Ինչ է հիպոտոնիան և որոնք են դրա հիմնական ախտանշաններն ու հնարավոր հետևանքները

Բոլորն էլ գիտեն, որ զարկերակային բարձր ճնշումը շատ վտանգավոր խնդիր է, որը բարձրացնում է մի շարք լուրջ հիվանդությունների զարգացման հավանականությունը, սակայն ոչ բոլորն են հաշվի առնում, որ նույնքան վտանագավոր կարող է լինել նաև զարկերակային ճնշման անկումը, որը հաճախ թերագնահատվում է։ Կա տարածված կարծիք, որ զարկերակային ցածր ճնշումը շատ ավելի քիչ վտանգավոր է, քան բարձր ճնշումը, ինչի հետևանքով էլ մարդիկ հաճախ պատշաճ ուշադրություն չեն դարձնում այս խնդրին, սակայն մասնագետները նախազգուշացնում են, որ նման անուշադրությունը կարող է շատ վատ հետևանքներ ունենալ, քանի որ նորմայից ցածր ճնշումը կարող է շատ վտանգավոր լինել՝ երբեմն հանդիսանալով շատ լուրջ հիվանդությունների ախտանշան, իսկ երբեմն էլ դառնալով սրտի նոպայի պատճառ։ 

Ինչպես նշել է Bavarian Heart Attack Network-ի կառավարման խորհրդի անդամ, սրտաբան Ռոբերտ Շվինգերը գերմանական Focus պարբերականի հետ զրույցում, զարկերակային ցածր ճնշման բարենպաստ ազդեցությունն օրգանիզմի վրա կախված է լինում մարդու տարիքից ու քրոնիկ հիվանդությունների առկայությունից, ուստի շատերի մոտ այն կարող է բարձրացնել մի շարք վտանգավոր խանգարումների զարգացման հավանականությունը։

Որ դեպքում է զարկերակային ճնշումը համարվում ցածր

Զարկերակային ճնշման ցուցանիշները մշտական վերահսկողության տակ պահելը շատ կարևոր է, քանի որ թույլ է տալիս ժամանակին նկատել խանգարումներն ու միջոցներ ձեռնարկել խնդիրը կարգավորելու համար։ Կանանց դեպքում զարկերակային ճնշումը ցածր է համարվում 100/60 մմ/սս դեպքում, մինչդեռ տղամարդկանց դեպքում՝ 110/77 մմ/սս դեպքում, ուստի նման ցուցանիշներ նկատելու դեպքում հարկավոր է անպայման խորհրդակցել բժշկի հետ և անհրաժեշտության դեպքում որոշակի միջոցներ ձեռնարկել։

Սովորաբար հիպոտոնիան չի համարվում լուրջ հիվանդություն, ուստի միջոցներ ձեռնարկելու անհրաժեշտություն լինում է միայն ինքնազգացողության վատթարացման լուրջ նշանների՝ գլխապտույտների, ականջներում լսվող աղմուկի, թուլության ու հավասարակշռության կորստի, սրտխփոցի ու գլխացավերի դեպքում։ Այնուամենայնիվ սրտաբանը նախազգուշացրել է, որ բոլոր այդ ախտանշաններին հարկավոր է շատ լուրջ վերաբերվել, քանի որ դրանք անուշադրության մատնելը կարող է ի վերջո անդառնալի հետևանքների հանգեցնել։

Առողջական ինչ խնդիրների մասին կարող է հուշել հիպոտոնիան

Զարկերակային ցածր ճնշումը կարող է պայմանավորված լինել առողջական մի շարք լուրջ խնդիրներով, և հենց սա է պատճառը, որ այն անուշադրության մատնելն ու թերագնահատելը կարող է շատ վտանգավոր լինել։ Այս խնդիրը կարող է հուշել այնպիսի խանգարումների մասին, ինչպիսին են վահանագեղձի դիսֆունկցիան, սրտանոթային համակարգի հիվանդությունները, որոնք կապված են անոթների՝ լայնանալու կարողության նվազման հետ, ինչպես նաև նեյրոգեն խանգարումները, որոնց դեպքում խանգարվում են անոթները լայնացնող ու նեղացնող չափազանց մանր նյարդերի գործառույթները։

Որ դեպքերում է հիպոտոնիան լուրջ վտանգ հանդիսանում

Այս խանգարումը հատկապես վտանգավոր է տարեցների համար, քանի որ տարիքի հետ մեկտեղ մարդու անոթային տոնուսն ու անոթների՝ լայնանալու կարողությունը սահմանափակվում են։ Եթե այս ամենի հետ մեկտեղ նկատվում է նաև զարկերակային ճնշման նվազում, ապա մեծանում է սաստիկ գլխապտույտի հավանականությունը, ինչն էլ կարող է դառնալ լուրջ տրավմաների պատճառ։

Բացի այդ, այն խիստ վտանգավոր է նաև սրտանոթային հիվանդությունների դեպքում, քանի որ կարող է դառնալ սրտի նոպայի պատճառ, ինչն ապացուցվել է հետազոտությունների արդյունքում։ Նման վտանգի հավանականությունը, մասնավորապես, առավել մեծ է կրիտիկական կորոնար ստենոզով հիվանդների համար։

Այսպիսով, ինչպես եզրափակում է բժիշկը, չափազանց ցածր զարկերակային ճնշումը խիստ վտանգավոր է տարեցների ու սրտանոթային հիվանդություններով անձանց համար։ Բացառություն է կազմում միայն սրտային անբավարարությունը, քանի որ թույլ սրտամկան ունեցողները շատ ավելի լավ են դիմակայում զարկերակային ցածր ճնշմանը։