Ինչպես ազատվել մաշկի մուգ պիգմենտային հետքերից ու պեպեններից․ 8 արդյունավետ բնական միջոց

Մաշկի մուգ պիգմենտային հետքերն ու պեպենները բավական տարածված խնդիր են, որոնք կարող են պայմանավորված լինել տարբեր պատճառներով: Նման հետքերի առաջացմանը նպաստող հիմնական գործոնների շարքին են դասվում հղիությունը, արևի ուլտրամանուշակագույն ճառագայթների վնասակար ազդեցությունը, օրգանիզմի ծերացումը, ինչպես նաև գենետիկ նախատրամադրվածությունը:

Նման պիգմենտային հետքերն ու պեպենները ժամանակի ընթացքում կարող են ավելանալ, մեծանալ և դառնալ շատ ավելի ակնհայտ, ուստի զարմանալի չէ, որ մարդիկ փորձում են ամեն կերպ ազատվել դրանցից ի հայտ գալուն պես: Ներկայում գոյություն ունեն բաղմաթիվ կոսմետիկ միջոցներ մաշկը գունաբացելու և մուգ հետքերից ու պեպեններից ազատվելու համար, որոնք, սակայն, ոչ միշտ են բավական արդյունավետ լինում, իսկ երբեմն էլ հանգեցնում են կողմնակի բարդությունների զարգացման։ Այնուամենայնիվ ոչ բոլորին է հայտնի, որ կան նաև նման պիգմենտային հետքերի դեմ պայքարի բավական արդյունավետ բնական միջոցներ, որոնք շատ ավելի հասանելի են։

Ձեր ուշադրությանն ենք ներկայացնում նմանատիպ բնական դիմակներից մի քանիսը, որոնք կօգնեն գունաբացել մաշկն ու ազատվել տհաճ հետքերից: Ընդ որում՝ այս դիմակները ոչ միայն արդյունավետ են ու հասանելի, այլև չեն առաջացնում կողմնակի բարդություններ ու առողջական խնդիրներ:

• 1 ճաշի գդալ բռնչիի չորացրած ու մանրացրած ծաղիկներին ավելացնել կես բաժակ եռման ջուր, տարան ծածկել տաք կտորով ու թրմել 40 րոպե։ Ստացված թուրմին ավելացնել 1 թեյի գդալ սոխի հյութ, լավ խառնել ու բամբակյա սկավառակի օգնությամբ քսել մաշկին։
• 2 ճաշի գդալ տրորած ու խյուս դարձրած կանաչ ոլոռին (թարմ կամ պահածոյացված) ավելացնել 2 ճաշի գդալ թթված կաթ (простокваша), լավ խառնել, այնուհետև ստացված խառնուրդը քսել մաշկին։ Թողնել դիմակը 15-20 րոպե, որից հետո լվացվել սառը ջրով։
• Մաղադանոսը մանր կտրատել ու հյութը քամել, այնուհետև ստացված հյութին ավելացնել նույն քանակությամբ չեռացրած կաթ ու քսել խառնուրդը մաշկին։ Թողնել դիմակը 15 րոպե, որից հետո լվացվել։
• 1 ճաշի գդալ ելակի խյուսին ավելացնել 2 ճաշի գդալ թթված կաթ (простокваша), լավ խառնել, որից հետո ստացված խառնուրդը քսել մաշկին և թողնել 15-20 րոպե։
• Ձվի դեղնուցը լավ հարել, ավելացնել 1 ճաշի գդալ կիտրոնի հյութ ու քսել խառնուրդը մաշկին՝ թողնելով 15-20 րոպե։ 
• Մի փոքր խմորիչին ավելացնել ջուր ու լավ խառնել, այնուհետև այս խառնուրդին ավելացնել մի փոքր թթվասեր ու ստացված խառնուրդը քսել մաշկին։
• 2 ճաշի գդալ մաղադանոսի խյուսին ավելացնել նույն քանակությամբ կեֆիր ու լավ խառնել, այնուհետև ստացված խառնուրդը քսել մաշկին ու թողնել 15-20 րոպե։
• Շատ արդյունավետ կարող է լինել նաև 1։1 հարաբերակցությամբ կիտրոնի հյութի ու ջրի խառնուրդով մաշկը մաքրելը։ Յուղոտ մաշկի դեպքում կարելի է կիտրոնի հյութին ջուր չավելացնել։

Այս պարզ բնական միջոցները կարող են շատ արդյունավետ լինել, սակայն հարկ է հիշել, որ պիգմենտային հետքերը ոչ միշտ են լինում զուտ կոսմետիկ խնդիր և կարող են պայմանավորված լինել նաև առողջական որոշակի խնդիրներով, ուստի մինչ դրանց դեմ պայքարելը հարկավոր է նախ բուժզննում անցնել ու բացառել վտանգավոր հիվանդությունները։ Հարկ է հիշել, որ ինքնաբուժությունը կարող է շատ տհաճ հետևանքներ ունենալ, ուստի առաջին հերթին հարկավոր է դիմել մաշկաբանին: Լուրջ խնդիրների դեպքում միայն փորձառու մասնագետը կկարողանա պարզել մաշկային նման խնդրի առաջացման պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ Aif.ru