Ամենաարդյունավետ բնական միջոցները գաստրիտի տհաճ ախտանշանները մեղմելու համար․ 10 բաղադրատոմս

Գաստրիտը ներկայում շատ տարածված հիվանդություն է, որի զարգացման հիմնական պատճառներն են սխալ սննդակարգն ու անորակ սննդի գործունեությունը երկար ժամանակ։ Բացի այդ, գաստրիտի զարգացմանն են նպաստում նաև ալկոհոլի, նիկոտինի ու դեղորայքի գործածությունը, ինչի պատճառով էլ այս հիվանդությունն այսքան տարածված է։

Հիվանդությունը բնորոշվում է ստամոքսի արտազատիչ ու շարժողական գործառույթների խանգարմամբ և դրսևորվում ախորժակի վատթարացմամբ, գխտոցով, ստամոքսի այրոցով ու ծանրության զգացմամբ, ինչպես նաև ստոծանու հատվածի ցավով։

Այս խանգարման բուժման ու կանխարգելման հիմնական միջոցը սննդակարգի կարգավորումն է, սակայն գաստրիտի սրման դեպքում նման միջոցների ձեռնարկումը կարող է բավարար չլինել տհաճ զգացողություններից ազատվելու համար։ Նման դեպքերում մասնագետները խորհուրդ են տալիս ընդունել բուսական թուրմեր, որոնք շատ արդյունավետ են ու չեն առաջացնում կողմնակի բարդություններ։

Ձեր ուշադրությանն ենք ներկայացնում տասը արդյունավետ ժողովրդական դեղամիջոցի բաղադրատոմս, որոնք կօգնեն պայքարել գաստրիտի դեմ, կմեղմեն ցավոտ զգացողություններն ու կկանխեն հիվանդության սրացումները։

• 1։1։1 հարաբերակցությամբ խառնել մատուտակի (քաղցրարմատ) մանրացրած արմատները, հոռոմ-սամիթի սերմերն ու սեզի արմատները, այնուհետև 2 թեյի գդալ խառնուրդին ավելացնել մի բաժակ եռման ջուր ու թրմել 30-40 րոպե։ Ստացված խառնուրդը քամել և ընդունել մի բաժակ քնելուց առաջ։
• Խառնել հավասար քանակությամբ երիցուկի ծաղիկները, եղնջի տերևները, գորշ լաստենու պտղաբույլերը, նվենու (էվկալիպտ) տերևները, անիսոնի պտուղներն ու տատրակի տերևները, այնուհետև բոլոր բաղադրիչները լավ խառնել ու մանրացնել։ Խառնուրդի 10 գրամին ավելացնել կես լիտր եռման ջուր, մոտ երեք րոպե եռացնել, այնուհետև թրմել թերմոսի մեջ 4 ժամ և քամել։ Ստացված թուրմը հարկավոր է ընդունել օրական երկու անգամ կես բաժակ։
• 1 ճաշի գդալ թխենու չորացրած պտուղներին ավելացնել մի բաժակ եռման ջուր, 10-15 րոպե եփել, այնուհետև թողնել որոշ ժամանակ թրմվի և քամել։ Ստացված թուրմին ավելացնել 40 կաթիլ ակնամոմի 10%-անոց ոգեթուրմ և ընդունել օրական 2-3 անգամ կես բաժակ։
• Խառնել հավասար քանակությամբ դեղատնային երիցուկի ծաղիկները, հազարատերևուկի խոտը, անանուխի տերևներն ու լորենու ծաղիկները, այնուհետև ստացված խառնուրդի 2 թեյի գդալին ավելացնել մի բաժակ եռման ջուր, դնել կրակին ու եռացնել 5 րոպե։ Թրմել ևս երկու ժամ, այնուհետև քամել և ընդունել օրական երեք անգամ կես բաժակ։
• 1 ճաշի գդալ մեղրը լուծել 1 բաժակ եռման սակայն գոլ ջրում և խմել ուտելուց մի ժամ առաջ։ Այս լուծույթը հարկավոր է խմել օրական 3-4 բաժակ։
• Խառնել հավասար քանակությամբ առյուծագիի չորացրած խոտը, անանուխը, երիցուկը, քիմիոնի սերմերն ու հոռոմ-սամիթի սերմերը, ստացված խառնուրդի 2 թեյի գդալին ավելացնել 1 բաժակ եռման ջուր ու թրմել 20 րոպե։ Այս թուրմով բուժման կուրսը տևում է 3 շաբաթ, որից հետո հարկավոր է մեկ ամիս դադար անել և կրկնել կուրսը։
• 1։1։1 հարաբերակցությամբ խառնել դեղատնային երիցուկի ծաղիկները, խոցված սրոհունդի խոտն ու անանուխի տերևները, այնուհետև ստացված խառնուրդի 2 ճաշի գդալին ավելացնել մի բաժակ եռման ջուր և ամբողջ գիշեր թրմել թերմոսի մեջ։ Ստացված թուրմը հարկավոր է ընդունել օրական 3 անգամ ⅓ բաժակ։
• Հում կարտոֆիլը լվանալ ու լավ չորացնել, այնուհետև քերիչով մանրացնել ու քամել հյութը։ Թարմ հյութը հարկավոր է խմել օրական 3 անգամ ուտելուց 1-1,5 ժամ առաջ ստամոքսահյութի բարձր թթվայնության դեպքում։
• Շատ արդյունավետ կարող է լինել նաև կաղամբի թարմ հյութը։ Այն հարկավոր է ընդունել օրական 2-3 անգամ ուտելուց մեկ ժամ առաջ կես բաժակ։ Ընդ որում՝ թուրմը հարկավոր է ընդունել գոլ վիճակում։
• 2 ճաշի գդալ չորացրած ուրցը լցնել թերմոսի մեջ․ ավելացնել մի բաժակ եռման ջուր և թրմել 2-3 ժամ։ Ստացված թուրմը հարկավոր է ընդունել օրական 2-3 անգամ ուտելուց առաջ երկուական ճաշի գդալ։

Այս բնական միջոցները շատ արդյունավետ են ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ Аif.ru