Ինչպես մեղմել մեջքի ցավերը բնական միջոցներով․ 8 արդյունավետ միջոց

Մեջքի ցավերը բավական տարածված խնդիր են, որոնց առաջացման պատճառները կարող են տարբեր լինել։ Դրանք կարող են պայմանավորված լինել նյարդի բորբոքմամբ, միջանցիկ քամիների վնասակար ազդեցությամբ, գերծանրաբեռնվածությամբ և այլ պատճառներով, սակայն անկախ առաջացման պատճառից հարկավոր է անհապաղ միջոցներ ձեռնարկել ցավը մեղմելու համար։

Նման տհաճ խնդրից ազատվելու համար մարդիկ սովորաբար հատուկ քսուքներ են կիրառում, սակայն լինում են դեպքեր, երբ նման դեղամիջոցներ տվյալ պահին չեն լինում, ուստի օգնության են հասնում ոչ պակաս արդյունավետ բնական դեղամիջոցները։ Ավելին՝ շատ հաճախ իրենց քիմիական բաղադրության պատճառով դեղամիջոցներն առաջացնում են տարատեսակ կողմնակի բարդություններ ու ալերգիկ ռեակցիաներ, մինչդեռ ժողովրդական միջոցները պատրաստվում են բացառապես բնական բաղադրիչներից, ուստի չեն առաջացնում կողմնակի խնդիրներ և որևէ բաղադրիչի նկատմամբ անհատական անհանդուրժողականության բացակայության դեպքում չեն ունենում նաև հակացուցումներ։

Aif.ru կայքը ներկայացրել է մեջքի ցավերի դեմ պայքարի մի քանի պարզ ու արդյունավետ միջոց, որոնք կօգնեն հեշտությամբ մեղմել ցավն առանց դեղորայքի։

• Խառնել հավասար քանակությամբ երիցուկի չորացրած ծաղիկները, եռագույն մանուշակի չորացրած խոտը, կռատուկի ու եզան լեզվի մանրացրած արմատները, այնուհետև ստացված խառնուրդի 1 ճաշի գդալը լցնել ապակյա տարայի մեջ ու ավելացնել այնքան եռման ջուր, որպեսզի հեղուկը մի փոքր ծածկի դեղաբույսերը։ Ծածկել տարան կափարիչով ու թողնել թրմվի մինչև բույսերը փափկեն, որից հետո դնել բույսերի խառնուրդը ցավոտ հատվածին, ծածկել բամբակյա կտորով ու պոլիէթիլենային թաղանթով և փաթաթել տաք սրբիչով։ Թողնել կոմպրեսը 15-20 րոպե, որից հետո այն հանել, տաք հագուստ հագնել կամ պառկել ու ծածկվել տաք ծածկոցով։
• Կեչու տերևներն ընկղմել եռման ջրի մեջ, այնուհետև դրանք հաստ շերտով դնել ցավոտ հատվածին, ծածկել պոլիէթիլենային թաղանթով ու փաթաթել տաք բրդյա ծածկոցով՝ թողնելով կոմպրեսը գործի։
• Քերիչով մանրացրած խնձորն ու ծովաբողկի արմատը խառնել հավասար քանակությամբ, այնուհետև ստացված խառնուրդը քսել ցավոտ հատվածին, ծածկել պորիէթիլենային թաղանթով և փաթաթել տաք կտորով։ Այս բուժիչ կոմպրեսը հարկավոր է թողնել մեկ ժամ։
• Հում կարտոֆիլը քերիչով մանրացնել, ավելացնել նույն քանակությամբ մեղր և լավ խառնել։ Ստացված խառնուրդը քսել ցավոտ հատվածին, ծածկել պոլիէթիլենային թաղանթով և փաթաթել տաք կտորով՝ թողնելով կոմպրեսը մեկ ժամ։
• Ծովաբողկը քերիչով մանրացնել ու խյուս դարձնել, այնուհետև ստացված խյուսը քսել մաքուր կտորին, դնել կոմպրեսը ցավոտ հատվածին ու թողնել 20-30 րոպե։
• Մի դույլ ջուրը տաքացնել մինչև այն հասնի Ցելսիուսի սանդղակով 50 աստիճան ջերմաստիճանի, որից հետո ջրին ավելացնել 5-6 տուփ չորացրած լամինարիա ու թրմել կես ժամ։ Թրմվելուց հետո ջրիմուռները քամել, այնուհետև ստացված զանգվածը 2 սմ հաստությամբ շերտով քսել թանզիֆե անձեռոցիկին, դնել այն ցավոտ հատվածին ու ծածկել նախ պոլիէթիլենային թաղանթով, ապա նաև բամբակի շերտով։ Ամրացնել բուժիչ կոմպրեսը բինտի միջոցով ու թողնել 1,5-2 ժամ։
• 1,5 բաժակ բողկի հյութին ավելացնել 1 բաժակ մեղր և 0,5 բաժակ օղի, լավ խառնել մինչև բոլոր բաղադրիչները լուծվեն, այնուհետև օգտագործել ստացված լուծույթը ցավոտ հատվածին քսելու և շփումներ անելու համար։
• Կռատուկի տերևները լվանալ ու ընկղմել եռման ջրի մեջ, այնուհետև դնել դրանք ցավոտ հատվածին, ծածկել պոլիէթիլենային թաղանթով ու փաթաթել տաք բրդյա ծածկոցով՝ թողնելով կոմպրեսը 30-40 րոպե։

Այս բնական միջոցները շատ արդյունավետ են ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: