Ինչպես տարբերել սրտամկանի ինֆարկտը նման դրսևորումներ ունեցող այլ հիվանդություններից

Սրտանոթային համակարգի հիվանդությունները համարվում են ամբողջ աշխարհում մարդկանց վաղաժամ մահվան հիմնական պատճառներից մեկը, ինչը պայմանավորված է նրանով, որ դրանք հաճախ ախտահարում են մարդու կարևորագույն օրգաններից մեկը՝ սրտամկանը, և հազվադեպ են ախտորոշվում ժամանակին։

Այս համակարգի առավել վտանգավոր հիվանդություններից մեկը սրտամկանի ինֆարկտն է, որը յուրաքանչյուր տարի հազարավոր մարդկանց մահվան ու հաշմանդամության պատճառ է դառնում։ Նման հետևանքներից խուսափելու համար հարկավոր է սովորել տարբերել այն ախտանշանները, որոնք կարող են նախազգուշացնել սրտամկանի ինֆարկտի բարձր հավանականության մասին՝ թույլ տալով կանխել հնարավոր անդառնալի հետևանքները, սակայն խնդիրն այն է, որ այս հիվանդության ախտանշանները հաճախ նման են լինում այլ հիվանդությունների ախտանշաններին, ուստի շատ դեպքերում վերագրվում են հենց դրանց։

Սրտամկանի բրիտանական հիմնադրամի մասնագետները Express Health պարբերականի հետ զրույցում նշել են, որ մարդկանց մոտ ցավազգայունության շեմը տարբեր է լինում, ուստի երբեմն սրտի նոպայի ցավոտ ախտանշանները կարող են վերագրվել ոչ շատ լուրջ խանգարումներին, ինչը կարող է շատ վատ հետևանքներ ունենալ։ Նման խնդիրներից խուսափելու համար հարկավոր է սովորել տարբերել այս ախտաբանությունը նման դրսևորումներ ունեցող այլ խնդիրներից։

Ինչպես տարբերել սրտամկանի ինֆարկտը մարսողության խանգարումից

Սրտամկանի ինֆարկտի կլինիկական դրսևորումներն իսկապես կարող են նման լինել մարսողության խանգարմանը, քանի որ այս խնդիրը ևս կարող է հանգեցնել էպիգաստրալ հատվածում տհաճ զգացողությունների զարգացման։ Նման դեպքերում սրտամկանի ինֆարկտը մարսողության խանգարումից տարբերելու համար հարկավոր է հիշել, որ մարսողության խանգարման ախտանշաններն ի հայտ են գալիս սննդի ընդունումից հետո և կարող են բերանում տհաճ համի առաջացման պատճառ դառնալ, որից ազատվելու համար բավական կլինի ստամոքսի այրոցի դեմ դեղամիջոց ընդունել։ Ի տարբերությունը մարսողության խանգարման՝ սրտամկանի ինֆարկտի ախտանշաններն ի հայտ են գալիս ցանկացած պահին և չեն մեղմվում դեղորայքով։

Ինչպես տարբերել սրտամկանի ինֆարկտը ստենոկարդիայից

Ստենոկարդիայով հիվանդները նույնպես կարող են բախվել կրծքավանդակի ցավի խնդրին, ինչը բավական նման է լինում սրտամկանի ինֆարկտի դրսևորումներին։ Այս դեպքում ևս ցավը կարող է տարածվել ձեռքի, պարանոցի, որովայնի կամ ծնոտի հատվածում, ուստի մարդիկ այս հիվանդությունները հաճախ են շփոթում։ Խնդիրները միմյանցից տարբերելու համար հարկավոր է ուշադրություն դարձնել ցավի առաջացման պատճառին։ Ստենոկարդիայի դեպքում ցավը սովորաբար լինում է պատասխան ռեակցիա ֆիզիկական ակտիվությանը, հուզական լարվածությանը, ցուրտ պայմաններում գտնվելուն կամ սննդի ընդունմանը։ Ինչպես նշում են մասնագետները, ստենոկարդիայի դեպքում ցավոտ զգացողությունները սովորաբար մեղմվում են մի քանի րոպե անց, մինչդեռ սրտամկանի ինֆարկտով պայմանավորված տհաճ զգացողությունները ոչ միայն չեն մեղմվում, այլև էլ ավելի են տարածվում։

Սրտամկանի ինֆարկտի մասին հուշող այլ ախտանշանների շարքին են դասվում սրտխառնոցը, գլխապտույտները, հևոցը, անսպասելի անհանգստությունը, որը նման է խուճապային գրոհին, սաստիկ հազն ու աղմկոտ շնչառությունը։ Ընդ որում՝ հարկ է հիշել, որ որոշ դեպքերում սրտամկանի ինֆարկտի ախտանշանները կարող են պահպանվել մի քանի օր շարունակ։

Սրտամկանի ինֆարկտի ախտանշանների առկայության դեպքում հարկավոր է անհապաղ շտապօգնություն կանչել հնարավոր բարդություններից խուսափելու համար։ Ընդ որում՝ մասնագետներին հարկավոր է դիմել անգամ չնչին կասկածների դեպքում։ Մինչ բժիշկների ժամանելը հարկավոր է նստել որևէ հարմարավետ դիրքով, ասպիրինի դեղահաբ ընդունել, փորձել հնարավորինս հանգստանալ ու հետևել մասնագետների հրահանգներին։