5 արդյունավետ ժողովրդական միջոց գաստրիտի ախտանշանները մեղմելու և հիվանդության սրացումներից խուսափելու համար

19:12 • 02.04.21

Գաստրիտը ներկայում շատ տարածված հիվանդություն է, որի զարգացման հիմնական պատճառներն են սխալ սննդակարգն ու անորակ սննդի գործունեությունը երկար ժամանակ։ Բացի այդ, գաստրիտի զարգացմանն են նպաստում նաև ալկոհոլի, նիկոտինի ու դեղորայքի գործածությունը, ինչի պատճառով էլ այս հիվանդությունն այսքան տարածված է։

Հիվանդությունը բնորոշվում է ստամոքսի արտազատիչ ու շարժողական գործառույթների խանգարմամբ և դրսևորվում ախորժակի վատթարացմամբ, գխտոցով, ստամոքսի այրոցով ու ծանրության զգացմամբ, ինչպես նաև ստոծանու հատվածի ցավով։

Այս խանգարման բուժման ու կանխարգելման հիմնական միջոցը սննդակարգի կարգավորումն է, սակայն գաստրիտի սրման դեպքում նման միջոցների ձեռնարկումը կարող է բավարար չլինել տհաճ զգացողություններից ազատվելու համար։ Նման դեպքերում մասնագետները խորհուրդ են տալիս ընդունել բուսական թուրմեր, որոնք շատ արդյունավետ են ու չեն առաջացնում կողմնակի բարդություններ։

Ձեր ուշադրությանն ենք ներկայացնում հինգ ժողովրդական դեղամիջոցի բաղադրատոմս, որոնք կօգնեն պայքարել գաստրիտի դեմ, կմեղմեն ցավոտ զգացողություններն ու կկանխեն հիվանդության սրացումները։

1 ճաշի գդալ եղնջի չոր տերևներին ավելացնել 1 բաժակ եռման ջուր, դնել թույլ կրակին ու եռացնել 10 րոպե, այնուհետև թողնել հեղուկը սառչի ու քամել։ Ստացված թուրմը հարկավոր է ընդունել օրական 4-5 անգամ մեկական ճաշի գդալ։
2 թեյի գդալ վաղենակի ծաղիկներին ավելացնել 2 բաժակ եռման ջուր, թրմել 15 րոպե, այնուհետև քամել և խմել օրվա ընթացքում։
3 ճաշի գդալ չիչխանի հատապտուղներին ավելացնել կես լիտր տաք ջուր, դնել թույլ կրակին ու եռացնել 10 րոպե, այնուհետև քամել։ Ստացված թուրմը քաղցրացնել մեղրով ու խմել որպես թեյ։
1 բաժակ կարտոֆիլի հյութի մեջ լուծել 1 ճաշի գդալ մեղր և ընդունել ստացված խառնուրդն օրական երեք անգամ ուտելուց կես ժամ առաջ ⅓ բաժակ։ Բուժման կուրսը տևում է 10 օր, որից հետո հարկավոր է 10 օր տևողությամբ դադար անել և կրկնել կուրսը։
Ստեպղինը քերիչով մանրացնել ու հյութը քամել, այնուհետև ընդունել օրական մեկ անգամ կես բաժակ։ Այս հյութը կօգնի նվազեցնել ստամոքսի թթվայնությունը և կկանխի գաստրիտի սրացումները։

Այս բնական միջոցները շատ արդյունավետ են ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ Аif.ru