Առողջական որ խնդիրները կարող են դառնալ գիշերային առատ քրտնարտադրության պատճառ

Քրտնարտադրությունն օրգանիզմի համար շատ կարևոր գործընթաց է, որի միջոցով տեղի է ունենում ջերմակարգավորումը, ինչպես նաև մարմինն ազատվում է ավելորդ հեղուկից ու վնասակար տարրերից։ Որպես կանոն քրտնարտադրությունն ավելի ակտիվ է լինում ցերեկային ժամերին, իսկ գիշերը զգալիորեն դանդաղում է, սակայն լինում են դեպքեր, երբ մարդու մոտ նկատվում է գիշերային անոմալ առատ քրտնարտադրություն, ինչը բավական տհաճ խնդիր է դառնում։

The Journal of Family Practice պարբերականում հրապարակված տվյալների համաձայն՝ գիշերային առատ քրտնարտադրությունը բավական տարածված խնդիր է, ուստի հաճախ մարդիկ անուշադրության են մատնում այն՝ վերագրելով շոգ եղանակին կամ տաք գիշերազգեստին։ Այնուամենայնիվ մասնագետները նախազգուշացնում են, որ երբեմն գիշերային առատ քրտնարտադրությունը կարող է պայմանավորված լինել օրգանիզմում տեղի ունեցած որոշակի փոփոխություններով կամ անգամ որոշակի հիվանդություններով, որոնք ոչ մի դեպքում չի կարելի անտեսել։

Պարբերականի հետ զրույցում մասնագետները ներկայացրել են այն հիմնական գործոնները որոնք կարող են դառնալ գիշերային առատ քրտնարտադրության պատճառ։ Մասնագետների խոսքով՝ եթե այս խնդիրը պայմանավորված չէ օդի բարձր ջերմաստիճանով կամ տաք հագուստով, ապա հարկավոր է անպայման բուժզննում անցնել։

Հորմոնալ դիսբալանս

Կանանց մոտ գիշերային առատ քրտնարտադրության «դասական» պատճառ է համարվում հորմոնալ ֆոնի դիսբալանսը։ Նման խնդրի պատճառ կարող են հանդիսանալ օրգանիզմում էստրոգեն հորմոնի ցածր մակարդակը կամ դրա տատանումները, ինչն էլ կարող է պայմանավորված լինել ծննդաբերությամբ, բեղմնականխիչ դեղորայքի ընդունմամբ, ինչպես նաև դաշտանադադարով կամ նախադաշտանադադարային շրջանով։ Նման դեպքերում քրտնարտադրությունը կարող է լինել աննշան կամ բավական առատ՝ հանգեցնելով անգամ հագուստի խոնավացման։

Ավելին՝ առատ քրտնարտադրությունից բացի էստրոգենի մակարդակի տատանումները կարող են դառնալ մակերիկամների համար հավելյալ ծանրաբեռնվածության պատճառ, ինչն էլ կհանգեցնի գերհոգնածության, ընկճախտի զարգացման ու քաշի ավելացման։ Նման ախտանշանների դեպքում մասնագետները խորհուրդ են տալիս անպայման դիմել մասնագետին ու ստուգել օրգանիզմում էստրոգենի մակարդակն արյան հետազոտության միջոցով։

Որոշակի դեղորայքի ընդունում

Գիշերային առատ քրտնարտադրության պատճառներից մեկը կարող է լինել նաև որոշակի դեղորայքի ընդունումը։ Խոսքը, մասնավորապես, հակադեպրեսանտների մասին է, որոնց ընդունումն էլ սովորաբար նման կողմնակի բարդության պատճառ է դառնում։

Արյան մեջ շաքարի ցածր մակարդակ

Գիշերային առատ քրտնարտադրությունը կարող է պայմանավորված լինել նաև հիպոգլիկեմիայով՝ արյան մեջ շաքարի բարձր մակարդակով։ Նման խնդրի պատճառ կարող է դառնալ ինսուլինի կամ շաքարային դիաբետի դեպքում նշանակվող այլ դեղամիջոցների ընդունումը։

Սթրես

Սաստիկ սթրեսի դեպքում ևս մարդը կարող է գիշերվա ընթացքում նորմայից շատ քրտնել։ Բանն այն է, որ օրգանիզմի սթրեսային վիճակն ազդում է մակերիկամների աշխատանքի և դրանց արտադրած կորտիզոլ հորմոնի մակարդակի վրա, ինչն էլ անդրադառնում է քրտնագեղձերի աշխատանքի վրա։

Հիպերհիդրոզ

Հիպերհիդրոզի դեպքում մարդու օրգանիզմը կարող է նորմայից շատ քրտինք արտազատել առանց որևէ պատճառի։ Սովորաբար այս խանգարման դեպքում քրտնում են մարմնի միայն որոշակի հատվածները, մինչդեռ մյուս հատվածները կարող են բացարձակապես չոր մնալ։

Վտանգավոր հիվանդություններ

Որոշ դեպքերում գիշերային առատ քրտնարտադրությունը կարող է պայմանավորված լինել կյանքի համար վտանգավոր հիվանդություններով, որոնց շարքին կարող են դասվել տուբերկուլոզը, ՄԻԱՎ-ը, լեյկոզն ու քաղցկեղի որոշ այլ տեսակները (կատկապես՝ լիմֆոման)։ Նման դեպքերում հիվանդությունները որպես կանոն դրսևորվում են նաև մի շարք այլ ախտանշաններով, որոնք կարելի է նկատել օրվա ընթացքում։

Այս խնդիրը ոչ միշտ է պայմանավորված լինում վտանգավոր խանգարումներով, սակայն մասնագետները նախազգուշացնում են, որ դրա առկայությունը ոչ մի դեպքում չի կարելի անուշադրության մատնել։ Եթե գիշերային առատ քրտնարտադրությունը հաճախակի բնույթ է սկսում կրել և պայմանավորված չի լինում ջերմաստիճանի գործոնով, ապա հարկավոր է անհապաղ բուժզննում անցնել խնդրի պատճառը պարզելու համար։ Ընդ որում՝ բուժզննում անցնելը հատկապես կարևոր է այլ ախտանշաններով ուղեկցվող առատ քրտնարտադրության դեպքում։

Նյութի աղբյուրը՝