Մասնագետները նշել են՝ ինչ արտասովոր ախտանշաններով կարող է դրսևորվել լյարդի քաղցկեղը

13:13 • 16.03.21

Լյարդը մարդու կարևորագույն օրգաններից մեկն է, ուստի այս օրգանի աշխատանքի խանգարումները կարող են խիստ բացասաբար անդրադառնալ ամբողջ օրգանիզմի վրա։ Հատկապես վտանգավոր է լյարդի քաղցկեղը, որի դեպքում բուժման արդյունավետությունը կախված է լինում դրա վաղ ախտորոշումից, սակայն հիվանդության ախտանշանները չիմանալու դեպքում խնդիրը զարգացման վաղ փուլերում հայտնաբերելն այդքան էլ հեշտ չի լինի, ինչը կարող է շատ վտանգավոր հետևանքներ ունենալ։

Այս հիվանդությունը շատ դեպքերում բավական երկար ժամանակ զարգանում է առանց ակնհայտ ախտանշանների, ինչի պատճառով էլ մնում է չախտորոշված, սակայն երբեմն վտանգավոր ախտաբանության մասին կարող են հուշել առաջին հայացքից արտասովոր թվացող մի շարք խանգարումներ, որոնք ժամանակին նկատելը թույլ կտա հնարավորինս շուտ միջոցներ ձեռնարկել ու սկսել բուժումը։

Ուռուցքաբանական ամերիկյան միության գիտնականները բրիտանական Express պարբերականի հետ զրույցում ներկայացրել են այն հիմնական ախտանշանները, որոնք կարող են հուշել լյարդի քաղցկեղի մասին։ Առաջին հերթին բժիշկները խորհուրդ են տալիս անուշադրության չմատնել արտասովոր ցավը, որը կարող է ի հայտ գալ մարմնի տարբեր հատվածներում։

Խոսելով լյարդի քաղցկեղի մասին հուշող արտասովոր ախտանշանների մասին՝ մասնագետներն ընդգծում են, որ հիվանդության մասին հուշող ախտանշան կարող է լինել նաև աջ թիակի հատվածի ցավը, ինչը պայմանավորված է նրանով, որ ուռուցքը կարող է գրգռել այն նյարդերը, որոնց միջոցով գլխուղեղը ստանում է ցավի մասին նախազգուշացնող ազդանշանը։ Արդյունքում նյարդը գլխուղեղին «հաղորդում» է, որ ցավոտ զգացողությունները տեղակայված են թիակի հատվածում, մինչդեռ դրանք լյարդի հատվածում են։

Բացի այդ, ցավոտ զգացողություններ կարող են ի հայտ գալ նաև աջ ուսի հատվածում, իսկ երբեմն էլ երկու ուսերի։ Ավելին՝ նման դեպքերում ցավը կարող է տարածվել նաև մեջքի հատվածում։

Բրիտանական առողջապահական ծառայության (NHS) ներկայացուցիչներն իրենց հերթին հիշեցնում են, որ լյարդի քաղցկեղը կարող է դրսևորվել նաև մի շարք այլ ախտանշաններով, որոնք ևս չի կարելի անտեսել։ Մասնագետների խոսքով՝ այս հիվանդության «դասական» ախտանշանների շարքին են դասվում մաշկի ու աչքերի սպիտակուցային թաղանթի դեղնավուն երանգը, մաշկային քորը, մեզի գույնի մգացումն ու կղանքի չափազանց բաց գույնը, ախորժակի անբացատրելի կորուստն ու քաշի նվազումն առանց պատճառի, ինչպես նաև ինքնազգացողության ընդհանուր վատթարացումը, որը նման է գրիպի ախտանշաններին։

Մասնագետները նախազգուշացնում են, որ վերոնշյալ ախտանշաններից անգամ մեկի առկայության դեպքում հարկավոր է անպայման բուժզննում անցնել։ Ընդ որում՝ բուժզննում անցնելը հատկապես կարևոր է, եթե ախտանշանները պահպանվում են ավելի քան երկու շաբաթ կամ շարունակում են էլ ավելի խորանալ։ Դրանք, իհարկե, ոչ միշտ են պայմանավորված լինում քաղցկեղով, ուստի խուճապի մատվելու կարիք չկա, սակայն նման խնդիրների առկայության դեպքում այնուամենայնիվ բուժզննում անցնելը պարտադիր է։