Ինչ է կատաղությունը․ հարուցիչի փոխանցման ճանապարհները, հիվանդության հիմնական դրսևորումներն ու բուժման և կանխարգելման միջոցները

13:02 • 12.04.21

Կատաղությունը շատ վտանգավոր հիվանդություն է, որը կարող է հաշված օրերի ընթացքում հանգեցնել մահվան, ուստի դրա դեմ ժամանակին միջոցներ ձեռնարկելը շատ կարևոր է։ Հիվանդությունը վարակման առաջին օրերին նկատելու և անհապաղ բուժումն սկսելու համար հարկավոր է առաջին հերթին սովորել տարբերել դրա ախտանշանները, ուստի ռուս հանրահայտ բժիշկ Ալեքսանդր Մյասնիկովը ներկայացրել է կատաղության հիմնական ախտանշաններն ու դրսևորումները։

Ինչպես նշում է Մյասնիկովը՝ կատաղությամբ վարակվելու դեպքում կանխարգելիչ միջոցներ չձեռնարկելը կարող է դառնալ մահվան պատճառ, մինչդեռ հիվանդության կանխարգելման միակ արդյունավետ միջոցը պատվաստումն է։

Մասնագետի խոսքով՝ վարակումը տեղի է ունենում վարակված կենդանիների, այդ թվում նաև ընտանի շների միջոցով։

«99 տոկոս դեպքերում մարդիկ վարակվում են ընտանի շներից, չնայած՝ կատուներն ավելի հաճախ են լինում այս հիվանդության վարակակիր», – նկատում է բժիշկը՝ հավելելով, որ վարակման հավանականությունը նվազեցնելու համար ընտանի կենդանիներին հարկավոր է անպայման պատվաստել կատաղության դեմ։

Բացի այդ, կատաղության վիրուսով կարելի է վարակվել նաև վայրի կենդանիներից, ուստի բնության գրկում գտնվելիս ոչ մի դեպքում չի կարելի անմիջական շփման մեջ մտնել վայրի կենդանիների հետ, շոյել կամ փորձել բռնել դրանց։ Հարկ է հիշել, որ վարակման դեպքում ինկուբացիոն (գաղտնի) շրջանը կարող է տևել մի շաբաթից մինչև մի տարի, ուստի վիրուսը կարող է բավական երկար ժամանակ լինել օրգանիզմում ու մնալ աննկատ, ինչի հետևանքով կլինիկական ախտանշանների ի հայտ գալու դեպքում մարդը կարող է գլխի չընկներ՝ ինչով են դրանք պայմանավորված։

Բժիշկ Մյասնիկովի խոսքով՝ կատաղությանը բնորոշ հիմնական ախտանշանների շարքին են դասվում․

մարմնում ցավոտ զգացողությունները,
տենդն ու մարմնի ջերմաստիճանի բարձրացումը,
ախտահարման հատվածում (օրինակ՝ կծածի տեղում) մաշկի կարմրածությունը,
սաստիկ դյուրագրգիռությունը,
անքնությունը,
ախորժակի կորուստը,
սպազմներով ուղեկցվող շնչառությունը։

«Հիվանդության կլինիկական դրսևորումների առկայության դեպքում այն մահացու է լինում, քանի որ ազդում է նյարդային համակարգի վրա և հանգեցնում սրտի կանգի», – նախազգուշացնում է մասնագետը՝ հավելելով, որ նման հետևանքներից խուսափելու համար վայրի կամ թափառող կենդանու կծածի դեպքում տուժածը պետք է անպայման պատվաստվի։ Ընդ որում՝ նման դեպքերում ներարկվում է իմունագլոբուլինի երկու չափաբաժին և պատվաստանյութի մի չափաբաժին։

Նյութի աղբյուրը՝ medikforum.ru