Մասնագետը հերքել է քաղցկեղի՝ վարակիչ լինելու մասին պնդումը

Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է ախտահարել գրեթե բոլոր օրգաններն ու հյուսվածքները և ախտորոշվել ինչպես կանանց, այնպես էլ տղամարդկանց մոտ։ Սա դասվում է այն հիվանդությունների շարքին, որոնց վաղ ախտորոշումը բարձրացնում է բարեհաջող բուժման հավանականությունը, սակայն խնդիրն այն է, որ օնկոլոգիական հիվադությունները կարող են բավական երկար ժամանակ զարգանալ առանց ախտանշանի ու մնալ աննկատ, ինչի պատճառով էլ հաճախ հայտնաբերվում են միայն զարգացման ուշ փուլերում, երբ բուժումն արդեն անարդյունավետ է լինում։

Քաղցկեղի հետևանքով մահացության նման բարձր մակարդակն ու բուժմանը դրա վատ արձագանքը հանգեցրել են հիվանդության մասին բազմաթիվ թյուր կարծիքների ձևավորման, որոնցից մեկը դրա վարակիչ լինելու վերաբերյալ պնդումն է։ Ռուս ուռուցքաբան Իվան Կարասևն իր ինստագրամյան էջում անդրադարձել է այս պնդմանը՝ հերքելով այն ու ներկայացնելով՝ ինչպես են առհասարակ զարգանում օնկոլոգիական հիվանդությունները։

Պատասխանելով օգտատերերից մեկի հարցին՝ հնարավոր է արդյոք քաղցկեղով վարակվել, մասնագետը շեշտել է, որ այս հիվանդությունը չի փոխանցվում սեռական կամ օդակաթիլային ճանապարհով, ինչպես նաև կեցաղային իրերի կամ բժշկական անփութության հետևանքով։ Նրա խոսքով՝ գիտնականները դեռ երբեք չեն գրանցել նման դեպք, ուստի քաղցկեղով հիվանդների հետ աշխատող բժիշկներն անվտանգության հավելյալ միջոցներ չեն ձեռնարկում, ինչպես արվում է վարակիչ հիվանդություններով հիվանդների հետ աշխատելու պարագայում։

Ուռուցքաբանը նաև անդրադարձել է քաղցկեղի զարգացմանը՝ բացատրելով, որ չարորակ նորագոյացություններն ի հայտ են գալիս սպիտակուցների մնացորդներից, որոնք ներթափանցում են գենոմի մեջ ու խանգարում դրա գործառույթները։ Սա հանգեցնում է բջիջների մուտացիայի, ինչի հետևանքով էլ դրանք չարորականում են, բազմանում ու դառնում ուռուցքի պատճառ։ 

Միևնույն ժամանակ մասնագետը շեշտել է, որ քաղցկեղը կարելի է համարել վիրուս, սակայն այն էնդոգեն վիրուս է, այլ ոչ թե արտաքին։ Այս պնդումը հաստատելու համար բժիշկը ներկայացրել է 1970 թվականին Սլոուն Քեթերինգի անվան ինստիտուտի (ԱՄՆ) գիտնականների անցկացրած հետազոտությունը, որի շրջանակներում գիտնականները կամավորների մաշկի տակ քաղցկեղի «հարուցիչներ» են ներարկել, սակայն կամավորներից ոչ մեկի մոտ քաղցկեղ այդպես էլ չի զարգացել։

Սա ապացուցում է, որ անգամ հիվանդանոցներում գործիքներն ինչպես հարկն է չախտահանելու դեպքում հնարավոր չի լինի վարակվել քաղցկեղով, սակայն հարկավոր է հաշվի առնել, որ այս դեպքում բարձր է լինում այլ վտանգավոր վարակիչ հիվանդություններով, այդ թվում՝ հեպատիտներով կամ ՄԻԱՎ-ով վարակվելու հավանականությունը։