Մասնագետը նշել է՝ ինչ ախտանշաններով կարող է դրսևորվել արյան մեջ խոլեստերինի բարձր մակարդակը

Խոլեստերինը ճարպանման նյութ է և համարվում է այն հիմնական բաղադրիչներից մեկը, որոնք օգնում են մարմնին տեղծել առողջ բջիջներ ու հորմոններ արտազատել: Սա շատ կարևոր նյութ է, սակայն դրա մակարդակի բարձրացումը կարող է շատ վտանգավոր խնդիրների, այդ թվում՝ սրտի հիվանդությունների ու գլխուղեղի կաթվածի զարգացման պատճառ դառնալ: Սա պայմանավորված է նրանով, որ խոլեստերինի բարձր մակարդակի դեպքում դրա մասնիկները կուտակվում են անոթներում և հանգեցնում են խցանման՝ խանգարելով արյան շրջանառությունը: Նման խնդիրներից խուսափելու համար հարկավոր է վերահսկողության տակ պահել խոլեստերինի մակարդակն ու խուսափել դրա բարձրացումից:

Օրգանիզմում խոլեստերինի մակարդակի բարձրացումը սովորաբար չի ուղեկցվում որևէ ակնհայտ ախտանշանով, ուստի այն վերահսկողության տակ պահելու և խնդիրը շուտ հայտնաբերելու համար հարկավոր է պարբերաբար արյան հետազոտություն անցնել։ Սակայն այնուամենայնիվ կան որոշակի ախտանշաններ, այդ թվում նաև արտաքին ախտանշաններ, որոնց ուշադրություն դարձնելը կօգնի ժամանակին հայտնաբերել խնդիրն ու միջոցներ ձեռնարկել։

Ինչպես Sputnik ռադիոկայանի հետ զրույցում նշել է թերապևտ Գեորգի Սապեգոն, խոլեստերինի մակարդակի բարձրացման մասին հուշող նման արտաքին ախտանշաններից մեկը կարող է լինել կոպերին քսանտելազմներ կոչվող նորագոյացությունների առկայությունը։ Մասնագետի խոսքով՝ մարդու համար առավել վտանգավոր է ցածր խտության լիպոպրոտեինների՝ «վատ» խոլեստերինի մակարդակի բարձրացումը, քանի որ «վատ» խոլեստերինը նպաստում է աթերոսկլերոզի մակարդակի բարձրացմանը, ինչն էլ բացասաբար է անդրադառնում գլխուղեղի, սրտամկանի, աղիների կամ ոտքերի զարկերակների վրա։

Խոլեստերինի հենց այս տեսակի մակարդակի բարձրացումն էլ դառնում է կոպերին քսանտելազմների առաջացման պատճառ, որոնք նման են լինում մաշկի տակ կուտակված ճարպային դեղնավուն նյութի։

Ինչպես ընդգծել է Սապեգոն, առաջացող բոլոր քսանտելազմների կեսը պայմանավորված է լինում արյան մեջ խոլեստերինի բարձր մակարդակով։ Եթե նման ճարպային նորագոյացություններն ի հայտ են գալիս երեխաների կոպերին, ապա հարկավոր է անհապաղ դիմել մասնագետին, քանի որ խնդիրը կարող է պայմանավորված լինել խոլեստերինային փոխանակության խանգարումներով։

Բացի այդ, փորձագետը նաև նկատել է, որ հաճախ օրգանիզմում խոլեստերինի բարձր մակարդակի խնդիրը հայտնաբերվում է անոթային համակարգի զգալի ախտահարումների և գլխուղեղի, սրտամկանի ու վերջույթների արյան շրջանառության խանգարումների դեպքում, ինչը նշանակում է, որ խնդիրը բավական լուրջ է։ Նման դեպքերում արյան մեջ խոլեստերինի բարձր մակարդակը կարող է դրսևորվել այնպիսի ախտանշաններով, ինչպիսին են կրծքավանդակի կամ ոտքերի սուր ցավերը, հևոցը, անսպասելի թուլությունը, ինչպես նաև խոսքի կամ հավասարակշռության խանգարումները։