Լյարդի ճարպային հիվանդության մասին կարող են հուշել մարդու ձեռքերը․ 4 ախտանշան, որոնք չի կարելի անտեսել

Լյարդը մարդու ամենակարևոր օրգաններից մեկն է, որի գործառույթների խանգարումը կարող է շատ վտանգավոր հետևանքներ ունենալ՝ խիստ բացասաբար անդրադառնալով ամբողջ օրգանիզմի վրա։ Այս օրգանը պատասխանատու է տոքսինների դուրսբերման, նյութափոխանակության կարգավորման, լեղու արտադրության ու կենսական նշանակություն ունեցող մի շարք այլ գործառույթների կատարման համար, ուստի դրա առողջության պահպանումը ևս կենսական նշանակություն ունի։

Այս օրգանի ամենատարածված հիվանդություններից մեկը լյարդի ճարպային հիվանդությունն է, որը զարգանում է օրգանում մեծ քանակությամբ ճարպերի կուտակման հետևանքով։ Այս հիվանդությունը ժամանակին հայտնաբերելու համար հարկավոր է առաջին հերթին ուշադրություն դարձնել դրա մասին հուշող ախտանշաններին, մինչդեռ խնդիրն այն է, որ հիվանդությունը կարող է բավական երկար ժամանակ զարգանալ առանց որևէ ախտանշանի՝ մնալով աննկատ։ Բացի այդ, շատ հաճախ հիվանդության մասին հուշող ախտանշանները լինում են բավական ատիպիկ, ինչի պատճառով էլ մարդիկ հազվադեպ են վերագրում դրանք լյարդի ախտահարմանը։

Ինչպես հաղորդում է British Liver Trust կազմակերպությունը, լյարդի ճարպային հիվանդության մասին հուշող ատիպիկ ախտանշանների շարքին կարող են դասվել ձեռքերի որոշ փոփոխությունները, ուստի մասնագետները հորդորում են ուշադրություն դարձնել ստորև ներկայացված ախտանշաններին։

Ափերի կարմրություն

Լյարդի ճարպային հեպատոզի զարգացումը կարող է ուղեկցվել ափերի արտասովոր կարմրությամբ, ուստի ափերի մեջ կարմիր բծեր նկատելու դեպքում հարկավոր է անպայման դիմել մասնագետին ու ստուգել լյարդի վիճակը։

Եղունգների վիճակի փոփոխություն

Անզեն աչքով տեսանելի մյուս ախտանշանը կարող է լինել եղունգների վիճակի փոփոխությունը և դրանց չափազանց գունատ, սպիտակ ու խամրած գույնը։ Բացի այդ, հարկավոր է ուշադրություն դարձնել նաև ցուցամատի սպիտակ կիսալուսնաձև հատվածին, քանի որ դրա փոքրացումը կամ առհասարակ անհետացումը ևս կարող է պայմանավորված լինել լյարդի ճարպային հիվանդությամբ։ Նման դեպքերում հարկավոր է անհապաղ բուժզննում անցնել խնդիրը հնարավորինս շուտ հայտնաբերելու և միջոցներ ձեռնարկելու համար։

Մատների ձևի փոփոխություն

Խիստ մտահոգիչ ախտանշան է համարվում նաև մատների ծայրերի հաստացումը, ինչի հետևանքով մատները նմանվում են թմբուկի փայտիկների։ Նման ախտանշանը կարող է հուշել լյարդի ախտահարման մասին, ուստի դրա առկայության դեպքում հարկավոր է անհապաղ դիմել մասնագետին։

Ձեռքերի դող

Լյարդի այս վտանգավոր ախտաբանության մասին կարող է հուշել նաև ձեռքերի արտասովոր դողը, որը ևս չի կարելի անուշադրության մատնել։

Վերոնշյալ ախտանշաններից բացի այս հիվանդությունը կարող է դրսևորվել նաև մի շարք այլ խանգարումներով, որոնց շարքին են դասվում ինքնազգացողության ընդհանուր վատթարացումը, տոնուսի կորուստը, ախորժակի կորուստը, սրտխառնոցն ու լյարդի հատվածում տհաճ զգացողությունների առկայությունը։

Նշված ախտանշանները ոչ միշտ են պայմանավորված լինում լյարդի ճարպային հիվանդությամբ, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում, իսկ դրանք վաղ փուլերում բուժելը միշտ շատ ավելի արդյունավետ է լինում։ 

Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru