Արտասովոր ախտանշաններ, որոնք հուշում են աղեստամոքսային տրակտի հետ կապված խնդիրների մասին

Մարդու աեղեստամոքսայի տրակտի ճիշտ աշխատանքը շատ կարևոր նշանակություն ունի ամբողջ օրգանիզմի համար, քանի որ հենց այս համակարգի շնորհիվ է այն ստանում կենսագործունեության համար անհրաժեշտ բոլոր սննդարար նյութերը։ Այնուամենայնիվ, մարդու անառողջ կենսակերպը հաճախ է հանգեցնում աղեստամոքսային տրակտի աշխատանքի խանգարման, մինչդեռ մարդիկ ոչ միշտ են ժամանակին նկատում խնդիրը, ինչն էլ հանգեցնում է էլ ավելի լուրջ բարդությունների։ Մասնագետները, սակայն, նշում են, որ որոշ դեպքերում օրգանիզմն ինքն է հուշում խնդիրների առկայության մասին որոշակի ախտանշանների միջոցով, որոնք ժամանակին նկատելը թույլ է տալիս հնարավորինս շուտ միջոցներ ձեռնարկել բուժումն սկսելու համար։

Ձեր ուշադրությանն ենք ներկայացնում մի քանի արտասովոր ախտանշան, որոնց առկայությունը հուշում է աղեստամոքսային տրակտի հետ կապված խնդիրների առկայության մասին։

Կոկորդում գնդիկի առկայության զգացողություն

Եթե սննդի ընդունումն ուղեկցվում է տհաճ զգացողություններով և կլման ակտի արտասովոր խանգարումներով, ապա հարկավոր է անհապաղ բուժզննում անցնել, քանի որ նման խոչընդոտի առկայությունը կարող է պոտենցիալ վտանգավոր ախտանշան լինել։ Եթե տհաճ զգացողություններ են առաջանում անգամ հեղուկ օգտագործելիս, ապա խնդիրը կարող է պայմանավորված լինել աղեստամոքսային տրակտի հետ կապված խնդիրներով։ Ընդ որում՝ խնդիրը հատկապես վտանգավոր է լինում հազով, ձայնի խռպոտությամբ, զկռտոցով կամ հագեցածության զգացումով ուղեկցվելու դեպքում, քանի որ նման ախտանշանները կարող են կապված լինել կերակրափողի քաղցկեղով, որը ոչ մի դեպքում չի կարելի անտեսել։

Փորկապություն

Հաճախակի դարձած փորկապությունն ու խիստ տհաճ հոտով գազերը կարող են հուշել աղեստամոքսային տրակտում հնարավոր բակտերիալ դիսբալանսի մասին։ Նման դիսբալանսի պատճառ կարող են դառնալ ամենատարբեր հիվանդությունները, որոնք ոչ մի դեպքում չի կարելի անուշադրության մատնել։ Նման դեպքերում հարկավոր է անպայման հետևել ուղեկցող ախտանշաններին (աղիների աշխատանքի փոփոխություն, տհաճ զգացողություններ որովայնում, անբացատրելի քաշի կորուստ և այլն) ու դրանց առկայության դեպքում դիմել համապատասխան մասնագետին։

Անսպասելի նեղ հագուստ

Եթե հագուստը, որը նախկինում չէր առաջացնում տհաճ զգացողություններ, ընդամենը մի քանի օրում անսպասելի դառնում է շատ ավելի նեղ՝ առաջացնելով անհարմարության զգացում, ապա հարկավոր է անհապաղ բուժզննում անցնել։ Նման փոփոխությունը կարող է պայմանավորված լինել որովայնում գազերի կուտակմամբ, ինչը ոչ մի դեպքում չի կարելի անուշադրության մատնել։ Հատկապես վտանգավոր է անսպասելի փորափքանքը, որն ուղեկցվում է այնպիսի տհաճ ախտանշաններով, ինչպիսին են ցավն ու կղանքի մեջ արյան հետքերի առկայությունը։

Քաշի նվազում

Որևէ ակնհայտ պատճառով չբացատրվող քաշի նվազումը նույնպես բավական լուրջ խնդիր է թերապևտին դիմելու համար։ Ավելին՝ նման դեպքերում կարող է լինել նաև գաստրոէնտերոլոգին դիմելու անհրաժեշտություն, քանի որ շատ հաճախ նման խնդիրները պայմանավորված են լինում մարսողական տրակտի հետ կապված խնդիրներով։ Հարկ է հիշել, որ նման ախտանշանը կարող է պայմանավորված լինել այնպիսի վտանգավոր ախտաբանություններով, ինչպիսին են հաստ աղիքի քաղցկեղը, ենթաստամոքսային գեղձի քաղցկեղը կամ ստամոքսի քաղցկեղը, ուստի առաջին հերթին հարկավոր է հերքել հենց այս հիվանդությունների առկայությունը։

Սև կղանք

Կղանքի մեջ վառ կարմիր արյան հետքերը սովորաբար բացատրվում են թութքով, մինչդեռ մարսողական տրակտի վերին հատվածներից կղանքի մեջ հայտնված արյունը սովորաբար հանգեցնում է կղանքի գույնի մգացման, ինչի հետևանքով այն գրեթե սև երանգ է ստանում։ Նման ախտանշանը հաճախ հուշում է օրգանիզմում ընթացող անբարենպաստ գործընթացների, այդ թվում նաև քաղցկեղի մասին, ուստի այն ոչ մի դեպքում չի կարելի անուշադրության մատնել։

Երկաթ պակասորդային սակավարյունություն

Բավարար քանակությամբ երկաթ չստանալու դեպքում կարող են նկատվել այնպիսի ախտանշաններ, ինչպիսին են սաստիկ հոգնածությունը, գլխացավերը, մաշկի դեղնավուն երանգը, եղունգների փխրունությունը, մազաթափությունն ու ընդհանուր թուլությունը։ Այս կարևոր տարրի պակասը, որը հանգեցնում է երկաթ պակասորդային սակավարյունության, կարող է պայմանավորված լինել աղեստամոքսային տրակտում քրոնիկ արյունահոսությամբ, իսկ նման արյունահոսության պատճառ կարող են դառնալ հաստ աղիքի քաղցկեղը, ստամոքսի քաղցկեղը, խոցը կամ աղիների բորբոքային հիվանդությունները։

Նյութի աղբյուրը՝ medikforum.ru