Լավագույն բնական միջոցները կոկորդի ցավը մեղմելու համար․ 7 բաղադրատոմս

Կոկորդի ցավը շնչառական համակարգի հիվանդություններին բնորոշ ամենատարածված ախտանշաններից մեկն է, սակայն այն կարող է հանդես գալ նաև որպես առանձին խնդիր: Նման ցավը բավական տհաճ է և խիստ բացասաբար է անդրադառնում կյանքի որակի վրա՝ թույլ չտալով ինչպես հարկն է կատարել անհրաժեշտ գործերը, ուստի զարմանալի չէ, որ առաջին իսկ տհաճ զգացողության դեպքում մարդիկ փորձում են հնարավորինս շուտ ազատվել դրանից:

Կոկորդի ցավի դեմ պայքարում, որպես կանոն, կիրառվում են տարատեսակ դեղամիջոցներ, բուժիչ օշարակներ կամ սառնաշաքարներ, որոնք սակայն ոչ միշտ են բավական արդյունավետ լինում, իսկ երբեմն էլ մի շարք կողմնակի բարդություններ են առաջացնում, քանի որ պարունակում են վնասակար քիմիական տարրեր, սակայն, բարեբախտաբար, նմանատիպ ազդեցությամբ օժտված դեղամիջոցներ կարելի է պատրաստել նաև ինքնուրույն՝ օգտագործելով միայն բնական բաղադրիչներ, որոնք  ոչ միայն ավելի արդյունավետ են, այլև շատ ավելի հասանելի են ու անվնաս։

Ձեր ուշադրությանն ենք ներկայացնում չորս պարզ, արդյունավետ ու փորձված ժողովրդական միջոց, որոնք կօգնեն հեշտությամբ մեղմել կոկորդի ցավն ու կազատեն տհաճ զգացողություններից։

• Կես լիտր կաթին ավելացնել 100 գրամ ստեպղին, դնել կրակին, եփել մինչև ստեպղինը եփվի, այնուհետև թուրմը քամել։ Ստացված ըմպելիքը կարելի է մանր կումերով խմել կամ կիրառել կոկորդի ողողումների համար։
• 5 գրամ ազնվամորու տերևներն ու 5 գրամ տատրակի տերևները լցնել թերմոսի մեջ, ավելացնել մի բաժակ եռման ջուր ու թրմել 8 ժամ։ Ստացված թուրմն օգտագործել կոկորդի ողողումներ ու ինհալացիաներ անելու համար։
• 2 ճաշի գդալ սպիտակ խաղողից ստացված չամիչին ավելացնել մի բաժակ ջուր, դնել ոչ շատ թույլ կրակին մինչև եռա, այնուհետև շարունակել եփել ևս 10 րոպե։ Ստացված թուրմին ավելացնել 1 ճաշի գդալ կիտրոնի հյութ և ընդունել հեղուկն օրական 3-4 անգամ 0,3 բաժակ գոլ վիճակում։ Ցանկության դեպքում կարելի է քաղցրացնել թուրմը մեղրով։
• 1 ճաշի գդալ նվենու մանրացրած ու չորացրած տերևներին ավելացնել 200 մլ եռման ջուր, 10 րոպե եռացնել ոչ շատ թույլ կրակին, այնուհետև ծածկել տարան տաք սրբիչով ու թրմել 15 րոպե։ Ստացված թուրմը քամել և օգտագործել օրական 3-4 անգամ կոկորդի ողողումներ անելու համար:
• Խառնել հավասար քանակությամբ վաղենակի ծաղիկները, նվենու տերևները, մասուրի պտուղները, դեղատնային երիցուկի ծաղիկներն ու օշինդրի խոտը, այնուհետև բոլոր բաղադրիչները մանրացնել։ Խառնուրդի 1 ճաշի գդալին ավելացնել մի բաժակ եռման ջուր, 4 ժամ թրմել թերմոսի մեջ, այնուհետև քամել։ Ստացված թուրմը հարկավոր է օգտագործել օրական 4-5 անգամ կոկորդի ողողումներ անելու համար:
• 1 ճաշի գդալ չորացրած խոցված սրոհունդի տերևներին ու ծաղիկներին ավելացնել մի բաժակ եռման ջուր, տարան փաթաթել տաք կտորով, թրմել կես ժամ, այնուհետև քամել։ Ստացված թուրմը հարկավոր է օգտագործել օրական 5-6 անգամ կոկորդի ողողումներ անելու համար:
• 1 ճաշի գդալ կեչու մանրացրած ու չորացրած տերևներին ավելացնել մի բաժակ եռման ջուր, 5 րոպե դնել թույլ կրակին, այնուհետև թողնել հեղուկը սառչի։ Ստացված թուրմը քամել և օգտագործել օրական 5-6 անգամ կոկորդի ողողումներ անելու համար:

Այս բնական միջոցները շատ պարզ են ու արդյունավետ և օգնում են շատ արագ ազատվել կոկորդի ցավից ու տհաճ զգացողություններից, սակայն հարկ է հիշել, որ որոշ դեպքերում նման ցավը կարող է պայմանավորված լինել առողջական լուրջ խնդիրներով, ուստի նման միջոցները կարելի է կիրառել բացառապես մասնագետի հետ խորհրդակցելուց ու անհրաժեշտ բուժզննումն անցնելուց հետո։ Ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել ու լուրջ բարդություններ առաջացնել: Բացի այդ, միայն փորձառու մասնագետը կկարողանա պարզել կոկորդի ցավի հիմնական պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru