Որ դեպքերում է գլխացավը հուշում գլխուղեղի քաղցկեղի մասին

Գլխացավն ամենատարածված խնդիրներից է, որը մարդիկ սովորաբար մեղմում են ցավազրկող դեղորայքի միջոցով, սակայն մասնագետները հաճախ են շեշտում, որ ցավի պատճառը պարզելը շատ կարևոր է, քանի որ երբեմն այն նախազգուշացնում է շատ վտանգավոր խանգարումների մասին, որոնք անտեսելը կարող է ճակատագրական լինել։ 

Նման խանգարումներից մեկը կարող է լինել գլխուղեղի քաղցկեղը, որի բուժման արդյունավետությունն ու հնարավոր հետևանքների կանխարգելումը կախված է հիվանդության վաղ ախտորոշումից։ Սա է պատճառը, որ լուրջ բարդություններից խուսափելու համար հարկավոր է իմանալ, թե որ դեպքերում է գլխացավը հուշում նման վտանգավոր խնդրի մասին։

Մասնագետների խոսքով՝ գլխուղեղի քաղցկեղով պայմանավորված գլխացավը սովորաբար ուղեկցվում է որոշակի ախտանշաններով, որոնք նկատելու դեպքում հարկավոր է անհապաղ դիմել մասնագետին։ Առաջին հերթին մասնագետները հորդորում են ուշադրութուն դարձնել սրտխառնոցով ուղեկցվող գլխացավին։ Բացի այդ, գլխուղեղի քաղցկեղի մասին հուշող ախտանշանների շարքին է դասվում նաև վերջին շրջանում ի հայտ եկած գլխացավերի հաճախակի բնույթ ստանալը։ Հատկապես վտանգավոր է, երբ գլխացավը միաժամանակ է ուղեկցվում այս երկու գործոնով։

Գիշերը գլխացավից արթնանալը նույնպես չի կարելի անուշադրության մատնել, քանի որ այն նույնպես կարող է պայմանավորված լինել գլխուղեղի քաղցկեղով։ Բացի այդ, այս հիվանդության մասին կարող են հուշել նաև գլխացավի ժամանակ աչքերի առաջ հայտնվող մուգ բծերը կամ վառ լույսերը, ուստի նման արտասովոր ախտանշանների առկայությունը նույնպես չի կարելի անտեսել։

Գլխուղեղի ուռուցքի ախտանշանները կարող են զարգանալ շաբաթների կամ ամիսների ընթացքում։ Cancer Research UK կազմակերպության մասնագետները խորհուրդ են տալիս դիմել մասնագետին անսպասելի ի հայտ եկած գլխացավի նոպաների, գիշերները նկատվող գլխացավերի ու սրտխառնոցի, տեսողության խնդիրների կամ մի քանի շաբաթվա կամ ամսվա ընթացքում վիճակի կտրուկ վատթարացման դեպքում։

Ինչպես բացատրում են մասնագետները, գլխուղեղի քաղցկեղի դեպքում ուռուցքի մեծացման հետ մեկտեղ բարձրանում է նաև ներգանգային ճնշումը, ինչն էլ հանգեցնում է գլխացավերի։ Բանն այն է, որ մարդու գանգը կազմված է կարծր ոսկրային հյուսվածքից, ուստի գլխուղեղն ունի միայն հստակ սահմանված տեղ։ Ուռուցքի մեծացման դեպքում գանգի ոսկրային հյուսվածքներն սկսում են ճնշում գործադրել գլխուղեղի հյուսվածքների վրա, ինչն էլ կարող է դառնալ ոչ միայն գլխացավերի, այլև տեսողության զգալի վատթարացման պատճառ։

Նման դեպքերում տեսողությունը կարող է պարբերաբար վատթարանալ ու վերականգնվել, իսկ կողմնային տեսողությունը կարող է աստիճանաբար վատթարանալ, ինչի հետևանքով հիվանդը կարող է չնկատել այլ մարդկանց ու առարկաները։

Գլխուղեղի քաղցկեղն առավել հաճախ ախտորոշվում է 85-89 տարեկան անձանց շրջանում։ Բացի այդ, գոյություն ունի նաև փոքր, սակայն ակնհայտ կապ ավելորդ քաշի ու գլխուղեղի քաղցկեղի զարգացման միջև․ հիվանդների 2%-ի մոտ հիվանդությունը պայմանավորված է լինում ավելորդ կիլոգրամներով։ Բանն այն է, որ ճարպային հյուսվածքների ուղարկած ազդանշանները կարող են ազդել աճի հորմոնի, բորբոքումների ու սեռական հորմոնների վրա։ Ավելին՝ ճարպակալումը կապված է ոչ միայն գլխուղեղի քաղցկեղի, այլև արգանդի քաղցկեղի, ձվարանների քաղցկեղի, վահանագեղձի քաղցկեղի և աղիների քաղցկեղի հետ, ուստի այս ռիսկային գործոնից հարկավոր է օր առաջ ազատվել։

Նյութի աղբյուրը՝ medikforum.ru