Հայտնի է՝ սննդամթերքի որ տեսակները կարող են դառնալ սալմոնելոզով վարակվելու պատճառ

Սալմոնելոզը սուր աղիքային հիվանդություն է, որը բնորոշվում է օրգանիզմի ծանր թունավորմամբ և կլինիկական ախտանշանների բազմազանությամբ։ Բժիշկ-վարակաբան Ելենա Շարովայի խոսքով՝ սա շատ վտանգավոր ախտաբանություն է, որի հարուցիչները բազմանում են սննդամթերքի տարբեր տեսակների մեջ՝ որևէ կերպ չանդրադառնալով դրանց արտաքին տեսքի կամ համային առանձնահատկությունների վրա, ուստի վարակումից խուսափելու համար հարկավոր է անչափ ուշադիր լինել։

Վարակված մթերքը սննդի մեջ օգտագործելուց հետո հիվանդության կլինիկական ախտանշանների՝ բարձր ջերմության, հոգնածության, թուլության, սրտխառնոցի, փսխման ու աղեստամոքսային տրակտի այլ խանգարումների ի հայտ գալու համար կպահանջվի ընդամենը 6-12 ժամ, ուստի նման խնդիրներից խուսափելու համար հարկավոր է իմանալ՝ որոնք են սալմոնելոզով վարակվելու ամենահավանական աղբյուրներն ու ինչ է հարկավոր անել վարակումը կանխելու համար։

Միս

Թռչնամիսը շատ համեղ, օգտակար ու դիետիկ մթերք է, սակայն այն կարող է դառնալ այս վտանգավոր հիվանդությամբ վարակման պատճառ, ուստի հարկավոր է շատ ուշադիր լինել։ Թռչնամսով ուտեստներ պատրաստելիս հարկավոր է համոզվել, որ այն հնարավորինս լավ է եփվել ու տապակվել (հատկապես՝ ոկսորներին մոտ հատվածներում), այլապես այն կարող է սալմոնելոզի հարուցիչներ պարունակել։

Սակայն վատ պատրաստված թռչնամիսի գործածությունը սալմոնելոզով վարակվելու միակ միջոցը չէ։ Վտանգավոր կարող են լինել նաև խոզի միսը, տավարի միսն ու գառան միսը, ուստի դրանց գործածության դեպքում ևս հարկավոր է շատ ուշադիր լինել ու հնարավորինս լավ եփել մթերքը։

Կաթ և կաթնամթերք

Շատերը կաթն ու կաթնամթերքը գնում են շուկայից կամ գյուղերից՝ համարելով այն ավելի առողջարար, մինչդեռ մասնագետները հորդորում են հրաժարվել նման կաթնամթերքից կամ շատ ուշադիր լինել գնելու դեպքում։ Հատկապես վտանգավոր կարող է լինել նոր կթած կաթը, ուստի նման կաթ գնելու դեպքում այն հարկավոր է անպայման եռացնել։ Փորձագետները խորհուրդ չեն տալիս օգտագործել այս ըմպելիքը մինչ ջերմային մշակման ենթարկելը, ինչպես նաև հորդորում են շատ զգույշ լինել տնական պանիր ու թթվասեր օգտագործելիս։

Հավկիթ

Հում հավկիթի գործածությունը բավական տարածված է, մինչդեռ մասնագետները նախազգուշացնում են, որ նման սովորությունը կարող է շատ վտանգավոր լինել։ Բանն այն է, որ հավկիթի կեղևին հայտնված Salmonella բակտերիան կարող է ընդամենը 5 ժամում ներթափանցել դրա մեջ, իսկ նման հավկիթի գործածությունը կարող է լուրջ խնդիրների պատճառ դառնալ։ Սա է պատճառը, որ վարակումից խուսափելու համար հավկիթը հարկավոր է անպայման շատ լավ եփել և համոզվել, որ դեղնուցն ու սպիտակուցը չունեն հում մնացած հատվածներ։

Ձուկ

Սալմոնելոզի հարուցիչ Salmonella բակտերիան խիստ կայուն է աղով մշակման ու ծխեցման նկատմամբ, ուստի վարակումից խուսափելու համար աղով մշակված կամ ապխտած ձկների գործածությունից ևս հարկավոր է հրաժարվել։ Մասնագետները խորհուրդ են տալիս նախապատվությունը տալ միայն ջերմային մշակում անցած ձկներին։ Ավելին՝ անգամ հում ձուկը հարկավոր է գնել միայն փորձված վաճառողներից ու խանութներից։

Հում մրգեր ու բանջարեղեն

Մրգերն ու բանջարեղենը համարվում են մեծ քանակությամբ վիտամինների ու հանքանյութերի հարուստ աղբյուր, ուստի մասնագետները հորդորում են անպայման ներառել դրանք սննդակարգում, սակայն անգամ նման առողջարար մթերքը կարող է դառնալ սալմոնելոզով վարակվելու պատճառ։ Նման խնդրից խուսափելու համար հարկավոր է գործածությունից առաջ անպայման շատ լավ լվանալ դրանք հոսող ջրով։ Ընդ որում, վտանգավոր կարող են լինել անգամ սեփական հողամասում աճեցված ու մշակված մրգերն ու բանջարեղենը, ուստի անգամ այս դեպքում հարկավոր է շատ ուշադիր լինել։

Նյութի աղբյուրը՝ hronika.info