Որոնք են լավագույն բնական միջոցները մեջքի ցավերը մեղմելու համար․ 6 բաղադրատոմս

Մեջքի ցավերը բավական տարածված խնդիր են, որոնց առաջացման պատճառները կարող են տարբեր լինել։ Դրանք կարող են պայմանավորված լինել նյարդի բորբոքմամբ, միջանցիկ քամիների վնասակար ազդեցությամբ, գերծանրաբեռնվածությամբ և այլ պատճառներով, սակայն անկախ առաջացման պատճառից հարկավոր է անհապաղ միջոցներ ձեռնարկել ցավը մեղմելու համար։

Նման տհաճ խնդրից ազատվելու համար մարդիկ սովորաբար հատուկ քսուքներ են կիրառում, սակայն լինում են դեպքեր, երբ նման դեղամիջոցներ տվյալ պահին չեն լինում, ուստի օգնության են հասնում ոչ պակաս արդյունավետ բնական դեղամիջոցները։ Ավելին՝ շատ հաճախ իրենց քիմիական բաղադրության պատճառով դեղամիջոցներն առաջացնում են տարատեսակ կողմնակի բարդություններ ու ալերգիկ ռեակցիաներ, մինչդեռ ժողովրդական միջոցները պատրաստվում են բացառապես բնական բաղադրիչներից, ուստի չեն առաջացնում կողմնակի խնդիրներ և որևէ բաղադրիչի նկատմամբ անհատական անհանդուրժողականության բացակայության դեպքում չեն ունենում նաև հակացուցումներ։

Aif.ru կայքը ներկայացրել է մեջքի ցավերի դեմ պայքարի մի քանի պարզ ու արդյունավետ միջոց, որոնք կօգնեն հեշտությամբ մեղմել ցավն առանց դեղորայքի։

• Ծովաբողկի թարմ տերևներն ընկղմել եռման ջրի մեջ, այնուհետև տաք տերևները (չպետք է այրեն) դնել ախտահարված հատվածին, ծածկել պոլիէթիլենային թաղանթով և փաթաթել տաք կտորով։ Այս կոմպրեսը հարկավոր է թողնել մեկ ժամ։
• 50 գրամ հալվե վերայի հյութին ավելացնել 100 գրամ մեղր և 150 գրամ օղի ու լավ խառնել։ Մաքուր կտորը թրջել ստացված լուծույթով, դնել այն կոմպրեսի տեսքով ախտահարված հատվածին ու թողնել 1,5 ժամ։
• 100 գրամ ուրցին ավելացնել 1 լիտր ջուր, 15 րոպե եռացնել, այնուհետև թրմել ևս կես ժամ և քամել։ Ստացված եփուկն ավելացնել լոգանքի ջրին, տաք լոգանք ընդունել, որից հետո անմիջապես պառկել քնելու՝ ծածկվելով տաք ծածկոցով։
• Շատ արդյունավետ է նաև ուրցի թուրմը։ Հարկավոր է 1 թեյի գդալ ուրցին ավելացնել 1 բաժակ եռման ջուր, թրմել 1 ժամ և ընդունել օրական 3 անգամ մեկական ճաշի գդալ։
• 300 գրամ երիցուկի ծաղիկներին ավելացնել 1 լիտր ջուր և եռացնել, այնուհետև թրմել ևս 2 ժամ ու քամել։ Ստացված եփուկն ավելացնել լոգանքի ջրին ու տաք լոգանք ընդունել։
• 200 գրամ գիհիի փշատերևներին ավելացնել 1 լիտր ջուր, 30 րոպե եռացնել, այնուհետև եփուկն ավելացնել լոգանքի ջրին ու տաք լոգանք ընդունել։

Այս բնական միջոցները շատ արդյունավետ են ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: