաղցկեղի հավանականությունը։ Նման դեպքերում խնդիրը շուտ հայտնաբերելու և բարեհաջող բուժվելու համար մասնագետները խորհուրդ են տալիս 50 տարեկանից բարձր բոլոր անձանց շատ ավելի ուշադիր լինել և տարեկան առնվազն մեկ անգամ կղանքի հետազոտություն անցնել։

Ավշային հանգույցների մեծացում

Մեծացած ավշային հանգույցները, որոնք չեն փոփոխվում և չեն ուղեկցվում ցավոտ զգացողություններով կարող են պայմանավորված լինել ավշային հանգույցների քաղցկեղով։ Եթե նման այտուցվածությունը չի անցնում բավական երկար ժամանակ, հարկավոր է անպայման բուժզննում անցնել։

Նշված ախտանշանները ոչ միշտ են պայմանավորված լինում քաղցկեղով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ Medikforum.ru