Հազ, ցավ, հևոց և այլն․ որոնք են թոքերի քաղցկեղի մասին հուշող հիմնական ախտանշանները

Թոքերի քաղցկեղն ամենավտանգավոր ու տարածված ախտաբանություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է շատ երկար ժամանակ մնալ աննկատ, ինչի պատճառով էլ սովորաբար հայտնաբերվում է բավական ուշ, սակայն այնուամենայնիվ սա այն խնդիրներից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդութան մասին հուշող ախտանշաններն իմանալը շատ կարևոր է։ 

Քաղցկեղի այս տեսակի զարգացման հիմնական պատճառներից մեկը ծխախոտի գործածությունն է։ Ընդ որում՝ վտանգավոր է անգամ պասսիվ ծխելը։ Կախված ուռուցքի չափից և այլ օրգանների ախտահարվածությունից՝ այս հիվանդությունը կարող է դառնալ մահվան պատճառ, ուստի զարմանալի չէ, որ որքան շուտ է հիվանդությունն ախտորոշվում և նշանակվում բուժումը, այնքան ցածր է լինում մահվան հավանականությունը։

Cancer Research UK կազմակերպության մասնագետները բրիտանական Express պարբերականի հետ զրույցում ներկայացրել են այն հիմնական ախտանշանները, որոնք հուշում են այս վտանգավոր հիվանդության զարգացման մասին։ Մասնագետների խոսքով՝ թոքերի քաղցկեղին բնորոշ ամենատարածված ախտանշանը տևական հազն է, որի ձայնը կտրուկ փոխվում է կամ ի հայտ են գալիս ցավոտ զգացողություններ։ Եթե հազի դեպքում նկատվում են նաև արյան հետքեր, ապա հարկավոր է անհապաղ դիմել բժշկին։

Աճող ուռուցքի մասին հուշող մյուս ախտանշանը հևոցն է, որն ի հայտ է գալիս անգամ այն գործողությունների դեպքում, որոնք նախկինում հեշտ էին տրվում։ Նման դեպքերում հևոցի պատճառ կարող են դառնալ անգամ հասարակ տնային գործերը, ուստի այդ ախտանշանը ոչ մի դեպքում չի կարելի անուշադրության մատնել։

Ընդանուր առմամբ՝ քաղցկեղի այս տեսակի դեպքում նկատվող հիվանդությունների շարքին են դասվում այնպիսի ախտանշանները, ինչպիսին են չմեղմվող հազը, որն ուղեկցվում է արտասովոր զգացողություններով, ցավով կամ արտասովոր ձայներով ուղեկցվող հազը,  անբացատրելի հևոցը, խորխի մեջ արյան հետքերի առկայությունը, կրծքավանդակի կամ ուսի հատվածի ցավերը, կրծքավանդակի կրկնվող վարակները,  ախորժակի կորուստը, հոգնածությունը, քաշի անբացատրելի կորուստը։

Թոքերի քաղցկեղի մասին հուշող քիչ տարածված ախտանշանների շարքին են դասվում մատների ծայրերի փոփոխությունը, որի դեպքում դրանք այտուցվում են։ Բացի այդ, ուռուցքաբանները նախազգուշացնում են, որ քաղցկեղի բջիջների որոշ տեսակներ արտազատում են հորմոններ, որոնք էլ առաջացնում են քաղցկեղի հետ չասոցացվող ախտանշաններ։ Նման ախտանշանների շարքին կարող են դասվել ձեռքերի ու ոտքերի մատների թմրածությունը կամ ծակծկոցը, մկանային թուլությունը, քնկոտությունը, ընդհանուր թուլությունը, գլխապտույտները, մտքերի խառնաշփոթը, տղամարդկանց մոտ կրծքի այտուցվածությունն ու արյան մակարդուկների առաջացումը։

Բացի այդ, թոքերի վերին հատվածներում կարող են Պանկոստի ուռուցքներ առաջանալ, որոնց ևս բնորոշ են արտասովոր ախտանշաններ։ Այդ ախտանշանները պայմանավորված են լինում պարանոցից դեպի դեմքը ձգվող նյարդի վրա նորագոյացության գործադրած ճնշմամբ, ուստի դրանց շարքին կարող են դասվել կոպերից մեկի թուլությունը կամ իջեցումը, համապատասխան աչքի բիբի փոքրացումը, ինչպես նաև դեմքի մի կողմում քրտնարտադրության դադարումը։

Երբ թոքերում առաջացած ուռուցքն սկսում է տարածվել և ախտահարել նաև այլ օրգանները, ի հայտ են գալիս համապատասխան ախտաբանական փոփոխություններ, որոնց շարքին կարող են դասվել սաստիկ գլխացավերը, որոնք հաճախ ուղեկցվում են սրտխառնոցով, ինչպես նաև վերջույթների թուլությունը, փորափքանքն ու մաշկային քորը։

Նշված ախտանշանները ոչ միշտ են պայմանավորված լինում թոքերի քաղցկեղով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru