5 համեղ ու օգտակար մթերք, որոնք կօգնեն մեղմել արթրիտի տհաճ դրսևորումներն ու հոդացավերը

18:00 • 28.06.21

Արթրիտը հոդերի մի խումբ բորբոքային հիվանդությունների ընդհանուր անվանումն է։ Սա բավական տարածված խնդիր է, որի պատճառ կարող է դառնալ անգամ հասարակ մրսածությունը կամ որևէ այլ անվնաս թվացող վարակ։ Այս հիվանդությունը սովորաբար ախտահարում է 30-50 տարեկան մարդկանց հոդերը՝ դրսևորվելով դրանց բորբոքմամբ, սաստիկ հոդացավերով ու անգամ շարժողական գործառույթների սահմանափակմամբ, ինչի հետևանքով էլ այն խիստ բացասաբար է անդրադառնում մարդու կյանքի որակի վրա: Ընդ որում՝ կանայք այս խնդրին շուրջ երեք անգամ ավելի հաճախ են բախվում, քան տղամարդիկ։

Այս հիվանդության ամենատարածված տեսակն օստեոարթրիտն է, որի դեպքում ժամանակի ընթացքում դանդաղ «մաշվում» է այն հարթ աճառային հյուսվածքը, որով ծածկված է լինում հոդը: Մյուս տարածված տեսակը ռևմատոիդ արթրիտն է, որն աուտոիմունային բնույթ կրող հիվանդություն է և զարգանում է այն ժամանակ, երբ օրգանիզմը սխալմամբ հարձակվում է առողջ հոդերի հյուսվածքների վրա: Այնուամենայնիվ անկախ արթրիտի տեսակից այս հիվանդությունը հարկավոր է հնարավորինս շուտ ախտորոշել, սկսել բուժումն ու անել հնարավոր ամեն բան տհաճ ախտանշանները մեղմելու համար:

Արթրիտի ախտորոշման դեպքում հարկավոր է օր առաջ սկսել բուժումը հնարավոր բարդություններն ու կենսական նշանակություն ունեցող օրգանների ախտահարումը կանխելու համար: Բացի այդ, հարկավոր է նաև միջոցներ ձեռնարկել հիվանդության տհաճ ախտանշանները մեղմելու և դրանց սրացումներից խուսափելու համար:

Հիվանդության ախտանշանները մեղմելու հարցում դեղորայքային բուժումից բացի հիանալի օգնական կարող է լինել նաև մարդու սննդակարգը, քանի որ կան սննդամթերքի որոշ տեսակներ, որոնք կարող են զգալիորեն մեղմել հիվանդության դրսևորումներն ու կանխել ախտանշանների սրացումը, ուստի դրանք հարկավոր է անպայման ներառել մշտական սննդակարգում:

Բրիտանական Express Health պարբերականի հետ զրույցում մասնագետները ներկայացրել են սննդամթերի այն տեսակները, որոնք կարող են օգտակար լինել արթրիտով հիվանդների համար:

Օգտակար յուղեր

Arthritis Foundation կազմակերպության տվյալներով՝ առաջին մզման ձիթայուղն իր օգտակար հատկություններով նման է հակաբորբոքային դեղամիջոցների ազդեցությանը: Բացի այդ, այս յուղը պարունակում է նաև սրտամկանի համար շատ օգտակար յուղեր, ուստի շատ կարևոր է նաև սրտանոթային համակարգի համար: Ձիթայուղից բացի հոդերի համար օգտակար կարող են լինել նաև ավոկադոյի յուղն ու սաֆլորի յուղը, որոնք ևս կարելի է ներառել սննդակարգում:

Բրոկոլի

Բրոկոլին բանջարեղենի լավագույն տեսակներից մեկն է արթրիտով հիվանդների համար, քանի որ պարունակում է սուլֆարոֆան: Այս նյութը դանդաղեցնում է արթրիտով պայմանավորված ցավի զարգացումը, ուստի զարմանալի չէ, որ դրանով հարուստ մթերքը բարենպաստ ազդեցություն է ունենում հիվանդների վրա:

Կաթնամթերք

Ոչ շատ բարձր յուղայնություն ունեցող կաթնամթերքը (օրինակ՝ կաթ, յոգուրտ, պանիր և այլն) պարունակում են կալցիում և վիտամին D, իսկ այս տարրերը բարձրացնում են ոսկորների ամրությունը: Arthritis Foundation-ի մասնագետները համարում են, որ կաթնամթերքի գործածությունը կարող է առանձնահատուկ օգտակար լինել օստեոպորոզի և օստեոարթրիտի դեպքում, ուստի դրանք հարկավոր է անպայման ներառել սննդակարգում:

Ցիտրուսային մրգեր

Նարինջը, կիտրոնը, թուրինջն ու ցիտրուսային այլ մթերքը հարուստ են հսկայական քանակությամբ վիտամին C-ով, իսկ այս տարրը խիստ կարևոր է ոսկորների առողջության ու իմունային համակարգի գործառույթների պահպանման համար: Սա էլ իր հերթին օգնում է պաշտպանվել բորբոքային արթրիտից:

Լոբազգիներ

Լոբազգիներում պարունակվող մանրաթելերն օգնում են նվազեցնել С-ռեակտիվ սպիտակուցների մակարդակը, ինչն էլ նվազեցնում է հոդերի բորբոքումների հավանականությունը: Բացի այդ, լոբազգիները հարուստ են ֆոլաթթվով, մագնեզիումով, երկաթով, ցինկով ու կալիումով, որոնք հայտնի են իմունային համակարգի վրա ունեցած իրենց դրական ազդեցությամբ: Այս տարրերը շատ կարևոր են ռևմատոիդ արթրիտի կանխարգելման համար, ուստի սննդակարգը լոբազգիներով հարստացնելը կարող է շատ օգտակար լինել: