Որոնք են քաղցկեղի վաղ փուլերի մասին հուշող հիմնական ախտանշանները

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է ախտահարել գրեթե բոլոր օրգաններն ու հյուսվածքները և ախտորոշվել ինչպես կանանց, այնպես էլ տղամարդկանց մոտ։ Սա դասվում է այն հիվանդությունների շարքին, որոնց վաղ ախտորոշումը բարձրացնում է բարեհաջող բուժման հավանականությունը, մինչդեռ շատ հաճախ մարդիկ չեն նկատում հիվանդության մասին նախազգուշացնող ախտանշանները, ինչի հետևանքով էլ այն չափազանց ուշ է հայտնաբերվում։

Այս հիվանդությունը ժամանակին ախտորոշելու և բարեհաջող բուժելու համար հարկավոր է տարբերել դրա վաղ փուլերի մասին հուշող ախտանշաններն ու դրանց առկայության դեպքում անհապաղ դիմել բժշկին, սակայն ռուս բժիշկ-ուռուցքաբան Գրիգորի Կոբյակովի խոսքով՝ այս հիվանդության զարգացման վաղ փուլերում սովորաբար ի հայտ եկող ախտանշաններն առաջին հայացքից կարող են անկարևոր խանգարում թվալ, ինչի պատճառով շատերը դրանք պարզապես անուշադրության են մատնում։

Մասնագետը ներկայացրել է քաղցկեղի հնարավոր վաղ ախտանշանները՝ նշելով, որ դրանցից մեկը կարող է լինել լեզվի վրա առաջացած արտասովոր փառը։ Առհասարակ լեզվին առաջացած փառը ոչ միշտ է պայմանավորված լինում չարորակ հիվանդությամբ, սակայն այն կարող է կապված լինել աղեստամոքսային տրակտում տեղի ունեցող վտանգավոր փոփոխությունների հետո, ուստի նման փառ նկատելու դեպքում հարկավոր է անպայման բուժզննում անցնել վտանգավոր հիվանդությունները բացառելու կամ հաստատելու և բուժումն սկսելու համար։

Բացի այդ, քաղցկեղի զարգացման վաղ փուլերի մասին հուշող ախտանշանների շարքին կարող են դասվել նաև աղիների բնականոն աշխատանքի փոփոխությունները, որոնց մարդիկ հազվադեպ են ուշադրություն դարձնում։ Ուռուցքաբանը խորհուրդ է տվել երբեք չանտեսել այնպիսի խնդիրները, ինչպիսին են հաճախակի բնույթ ստացած փորլուծությունները կամ փորկապությունները, որոնք պայմանավորված չեն անորակ սննդի գործածությամբ։ Այս ախտանշանները դասվում են աղիների քաղցկեղին բնորոշ ախտանշանների շարքին, ուստի դրանք անուշադրության մատնելը կարող է ճակատագրական լինել ու հանգեցնել շատ լուրջ հետևանքների։

Բացի այդ, ոչ պակաս կարևոր ախտանշան կարող է լինել նաև կղանքի գույնի փոփոխությունը։ Մասնագետը, մասնավորապես, խորհուրդ է տվել ոչ մի դեպքում չանտեսել արտասովոր բաց գույնի՝ գրեթե սպիտակ կղանքի առկայությունը, քանի որ քաղցկեղի դրսևորումներից մեկը կարող է լինել նաև այս փոփոխությունը։

Կոբյակովի խոսքով՝ շատ կարևոր է նաև ախորժակի կորուստն ու քաշի կտրուկ նվազումը ժամանակին նկատելը, քանի որ այս ախտանշանները կարող են հուշել օնկոլոգիական հիվանդությունների տարբեր տեսակների մասին։ Նման ախտանշաններով կարող են դրսևորվել ինչպես աղեստամոքսային տրակտում ընթացող չարորակ գործընթացները, այնպես էլ թոքերի չարորակ նորագոյացություններն ու կրծքագեղձի քաղցկեցը, ուստի հարկավոր է շատ ուշադիր լինել ու ժամանակին բուժզննում անցնել։ 

Բացի այդ, մասնագետը խորհուրդ է տվել տղամարդկանց ուշադրություն դարձնել միզարձակման հետ կապված փոփոխություններին, որոնք ևս կարող են հուշել վտանգավոր ախտաբանության զարգացման մասին։ Նրա խոսքով՝ տհաճ զգացողություններով ու որովայնի ստորին հատվածի ցավով ուղեկցվող միզազատությունը կարող է շատ վտանգավոր ախտանշան լինել, ուստի նման խնդիրների առկայության դեպքում հարկավոր է անհապաղ դիմել մասնագետին ու բուժզննում անցնել հնարավորինս շուտ խնդրի պատճառը պարզելու և անհրաժեշտության դեպքում բուժումն սկսելու համար։

Շատ կարևոր է նաև մաշկի ու մասնավորապես խալերի փոփոխություններին հետևելը, քանի որ խալի չափի կամ ձևի փոփոխությունը, ինչպես նաև խալի անբացատրելի վնասվածքն ու արյունահոսությունը կարող են հուշել մաշկի քաղցկեղի ամենավտանգավոր ու ագրեսիվ տեսակներից մեկի՝ մելանոմայի մասին, որի հնարավորինս վաղ ախտորոշումն ու բուժումը շատ կարևոր է թերապիայի բարեհաջող ելքի համար։

Նշված ախտանշանները ոչ միշտ են պայմանավորված լինում չարորակ հիվանդություններով, ուստի խուճապի կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել ուռուցքաբանի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru