Արտասովոր ախտանշաններ, որոնք կարող են հուշել ռևմատոիդ արթրիտի մասին

Ռևմատոիդ արթրիտն աուտոիմունային ու բորբոքային հիվանդություն է, որի դեպքում մարդու իմունային համակարգը սխալմամբ հարձակվում է առողջ հյուսվածքների վրա՝ առաջացնելով բորբոքումներ ու սաստիկ ցավեր և հանգեցնելով ախտահարված հատվածների այտուցների։ Սովորաբար հիվանդությունն ախտահարում է հոդերը, առավել հաճախ՝ դաստակների, ձեռքերի ու ծնկների հոդերը, ինչի հետևանքով էլ սովորաբար ասոցացվում է հենց հոդերի հետ կապված ախտանշանների՝ ցավի, այտուցվածության ու շարժումների կաշկանդվածության հետ։ Սակայն այնուամենայնիվ մասնագետները նախազգուշացնում են, որ հոդացավերը միակ ախտանշանը չեն, որոնք հուշում են արթրիտի մասին, ուստի հարկավոր է շատ ուշադիր լինել հիվանդության մյուս դրսևորումները ժամանակին նկատելու և հետագա բարդացումից խուսափելու համար։

Բրիտանական Express պարբերականը ներկայացրել է ռևմատոիդ արթրիտի մասին հուշող այն ախտանշանները, որոնք առաջին հայացքից արտասովոր են թվում, ուստի հաճախ վերագրվում են այլ խնդիրներին ու անտեսվում։

Կրծքավանդակի ցավեր

Ռևմատոիդ արթրիտը որպես բորբոքային հիվանդություն ասոցացվում է զարկերակներում վահանիկների կուտակման ու սրտանոթային հիվանդությունների զարգացման բարձր հավանականության հետ, ուստի դրա մասին հուշող ախտանշաններից մեկը կարող է լինել կրծքավանդակի ցավը։ Մասնագետների խոսքով՝ այս հիվանդությունը կարող է հանգեցնել սրտամկանի հետ կապված բավական ցավոտ խնդրի՝ պերիկարդիտի զարգացման, որի դեպքում նկատվում է սրտամկանի շուրջ գտնվող բարակ հյուսվածքների բորբոքում։ Նման խնդիրը կարող է ուղեկցվել կրծքավանդակի սուր ցավով, որը հաճախ վերագրվում է սրտի նոպային։

Աչքերի ու շուրթերի չորություն

Ռևմատոիդ արթրիտով հիվանդների մոտ բարձր է աուտոիմունային մեկ այլ հիվանդության՝ Սյորգենի համախտանիշի զարգացման հավանականությունը, իսկ այս հիվանդությունը հաճախ է հանգեցնում բերանի խոռոչի, քթի խոռոչների ու աչքերի լորձաթաղանթների արտասովոր չորության։ Նման ախտանշանների առկայության դեպքում հարկավոր է անպայման խորհրդակցել մասնագետի հետ ու բուժզննում անցնել խնդրի պատճառը պարզելու համար։

Դժվարացած շնչառություն

Ռևմատոիդ արթրիտի մասին հուշող ամենաարտասովոր ախտանշաններից մեկը կարող է լինել նաև դժվարացած շնչառությունը, ուստի անսպասելի ի հայտ եկած այս ախտանշանը ևս չի կարելի անուշադրության մատնել։ Բանն այն է, որ այս հիվանդությունը կարող է դառնալ նաև թոքերը պատող հյուսվածքների բորբոքման պատճառ, ինչն էլ հանգեցնում է հևոցի և ցավով ու տհաճ զգացողություններով ուղեկցվող շնչառության։ Սա է պատճառը, որ անբացատրելի հազի ու դժվարացած շնչառության դեպքում հարկավոր է անպայման դիմել մասնագետին ու պարզել խնդրի պատճառը։

Նշված ախտանշանները ոչ միշտ են պայմանավորված լինում ռևմատոիդ արթրիտով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: