Զարկերակային գերճնշման դեմ որոշ դեղամիջոցների գործածությունը կարող է բարձրացնել քաղցկեղի զարգացման հավանականությունը․ գիտնականներ

Զարկերակային գերճնշումն ամենատարածված հիվանդություններից մեկն է, որը կարող է խիստ բացասաբար անդրադառնալ առողջական վիճակի վրա ու բարձրացնել մի շարք վտանգավոր հիվանդությունների, այդ թվում նաև սրտի նոպաների, գլխուղեղի կաթվածի, անոթալայնանքի, կոգնիտիվ գործառույթների թուլացման ու երիկամային անբավարարության զարգացման հավանականությունը։ 

Այս հիվանդության դեպքում մասնագետները որպես կանոն նշանակում են զարկերակային ճնշումը կարգավորող դեղամիջոցներ, սակայն այժմ կանադացի գիտնականների նոր հետազոտությունը ցույց է տվել, որ զարկերակային գերճնշման դեմ կիրառվող որոշ տարածված դեղամիջոցներ կարող են բարձրացնել մաշկի չարորակ ուռուցքների զարգացման հավանականությունը։

Հետազոտության արդյունքները հրապարակել է Canadian Medical Association Journal հեղինակավոր գիտական ամսագիրը։ Գիտնականներն ուսումնասիրել են Օնտարիոյի 66 տարեկան և 66-ից բարձր տարիքի 302 634 բնակչի առողջական վիճակի վերաբերյալ տվյալները, որոնց բոլորին 1998-2017 թվականներն ընկած ժամանակահատվածում նշանակվել են զարկերակային ճնշումը կարգավորող դեղամիջոցներ։

Գիտնականները պարզել են, որ թիազիդային միզամուղներ ընդունող հիվանդներն ավելի հաճախ են բախվում չարորակ մելանոմայի և կերատոկարցինոմայի՝ մաշկի քաղցկեղի երկու տարածված տեսակների խնդրին։

Մաշկի ոչ մելանոմային քաղցկեղը Կանադայում ուռուցքների ամենատարածված տեսակն է։ Ոչ պակաս տարածված է նաև մելանոման։ Միայն 2020 թվականին երկրում մելանոմա է ախտորոշվել 8000 մարդու մոտ, գրանցվել է հիվանդության հետևանքով մահվան 1300 դեպք։ Չնայած այն փաստին, որ մաշկի քաղցկեղի բուժումը սովորաբար բավական արդյունավետ է լինում, այնուամենայնիվ չարորակ մելանոման, որպես կանոն, բավական ագրեսիվ ընթացք է ունենում և շատ արագ է մետաստազավորվում։ 

Հետազոտությունը ցույց է տվել, որ թիազիդ ստացած 87 725 հիվանդի մոտ, ի տարբերություն այս դեղամիջոցը չընդունած հիվանդների, ոչ մելանոմային քաղցկեղի զարգացման հավանականությունը բարձրացել է 53 տոկոսով, իսկ չարորակ մելանոմայի զարգացման հավանականությունը՝ 60 տոկոսով։ Միևնույն ժամանակ ֆոտոտոքսիկ չհամարվող հակահիպերտենզիվ այլ դեղորայքի ընդունման դեպքում մաշկի քաղցկեղի զարգացման հավանականության բարձրացում չի գրանցվել։ 

Թիազիդային միզամուղները նախատեսված են երիկամների միջոցով մեզի հոսքը խթանելու համար, ինչը նվազեցնում է արյան շրջանառությունն ապահովող սրտամկանի ծանրաբեռնվածությունը։ Սա էլ իր հերթին նվազեցնում է զարկերակային ճնշումը։ Մեծ է հավանականությունը, որ այս հետազոտության արդյունքներին ծանոթանալուց հետո մաշկի քաղցկեղի բարձր ռիսկային խմբում գտնվող հիվանդներին բժիշկները կսկսեն նշանակել զարկերակային գերճնշման դեմ այլ դեղամիջոցներ՝ նման վտանգավոր ախտաբանության զարգացման հավանականությունը նվազեցնելու համար։