8 արդյունավետ բնական միջոց մեջքի ցավերն առանց դեղորայքի մեղմելու համար

Մեջքի ցավերը բավական տարածված խնդիր են, որոնց առաջացման պատճառները կարող են տարբեր լինել։ Դրանք կարող են պայմանավորված լինել նյարդի բորբոքմամբ, միջանցիկ քամիների վնասակար ազդեցությամբ, գերծանրաբեռնվածությամբ և այլ պատճառներով, սակայն անկախ առաջացման պատճառից հարկավոր է անհապաղ միջոցներ ձեռնարկել ցավը մեղմելու համար։

Նման տհաճ խնդրից ազատվելու համար մարդիկ սովորաբար հատուկ քսուքներ են կիրառում, սակայն լինում են դեպքեր, երբ նման դեղամիջոցներ տվյալ պահին չեն լինում, ուստի օգնության են հասնում ոչ պակաս արդյունավետ բնական դեղամիջոցները։ Ավելին՝ շատ հաճախ իրենց քիմիական բաղադրության պատճառով դեղամիջոցներն առաջացնում են տարատեսակ կողմնակի բարդություններ ու ալերգիկ ռեակցիաներ, մինչդեռ ժողովրդական միջոցները պատրաստվում են բացառապես բնական բաղադրիչներից, ուստի չեն առաջացնում կողմնակի խնդիրներ և որևէ բաղադրիչի նկատմամբ անհատական անհանդուրժողականության բացակայության դեպքում չեն ունենում նաև հակացուցումներ։

Aif.ru կայքը ներկայացրել է մեջքի ցավերի դեմ պայքարի մի քանի պարզ ու արդյունավետ միջոց, որոնք կօգնեն հեշտությամբ մեղմել ցավն առանց դեղորայքի։

• 0,5 կգ կարտոֆիլն առանց կեղևազրկելու ջեռոցում եփել, որից հետո տրորել ու խյուս դարձնել (առանց կեղևազրկելու), ավելացնել 2 ճաշի գդալ կերակրի սոդա և լավ խառնել։ Ստացված խառնուրդը քսել մաքուր կտորին, դնել ախտահարված հատվածին (կարտոֆիլը պետք է հպվի մաշկին), այնուհետև ծածկել կոմպրեսը պոլիէթիլենային թաղանթով ու տաք կտորով՝ թողնելով մեկ ժամ։
• 1։1 հարաբերակցությամբ խառնել քերիչով մանրացրած խնձորն ու ծովաբողկի արմատը, այնուհետև ստացված խառնուրդը քսել ցավոտ հատվածին, ծածկել կոմպրեսը պոլիէթիլենային թաղանթով և փաթաթել տաք կտորով՝ թողնելով մեկ ժամ։
• 1։1 հարաբերակցությամբ խառնել քերիչով մանրացրած հում կարտոֆիլն ու մեղրը, որից հետո ստացված խառնուրդը քսել ցավոտ հատվածին, ծածկել պոլիէթիլենային թաղանթով և փաթաթել տաք կտորով։ Բուժիչ կոմպրեսը հարկավոր է թողնել մեկ ժամ։
• 1 ճաշի գդալ նեխուրի մանրացրած արմատին ավելացնել 1 լիտր գոլ ջուր, թրմել 8 ժամ, որից հետո քամել։ Ստացված թուրմը հարկավոր է ընդունել օրական 3 անգամ սնվելուց առաջ մեկական աղանդերի գդալ։
• Գայլուկի կոները մնարացնել ու փոշի դարձնել, այնուհետև ստացված փոշու 1 ճաշի գդալին ավելացնել 1 ճաշի գդալ խոզի ճարպայուղ կամ թարմ կարագ ու լավ խառնել։ Ստացված քսուքը կիրառել կանոնավոր ախտահարված հատվածին քսելու համար։
• 1 ճաշի գդալ դափնու մանրացրած տերևներին ավելացնել 1 բաժակ ձիթայուղ և 15 օր թրմել որևէ տաք տեղում։ Ստացված յուղը հարկավոր է կիրառել կանոնավոր ախտահարված հատվածին քսելու համար։ Այս պրոցեդուրան ցանկալի է անել քնելուց առաջ, որից հետո փաթաթել գոտկատեղը տաք կտորով ու պառկել քնելու։
• 1 թեյի գդալ դափնու մանրացրած տերևներին ավելացնել 1,5 բաժակ եռման ջուր, 4 ժամ թրմել թերմոսի մեջ, որից հետո քամել։ Ստացված թուրմը հարկավոր է փոքր չափաբաժիններով ընդունել 12 ժամվա ընթացքում։ Բուժման կուրսը տևում է 4 օր։
• 1 բաժակ ձիթայուղին ավելացնել 1 ճաշի գդալ սև պղպեղի փոշի, դնել թույլ կրակին ու եռացնել 5-10 րոպե։ Ստացված յուղը թողնել սառչի, այնուհետև քամել և օգտագործել կանոնավոր ախտահարված հատվածին քսելու համար։

Այս բնական միջոցները շատ արդյունավետ են ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: